Read Tzeltal 1 Crónicas 13 Bible Online

1 Crónicas 13 - Tzeltal bible

1 Crónicas 13

¹Te David la snop soc te capitanetic yu'un jujumil (1,000) soc yu'un ho'ho'winic (100) ta tuhl soldadohetic, soc spisil te jtsobawetic.

²Hich la yalbe spisil te tsoblej yu'un Israel: Teme lec yac awa'iyic soc teme hich ya sc'an te Jehová te Dios cu'untic, ya jticontic bahel c'op ta stojol te quermanotactic te nahinemic ta spisil sq'uinal Israel, soc ta stojol te sacerdotehetic soc levitahetic te sjoc sbahic soc ta pueblohetic soc tut pueblohetic yu'unic, yu'un ya jtsohb jbahtic soc;

³ya quich'tic tal ta jtojoltic te scaxahul te chapbil-c'op yu'un te Dios cu'untic, como c'alal ta yorahil Saúl ma ba la jquich'tic ta cuenta, xchi.

⁴Spisil mach'atic stsoboj sbahic la yalic te hich ac'a c'ohtuc ta pasel, como lec la ya'iyic spisil te pueblo.

⁵Ha yu'un te David la stsob tal spisil Israel c'alal Sihor yu'un Egipto ha to ta yochibal Hamat, scuenta yu'un ya yich'ic tal te scaxahul te chapbil-c'op yu'un Dios te ay ta Quiriat-jearim.

⁶Te David mo bahel soc spisil Israel ta Baala, ha te Quiriat-jearim te ay ta sq'uinal Judá, scuenta yu'un ya yich'ic tal te scaxahul te chapbil-c'op yu'un te Jehová Dios te nahinem ta yohlil te querubinetic, te banti ya yich' c'oponel ta scuenta sbihil.

⁷La yich'ic hahchel ta yach'il carreta te scaxahul te chapbil-c'op ta sna Abinadab. Te Uza soc Ahío la stojobtesic bahel te carreta.

⁸Te David soc spisil Israel mero tse'el yo'tanic ta stojol Dios ta spisil yipic ta c'ayoj, ta arpa, salterio, c'ayob, platillo soc cornetahetic.

⁹C'alal c'ohtic ta swuyojibal trigo yu'un Quidón, te Uza la shach sc'ab ta slat'el te scaxahul te chapbil-c'op, yu'un la sc'ohchin yoc te j'a'tel-wacaxetic.

¹⁰Pero tihl yilimba Jehová ta stojol te Uza, la yehchentes ta scaj te la shach sc'ab ta slat'el te scaxahul te chapbil-c'op, tey laj ta stojol Dios a.

¹¹Te David ilin yu'un ta scaj te Jehová la smil te Uza. Ha scuentahil te Pérez-uza[18] c'oht sbihil te lugar c'alal ora.

¹²Te David la xi' te Dios ta hich ora, hich la yal: ¿Bin ut'il ya xhu' ya quich' tal ta jtojol te scaxahul te chapbil-c'op yu'un Dios? xchi.

¹³Hich ma ba la yich' tal ta sna ta Pueblo yu'un David, la yich' bahel ta sna te Obed-edom te talem ta Gat.

¹⁴Te scaxahul te chapbil-c'op yu'un Dios hil oxeb u ta sna Obed-edom. Te Jehová la ya'be bendición te mach'atic ay yu'un Obed-edom soc spisil bintic ay yu'une.