Read Tzeltal 1 Crónicas 14 Bible Online

1 Crónicas 14 - Tzeltal bible

1 Crónicas 14

¹Te Hiram ajwalil yu'un Tiro la sticon a'batetic ta stojol David soc cedro-te'etic, albañiletic soc carpinterohetic yu'un ya spasbeyic sna a.

²Hich la sna' te David te hich yo'tan Jehová te ay ta ajwalil yu'un Israel, soc te muc'ubtesbot sc'oblal ya'tel ta ajwalil ta stojol te pueblo Israel.

³Te David la yic' xan yantic yihnam ta Jerusalén, hich ayin xan queremetic soc ach'ixetic yu'un.

⁴Hich ay sbihilic te ayinic ta Jerusalén: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Eliada soc Elifelet.

⁸Te filisteohetic, c'alal la ya'iyic te yich'ojix malel ta aceite scuenta ochel ta ajwalil yu'un spisil Israel te David, spisilic baht slehic te David. C'alal hich la ya'iy te David, loc' bahel ta ya'beyel guerra.

⁹Talic te filisteohetic, la spuc sbahic ta spamlej yu'un Refaim.

¹⁰Ha yu'un te David la sjoc'obe te Jehová: ¿Ya bal ca'be guerra te filisteohetic? ¿Ya bal awa'bon ta jc'ab? xchi. La sjac' te Jehová: Bahan, como ya ca'bat ta ac'ab, xchi.

¹¹Hich mohic bahel ta Baal-perazim, tey la stsal a te filisteohetic te David. Patil hich la yal yu'un: Dios la sjin te jcontratac ta jc'ab hich te bin ut'il ya xt'ohm loq'uel ha' ta sbe, xchi. Ha yu'un Baal-perazim sbihil la ya'be te lugar.[19]

¹²Te filisteohetic la yihquitayic hilel tey a te diosetic yu'unic; te David la yal te ya me yich' chiq'uel.

¹³Te filisteohetic talic yan buelta, la spuc xan sbahic ta spamlej.

¹⁴Te David la sjoc'obe yan buelta te Diose, hich halbot yu'un: Ma me xat'unic mohel, ya me ajoyic tal ta spatic, tey yac awochintayic a ta stojol te bálsamo-te'etic.

¹⁵Te c'alal yac awa'iybe sc'op te ay mach'atic schajlajanic ta sni'il te te'etic, loc'an bahel ta ora ta ya'beyel guerra, como te Dios ya me xnahilij bahel awu'un ta yehchentesel te soldadohetic yu'un te filisteohetic, xchi.

¹⁶Te David hich la spas te bin ut'il pasot ta mandar yu'un te Diose. Hich la stsalic te soldadohetic yu'un te filisteohetic c'alal Gabaón ha to ta Gezer.

¹⁷Hich puhc sc'oblal te David ta spisil te q'uinale. Te Jehová la yac' ta xi'el te David yu'un te nacionetique.