Read Tzeltal 1 Crónicas 18 Bible Online

1 Crónicas 18 - Tzeltal bible

1 Crónicas 18

¹Ta patil ini te David la stsal te filisteohetic, la spehc'anlan soc la yich' te Gat soc te tut pueblohetic yu'une.

²Soc la stsal te Moab, ha a'batetic yu'un c'ohtic, soc la stoj spatanic.

³Ha nix hich te David la stsal ta Hamat te Hadad-ezer ajwalil yu'un Soba, c'alal Hadad-ezer baht yu'untay te q'uinal ta sti'il te muc'ul-ha' Éufrates.

⁴Te David la yich'be lajunwinic yoxbahc' (1,000) carretahetic yu'un guerra, soc j'ohlil swaxaclajunbahc' (7,000) jmoheletic ta cawu soc j'ohlil yoxpic (20,000) winiquetic te behel ta yoquic. Te David la sbojticlambe schihal yacanic spisil te cawuhetic te ya snitic te carretahetic, ha xanix la yihquitay cawuhetic scuenta ho'winic (100) carretahetic.

⁵Patil c'ohtic ta Damasco te siriahetic ta scoltayel te Hadad-ezer ajwalil yu'un Soba. Pero te David la smil cha'pic soc ho'lajunbahc' (22,000) ta tuhl winiquetic.

⁶Te David la yac' jtsohb soldadohetic ta Siria te cuentahimbil yu'un Damasco. Te siriahetic ochic ta a'batinel yu'un David soc la stoj spatanic ta stojol. Te Jehová la yac' ta tsalaw ta bayuc banti baht te David.

⁷Te David la yich'be te smahquilic pasbilic ta oro te yich'ojic te a'batetic yu'un Hadad-ezer, la yich'ticlan tal ta Jerusalén.

⁸Soc la sloq'ues bayel bronce ta Tibhat soc ta Cun, te pueblohetic yu'un Hadad-ezer, te ha la stuhun te Salomón ta spasel te muc'ul yawil ha' ta bronce, te toyol bahlal oyetic soc te bintic ya xtuhun te pasbilic ta bronce.

⁹C'alal la ya'iy te Toi ajwalil yu'un Hamat te tsalotiquix yu'un David spisil te soldadohetic yu'un te Hadad-ezer ajwalil yu'un Soba,

¹⁰la sticon bahel te Adoram te snich'an ta stojol te ajwalil David yu'un ya spatbe yo'tan soc ya ya'be bendición ta scaj te la ya'be guerra soc te la stsal te Hadad-ezer, como te Toi yac ya'bebel sba guerra soc te Hadad-ezer. Soc la sticombe tsobol ta chahp bintic ya xtuhun te pasbilic ta oro, plata soc bronce;

¹¹te ha nix la yac' te ajwalil David ta stojol Jehová soc te oro soc plata te la yich'be spisil te nacionetic yu'un Edom, Moab, te sts'umbal Amón, te filisteohetic soc te Amalec.

¹²Soc te Abisai te yal Sarvia la stsal cha'pic soc ho'bahc' (18,000) edometic ta Spamlej yu'un Ats'am.

¹³La yac' soldadohetic ta scanantayel te Edom. Spisil te edometic ochic ta a'batinel yu'un David. Te Jehová la yac' ta tsalaw ta bayuc banti baht te David.

¹⁴Te David la scuentahin spisil Israel, toj la schahpan spisil te pueblo.

¹⁵Te jtsobaw yu'un te soldadohetic, ha te Joab yal Sarvia; te Josafat snich'an Ahilud, ha secretario;

¹⁶te Sadoc snich'an Ahitob soc Ahimelec snich'an Abiatar, ha sacerdotehetic; te Savsa, ha jts'ihbajel;

¹⁷te Benaía snich'an Joiada, ha scuentahinej te cereteohetic soc te peleteohetic. Te snich'nab David ha príncipaletic te la scoltayic ta a'tel te ajwalil.