Read Tzeltal 1 Crónicas 19 Bible Online

1 Crónicas 19 - Tzeltal bible

1 Crónicas 19

¹Ta patil a ini cham te Nahas ajwalil yu'un te sts'umbal Amón, ha hil ta sjelol ta ajwalil te snich'ane.

²Hich la yal te David: Ya ca'be yil sc'uxul co'tan te Hanún snich'an Nahas, como la ya'bon quil sc'uxul yo'tan te state, xchi. Hich te David la sticon bahel jal-c'opetic scuenta yu'un ya ya'beyic smuc'ul yo'tan te Hanún te bin ut'il cham te state. Pero c'alal c'ohtic te jal-c'opetic yu'un David ta sq'uinal te sts'umbal Amón ta stojol Hanún yu'un ya ya'beyic smuc'ul yo'tan,

³te príncipaletic yu'un te sts'umbal Amón hich la yalbeyic te Hanún: ¿Acuyoj bal te David la sticon tal j'ac'-muc'ul-o'taniletic yu'un yich'oj ta muc' te atate? ¿Ma bal ha'uc tal te a'batetic yu'un ta yocliyel, ta stsahtayel soc ta yilel te q'uinale? xchihic.

⁴Ha yu'un te Hanún la stsac te a'batetic yu'un David, la sloq'uesbe yisimic soc la set'ticlambeyic sc'u'ic ta ohlil c'alal ta scho yitic; hich la sticonlan bahel.

⁵C'alal halbot ya'iy David te bin c'oht ta pasel ta stojol te winiquetic, la sticon ta tahel, como bayel ayic ta q'uexlal. Te ajwalil la sticon ta halbeyel: Hilanic ta Jericó ha to c'alal ya xnahtub xan te awisimique, patil ya suhtex tal, xchi.

⁶C'alal la sna'ic te sts'umbal Amón te p'ajotic yu'un David, te Hanún soc te sts'umbal Amón la sticonic bahel lajunwinic yoxbahc' (1,000) talento[26] plata scuenta stojol ta majanel te carretahetic yu'un guerra soc jmoheletic ta cawu ta Mesopotamia, Siria, Maaca soc Soba.

⁷Hich la stojic chanpic (32,000) carretahetic soc te ajwalil yu'un Maaca soc te soldadohetic yu'un, te c'oht spas scampamentohic ta stojol Medeba. Soc te sts'umbal Amón loq'uic tal ta pueblohetic yu'unic, la stsob sbahic ta yaq'uel guerra.

⁸C'alal hich la ya'iy te David, la sticon te Joab soc spisil te soldadohetic te ay yipic ta yaq'uel guerra.

⁹Te sts'umbal Amón loq'uic tal ta ya'beyel guerra ta yochibal te pueblo yu'unic; yan te ajwaliletic te talemic, stuquel ayic ta aquiltic.

¹⁰C'alal la yil te Joab te ya x'a'bot guerra ta stojol sit soc ta spat, la stsa te mero lequil soldadohetic te ay yu'un Israel, yu'un ya ya'beyic guerra te siriahetique.

¹¹Te jayeb xan soldadohetic la ya'be hilel ta scuenta te Abisai te yihts'in, scuenta yu'un ya ya'beyic guerra te amonetique.

¹²Hich la yalbe: Teme c'ax hich yipic a te siriahetic te bin ut'il te ho'one, ha'at me ya xtal acoltayon; teme ha c'ax hich yipic a te amonetic te bin ut'il te ha'ate, ho'on ya xtal jcoltayat.

¹³Ac'a me yip awo'tan, ac'a fuersa yu'un te pueblo cu'untic soc yu'un te pueblohetic yu'un te Dios cu'untique. Te Jehová ac'a spas stuquel te bin ya sc'an yo'tane, xchi.

¹⁴Ha yu'un te Joab nohpoj bahel soc te soldadohetic yu'un ta ya'beyel guerra te siriahetic; pero ahnic loq'uel ta stojol.

¹⁵C'alal la yilic te sts'umbal Amón te loq'uiquix ta ahnel te siriahetic, ha nix hich loq'uic ta ahnel ta stojol te Abisai yihts'in Joab, ochic bahel ta pueblo. Ha yu'un te Joab suht bahel ta Jerusalén.

¹⁶C'alal la yilic te siriahetic te tsalbiliquix yu'un Israel, la sticonic jal-c'opetic ta iq'uel tal te siriahetic te ayic ta jehch muc'ul-ha' Éufrates. Ha capitán yu'unic te Sofac, ha jtsobaw yu'un te soldadohetic yu'un te Hadad-ezer.

¹⁷C'alal hich la ya'iy te David, la stsob spisil Israel, c'ax bahel ta Jordán, c'oht ta banti ay te siriahetic, la schahpan te soldadohetic yu'un ta stojolic ta ya'beyel guerra. Te David la schahpan te soldadohetic yu'un ta ya'beyel guerra te siriahetic, hich a'bot guerra yu'unic.

¹⁸Pero te siriahetic ahnic loq'uel ta stojol Israel. Te David la smil j'ohlil swaxaclajunbahc' (7,000) winiquetic te ya stijic carretahetic soc ho'pic (40,000) soldadohetic te behel ta yoquic. Soc la smil te Sofac te jtsobaw yu'un te soldadohetic yu'unique.

¹⁹C'alal la yilic te a'batetic yu'un te Hadad-ezer te tsalotiquix yu'un Israel, la schapic bin ut'il lamal q'uinal ya ya'iyic soc David, ha a'batetic c'ohtic yu'un. Te siriahetic mayuc bin ora la sc'an la scoltayic xan te sts'umbal Amón.