Read Tzeltal 1 Crónicas 17 Bible Online

1 Crónicas 17 - Tzeltal bible

1 Crónicas 17

¹C'alal nahinemix ta sna a te David, hich la yalbe te jalwanej Natán: Te ho'one nahinemon ta na pasbil ta cedro, yan te scaxahul te chapbil-c'op yu'un Jehová ha nax ay ta nahilpac', xchi.

²Te Natán la yalbe te David: Pasa spisil te bintic ay ta awo'tan, como sjoquinejat te Diose, xchi.

³Pero ha nix ta yorahil ta ahc'abal tal sc'op te Dios ta stojol Natán, hich la yal:

⁴Bahan halbeya te ca'bat David: Hich ya yal te Jehová: Ma ha'ucat te yac apasbon na te banti ya xnahinon.

⁵Como mayuc nahinemon ta junuc na c'alal la jloq'ues tal ta Egipto te snich'nab Israel c'alal ora. Xmelmon nahinon tal ta nahilpaq'uetic ta yantic lugartic.

⁶Bayuc behenon soc spisil Israel, ¿ay bal jtuhl juez yu'un Israel te la jcalbe mandar te ya me scanantay te pueblo cu'un, te hich la jcalbe: ¿Bin yu'un ma ba yac apasbon na ta cedro? te xchihone?

⁷Ha yu'un halbeya te ca'bat David: Hich yaloj te Jehová te scuentahinej spisil: Ho'on la jloq'uesat tal ta aquiltic ta stojol te tuminchijetic scuenta yu'un ajwalil ya xc'ohat yu'un te pueblo Israel cu'un.

⁸La joquinat ta bayuc bahat soc la jlajin spisil acontratac ta atojol. Ya cac' te muc' ya xc'oht abihil hich te bin ut'il sbihilic te mach'atic bayel sc'oblalic ta bahlumilal.

⁹Soc la ca'be jun lugar yu'un te pueblo Israel cu'un, soc la jts'un scuenta yu'un ya xnahinic tey a, mayuc bin ora ya xloq'uic tey a. Ma ba ya x'uts'inotiquix yu'un te chopol scontratac, hich te bin ut'il ta nahil to

¹⁰c'alal la jcac' juecetic ta stojol te jpueblo Israel; ha ya jpehc'an spisil te acontratac. Ya ca'bat ana', te Jehová ya spasbat ana ha'at.[24]

¹¹Soc te c'alal ya xc'oht aworahil te ya xway abaq'uetal,[25] ya cac' hahchuc ats'umbal ta patil awu'un, jtuhl ta yohlil anich'nab, ya ca'be yich' yip te ya'tel ta ajwalil.

¹²Ha ya spasbon Jna, soc ho'on ya ca'be yich' yip te ya'tel ta shuctajib ta sbahtel q'uinal.

¹³Ho'on staton ya xc'ohon soc ha jnich'an ya xc'oht. Ma ba ya jloq'ues ta stojol te sc'uxul co'tan, ma hichuc te bin ut'il la jloq'ues ta stojol te mach'a nahil ay awu'un;

¹⁴sbahtel q'uinal ya ca'be scuentahin te jna soc te ban c'alal jcuentahinej, soc ay me yip ta shuctajib sbahtel q'uinal, xchi.

¹⁵Te Natán la yalbe te David spisil te bintic halbot soc te la yil ta snahalsit.

¹⁶Ha yu'un te ajwalil David och bahel soc la shuhcan sba ta stojol te Jehová, hich la yal: Jehová Dios, ¿mach'ahon a soc te mach'atic ay cu'un te la awic'on tal c'alal li'i?

¹⁷Soc xan, Dios, jteb nax la awa'iy ini; ha la awalbe te a'bat awu'un bin ya xc'oht ta pasel ta patil ta stojol te cajalcaj sts'umbal, soc mero lecon ta winiquil la awilon, Jehová Dios.

¹⁸¿Bin xan yan ya xhu' ya yal David yu'un te ich'el ta muc' la awa'be te a'bat awu'une? Ha'at yac ana'be sba te a'bat awu'une.

¹⁹Jehová, ta scuenta sc'uxul awo'tan ta stojol te awa'bat soc ta scuenta te bin ya sc'an awo'tan, la apas spisil bintic muq'uic ini soc la awac' ta ilel.

²⁰Jehová, mayuc mach'a pajalat soc, mayuc yan Dios, ha'at nax atuquel, hich te bin ut'il ca'iyejcotic.

²¹¿Ay bal yan pueblo ta bahlumilal te pajal soc te pueblo Israel awu'un te tal ta coltayel yu'un te Dios yu'unic, scuenta yu'un yac awac' tohyuc sc'oblal abihil ta scuenta spasel bintic muq'uic la apas soc jchahp a'teliletic, te la atenticlan loq'uel nacionetic ta stojol te pueblo awu'un te la acoltay loq'uel ta mosohil ta Egipto?

²²Ha'at la awac' te ha awu'un c'oht te pueblo Israel ta sbahtel q'uinal, soc ha'at, Jehová, Diosat yu'unic c'ohat.

²³Ha yu'un, Jehová, te bin la awalbeyix sc'oblal te a'bat awu'un soc te sts'umbal, ac'a yich' yip sbahtel q'uinal, soc pasa te bin la awale.

²⁴Stalel ac'a hiluc te abihil soc muc'uc me sc'oblal ya xc'oht sbahtel q'uinal, scuenta yu'un hich ya yich' halel: Jehová te scuentahinej spisil, te Dios yu'un Israel, ha Dios ta Israel, xchihuc me ac'oblal. Soc stalel ac'a yich' yip ta atojol te cajalcaj sts'umbal ta ajwalil te David te a'bat awu'une.

²⁵Ha'at, Diosat cu'un, la awalbe ya'iy te a'bat awu'un te yac apasbe sna; ha scuentahil te yac ta c'op ta atojol te a'bat awu'une.

²⁶Ha yu'un, Jehová, ha'at Diosat, soc la awalbe ta jamal te a'bat awu'un te bintic lec ini.

²⁷Yo'tic hich awo'tan te yac awa'be bendición te cajalcaj sts'umbal te awa'bat scuenta yu'un stalel ya xhilic ta atojol sbahtel q'uinal; como ha'at, Jehová, awa'beyejix bendición, soc stalel me ay bendición yu'un sbahtel q'uinal, xchi.