Read Tzeltal 1 Crónicas 15 Bible Online

1 Crónicas 15 - Tzeltal bible

1 Crónicas 15

¹Te David la spas nahetic yu'un ta Pueblo yu'un David, soc la schahpambe yawil te scaxahul te chapbil-c'op yu'un Dios soc la spasbe snahilpac'.

²Hich la yal te David: Ha nax te levitahetic te ya yich'ic bahel te scaxahul te chapbil-c'op yu'un Dios, como ha tsahbilic yu'un Jehová yu'un ya yich'ic bahel te scaxahul te chapbil-c'op yu'un Jehová, soc ayic ta a'batinel yu'un spisil ora stuquelic, xchi.

³Te David la stsob spisil Israel ta Jerusalén yu'un sc'asesel tal te scaxahul te chapbil-c'op yu'un Jehová ta banti chahpambil yu'un.

⁴Ha nix hich la stsob tal te sts'umbal Aarón soc te levitahetic:

⁵ta sts'umbal Coat: ha te Uriel te príncipal, soc wacwinic (120) ta tuhl te yermanotac;

⁶ta sts'umbal Merari: ha te Asaías te príncipal, soc buluchwinic (220) ta tuhl te yermanotac;

⁷ta sts'umbal Gersón: ha te Joel te príncipal, soc lajuneb sjucwinic (130) ta tuhl te yermanotac;

⁸ta sts'umbal Elizafán: ha te Semaías te príncipal, soc lajunwinic (200) ta tuhl te yermanotac;

⁹ta sts'umbal Hebrón: ha te Eliel te príncipal, soc chanwinic (80) ta tuhl te yermanotac;

¹⁰ta sts'umbal Uziel: ha te Aminadab te príncipal, soc lahchayeb swacwinic (112) ta tuhl te yermanotac.

¹¹Patil te David la yic' tal te sacerdotehetic Sadoc soc Abiatar, soc te levitahetic Uriel, Asaías, Joel, Eliel soc Aminadab,

¹²hich la yalbeyic: Ha'ex te jtsobawex yu'un jujuchahp sna sme'stat te levitahetic, ch'ultesa abahic soc te awermanotac, soc c'asesahic tal te scaxahul te chapbil-c'op yu'un Jehová te Dios yu'un Israel ta lugar te chahpambilix cu'un.

¹³Te bin ut'il ma hichuc la apasic ta nahil to, te Jehová te Dios cu'untic ilin ta jtojoltic ta scaj te ma ba la jlehtic hich te bin ut'il yaloj ta mandar, xchi.

¹⁴Hich te sacerdotehetic soc te levitahetic la sch'ultes sbahic yu'un ya yich'ic tal te scaxahul te chapbil-c'op yu'un Jehová te Dios yu'un Israel.

¹⁵Hich te snich'nab levitahetic la sq'uechic tal ta ste'el, hich te bin ut'il yaloj ta mandar te Moisés ta scuenta sc'op te Jehová.

¹⁶Te David la yalbe te príncipaletic yu'un te levitahetic te ac'a slehic ta yohlil te yermanotac te mach'atic ya xc'ayojinic soc sjahts' sc'op te a'tejibal yu'un música, ta salterio, arpa soc platillo, yu'un ya xc'ayojinic soc yutsil yo'tanic.

¹⁷Hich te levitahetic la slehic te Hemán snich'an Joel; soc te Asaf snich'an Berequías, te yermano Hemán; ta sts'umbal Merari soc te yermanotac, la slehic te Etán snich'an Cusaías;

¹⁸soc ta banti te smohlol sts'ahquil ta scha'cajal: ha te Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, soc te jcanan-ti'nahiletic Obed-edom soc Jeiel.

¹⁹Hich te Hemán, Asaf soc Etán, te jc'ayojetic, la stijic te platillohetic pasbilic ta bronce.

²⁰Te Zacarías, Aziel, Semiramot, Jehiel, Uni, Eliab, Maasías soc Benaía, la stijic arpa te chahpambil ta alamot.[20]

²¹Te Matatías, Elifelehu, Micnías, Obed-edom, Jeiel soc Azazías, la stijic arpahetic te chahpambil ta siminita[21] yu'un ya x'ic'awan.

²²Te Quenanías, te príncipal yu'un te levitahetic ta scuenta música, ha ac'ot yu'un ya x'ic'awan ta c'ayoj, como ha ya sna' ta lec.

²³Te Berequías soc Elcana ha jcanan-ti'nahiletic yu'un te scaxahul te chapbil-c'op.

²⁴Te sacerdotehetic Sebanías, Josafat, Natanael, Amasai, Zacarías, Benaías soc Eliezer, ha'ic ya yoq'uesinic te cornetahetic ta stojol te scaxahul te chapbil-c'op yu'un Dios. Te Obed-edom soc Jehías, ha'ic nix jcanan-ti'nahiletic yu'un te scaxahul te chapbil-c'op.

²⁵Ha yu'un te David, te mamaletic yu'un Israel soc te capitanetic yu'un jujumil soldadohetic baht yich'ic tal soc yutsil yo'tanic te scaxahul te chapbil-c'op yu'un Jehová ta sna Obed-edom.

²⁶Te bin ut'il Dios coltayotic yu'un te levitahetic te yac sq'uechbelic bahel te scaxahul te chapbil-c'op yu'un Jehová, la yaq'uic huqueb torohetic soc huqueb tat tuminchijetic scuenta milbil mahtanil.

²⁷Te David slapoj bahel snahtil-c'u' pasbil ta lequil lino, ha nix hich spisil te levitahetic te sq'uechojic bahel te scaxahul te chapbil-c'op, soc nix te jc'ayojetic soc te Quenanías te jahch-c'ayoj. Te David ha nix slapoj bahel jun efod te pasbil ta lino.

²⁸Hich spisil Israel la yich'ic tal te scaxahul te chapbil-c'op yu'un Jehová soc yutsil yo'tanic soc ta sc'op xulubil, corneta, platillo, soc sc'op salterio soc arpa.

²⁹C'alal c'oht te scaxahul te chapbil-c'op yu'un Jehová ta Pueblo yu'un David, te Mical yantsil-nich'an Saúl yac ta yilel ta ventana; c'alal la yil te yac ta wihlel soc ahc'ot te ajwalil David la sp'aj ta yo'tan.