Read Tzeltal 1 Crónicas 20 Bible Online

1 Crónicas 20 - Tzeltal bible

1 Crónicas 20

¹Ta yorahil ya x'ach'ub ya'binal te'etic a, ha te yorahil ya xloq'uic ta guerra te ajwaliletic, te Joab la yic' bahel te soldadohetic, la sjimbe sq'uinalic te sts'umbal Amón, soc baht ta sjoytayel te Rabá; yan te David hil ta Jerusalén. Te Joab la ya'be guerra te Rabá, la sjin.

²Te David la sloq'ues te corona ay ta sjol te ajwalil yu'unic, la yil te jun talento[27] oro te yalal soc ay t'ujbil tonetic yich'oj; ha a'bot ta sjol te David. Soc c'ax bayel biluquetic la sloq'ues ta pueblo.

³Soc la sloq'ues tal ta pueblo te mach'atic tey ayic a, la yac'ticlan ta a'tel ta sierra, ta swuyojibal spat trigo, soc ta echej. Hich la spasbe spisil te pueblohetic yu'un te sts'umbal Amón. Patil suht bahel ta Jerusalén te David soc spisil te soldadohetic yu'une.

⁴Ta patil ini hahch guerra soc te filisteohetic ta Gezer. Te Sibecai te talem ta Husa la smil Sipai te sts'umbal te muc'ul nahtil winiquetic; hich tsalotic te filisteohetique.

⁵Hahch guerra yan buelta soc te filisteohetic. Te Elhanán snich'an Jair la smil te Lahmi te yermano Goliat te talem ta Gat, te ay slanza hich te bin ut'il ste'el jalabil.

⁶Hahch xan guerra ta Gat te banti ay mero nahtil winic, te ay wacwaqueb yalatac yoc soc wacwaqueb yalatac sc'ab, chaneb scha'winic (24) ta spisil; ha nix sts'umbal te muc'ul nahtil winiquetique.

⁷Ha la slaban te pueblo Israel, pero milot yu'un Jonatán snich'an Simea te yermano David.

⁸Ha'ic ini te sts'umbal muc'ul nahtil winiquetic ta Gat te milotic yu'un David soc te a'batetic yu'une.