Read Tzeltal 1 Crónicas 21 Bible Online

1 Crónicas 21 - Tzeltal bible

1 Crónicas 21

¹Te Satanás hahch ta scontrahinel te Israel, la stijbe yo'tan te David te ya yahtay te Israel.

²Ha yu'un te David hich la yalbe te Joab soc te príncipaletic yu'un te pueblo: Bahanic, ahtayahic te Israel c'alal Beerseba ha to ta Dan; a'bonic jna' jaytuhlic scuenta yu'un hich ya jna' a, xchi.

³La yal te Joab: ¡Jehová ac'a yac' p'ohluc ho'winic (100) xan buelta a te bin ut'il ay ta ora ini, ajwalilat cu'un! ¿Ma bal ha'uc spisilic a'batetic yu'un te cajwal? ¿Bin yu'un te hich ya sc'an ya spas te cajwal, te ya ya'be sta smul te Israel? xchi.

⁴Pero ha tulan xan c'oht a te smandar te ajwalil yu'un te bin la yal te Joab. Hich loc' bahel te Joab, behen ta spisil sq'uinal Israel; patil suht tal ta Jerusalén, la ya'be David te yahtalul te pueblo:

⁵loc' ta spisil Israel j'ohlil swaxaclajuneb shucwinic ta pic (1,100,000) winiquetic te ya sna'ic yaq'uel guerra, soc ta Judá ay waxaclajuneb yoxwinic ta pic soc ho'lajunbahc' (470,000) ta tuhl.

⁶Pero ma ba la yich' ahtayel te sts'umbal Leví soc Benjamín, como te Joab la sp'ajbe te smandar te ajwalile.

⁷Ma lecuc yo'tan Dios yu'un, la ya'be castigo te Israel.

⁸Ha yu'un te David hich la yalbe te Dios: Muc' te jmul la jta yu'un te hich la jpas. Awocoluc, loq'uesbeya te smul te awa'bate, como ta scaj te ma la jna' q'uinal te hich la jpase, xchi.

⁹Te Jehová hich la yalbe te Gad te jalwanej yu'un ta stojol David:

¹⁰Bahan, halbeya te David: Hich ya yal te Jehová: oxeb bin ya calbat; ya me atsa junuc ta yoxebal te bin ya jpasbat, xchi.

¹¹Tal te Gad, hich la yalbe te David: Hich ya yal te Jehová: Tsaha junuc ta yoxebal ini:

¹²oxeb ha'bil wi'nal, oxeb u yac awich' tsalel ta espada yu'un te acontratac, u oxeb c'ahc'al te espada yu'un Jehová, ha tulan chamel ta q'uinal, ha te ch'ul a'bat yu'un Jehová ya xlajinwan ta spisil te sq'uinal Israel, xchi. Nopa awa'iy bin ya calbe te mach'a la sticonon tal, xchi te Gad.

¹³Ha yu'un te David la yalbe te Gad: Bayel ayon ta mel-o'tan. C'ax hich lec ya ca'iy a te ya x'ochon ta sc'ab Jehová, como c'ax muc' te c'uxultayel yu'un, te bin ut'il ya x'ochon ta sc'ab winiquetic, xchi.

¹⁴Ha yu'un te Jehová la sticon tal tulan chamel ta stojol Israel, lajic waxacpic soc ho'lajunbahc' (70,000) ta tuhl ta Israel.

¹⁵Te Jehová la sticon ch'ul a'bat ta sjinel te Jerusalén; pero te c'alal ya xhahchix ta sjinel a, la yil te Jehová, la smel yo'tan yu'un te ya yich' jinel, ha yu'un la yalbe te ch'ul a'bat te hahchix ta sjinel: ¡Tic'uquix a, comahix te ac'abe! xchi. Te ch'ul a'bat yu'un Jehová tey teq'uel a ta nopol yawil swuyojibal trigo yu'un te Ornán te jebuseo-winique.

¹⁶Te David la yil te ch'ul a'bat yu'un Jehová te ay ta po'tal ch'ulchan, stsacoj espada ta sc'ab, shachoj ta stojol Jerusalén. Ha yu'un te David soc te mamaletic la snijan sbahic c'alal ta lum, slapojic ch'ixal pac' a.

¹⁷Te David hich la yalbe te Dios: ¿Ma bal ho'ucon te la jcac' ta ahtayel te pueblohe? Ho'on jtahoj jmul, chopol te bin la jpas; pero te tuminchijetic ini ¿bin spasojic? Jehová Dios cu'un, ac'a c'ohtuc ta jtojol te castigo soc ta stojol te mach'atic ay yu'un te jtate, manchuc ya xtal te tulan chamel ta stojol te pueblo awu'une, xchi.

¹⁸Te ch'ul a'bat yu'un te Jehová la yalbe mandar te Gad te ha ya yalbe te David te ya me xmo bahel soc ya spas scajtajib smahtan Jehová ta yawil swuyojibal trigo yu'un te Ornán, te jebuseo-winique.

¹⁹Hich te David mo bahel hich te bin ut'il halbot yu'un Gad ta scuenta sbihil te Jehová.

²⁰Te Ornán yac ta swuyel spat strigo a, la sut sba, la yil te ch'ul a'bat; te chantuhl snich'nab te sjoquinej baht snac' sbahic.

²¹C'alal nohpoj tal David ta banti ay te Ornán, la yil te David, hich loc' tal ta swuyojibal spat strigo, la snijan sba ta lum ta stojol David.

²²Te David hich la yalbe te Ornán: A'bon te yawil swuyojibal trigo awu'un scuenta yu'un ya jpasbe scajtajib smahtan te Jehová. Chombon hich te bin ut'il stojol, scuenta yu'un ya xquehchaj te tulan chamel ta stojol te pueblo, xchi.

²³Te Ornán la sjac'be te David: Ich'a, pasa te bin lec ya ya'iy te ajwalil cu'un. Ho'on ya ca'bat te torohetic scuenta scohtol chic'bil mahtanil, te ste'el swuyojibal spat trigo te ya xtuhun ta si', soc te trigo scuenta mahtanil harina. Ya ca'bat spisil, xchi.

²⁴Pero te ajwalil David la yalbe te Ornán: Ma'uc, ts'acal me ya jtoj, como ma ba ya ca'be Jehová te bin ay awu'un, soc ma ba ya ca'be scohtol chic'bil mahtanil te mayuc bin la jtoj a, xchi.

²⁵Hich te David la stojbe te Ornán lajunwinic scha'bahc' (600) ta sehp oro yu'un te swuyojibal spat strigo.

²⁶Tey la spas a te scajtajib smahtan Jehová te David te banti la ya'be scohtol chic'bil mahtaniletic soc mahtaniletic scuenta lamal q'uinal. La sc'opon te Jehová, a'iybot sc'op yu'un soc la sticon tal c'ahc' c'alal ta ch'ulchan te c'oht ta sba te scajtajib scohtol chic'bil mahtanil.

²⁷Ha yu'un te Jehová la sc'opon te ch'ul a'bat, hich la yotses ta sna te espada yu'une.

²⁸C'alal la yil te David te a'iybot sc'op yu'un Jehová ta swuyojibal spat trigo yu'un te Ornán te jebuseo-winic, hich la yac' milbil mahtaniletic tey a.

²⁹Como te nahilpac' templo yu'un Jehová te spasoj Moisés ta jochol taquin q'uinal, soc te scajtajib ta chiq'uel mahtanil, ayic ta toyol awilal ta Gabaón a.

³⁰Pero te David ma ba hu' yu'un te ya xbaht sjoc'obe Dios tey a como bayel xiwel ta yo'tan ta scaj te espada yu'un te ch'ul a'bat yu'un Jehová.