Read Tzeltal 1 Crónicas 23 Bible Online

1 Crónicas 23 - Tzeltal bible

1 Crónicas 23

¹C'alal mamalix a te David, la yotses ta ajwalil yu'un Israel te Salomón te snich'ane.

²Soc la stsob tal spisil te príncipaletic yu'un Israel, te sacerdotehetic soc te levitahetique.

³La yich'ic ahtayel te levitahetic te ayix lajuneb scha'winic (30) ya'bilalic. Te jaytuhlic te la yich'ic ahtayel, ay chanpic soc ho'lajunbahc' (38,000) ta tuhl.

⁴Ay oxpic (24,000) te la scuentahin te a'tel ta sna Jehová, ho'lajunbahc' (6,000) gobernadoretic soc juecetic,

⁵lajunbahc' (4,000) jcanan-ti'nahiletic, soc lajunbahc' (4,000) yu'un ya yalbeyic yutsilal te Jehová soc te a'tejibaletic te yich'ojic pasel yu'un David scuenta sc'ayojtaybeyel yutsilal te Diose.

⁶Te David la spucticlan ta chahpalchahp, ha chican te jayeb snich'nab te Leví: ha te Gersón, Coat soc Merari.

⁷Te snich'nab Gersón: ha Laadán soc Simei.

⁸Te snich'nab Laadán, oxtuhlic: ha Jehiel te banquilal, Zetam soc Joel.

⁹Te snich'nab Simei, oxtuhlic: ha Selomit, Haziel soc Harán. Ha'ic te jtsobawetic yu'un chahpalchahp te sts'umbal Laadán.

¹⁰Te snich'nab Simei, chantuhlic: ha Jahat, Zina, Jeús soc Bería. Ha'ic te chantuhl snich'nab Samei.

¹¹Te banquilal ha te Jahat, te schebal, Zina; yan te Jeús soc Bería mayuc bayel snich'nabic, hich jchahp nax c'ohtic.

¹²Te snich'nab Coat, chantuhlic: ha te Amram, Izhar, Hebrón soc Uziel.

¹³Te snich'nab Amram, ha te Aarón soc Moisés. Te Aarón soc te sts'umbal parte ac'otic yu'un ya yaq'uic te mero ch'ultesbil mahtaniletic, ya schiq'uic pom ta stojol Jehová, ya x'a'tejic ta stojol soc ya yaq'uic bendición ta scuenta sbihil Jehová ta spisil ora.

¹⁴Te snich'nab Moisés te winic yu'un Dios la yich'ic ahtayel soc te sts'umbal Leví.

¹⁵Te snich'nab Moisés: ha te Gersón soc Eliezer.

¹⁶Te snich'nab Gersón: ha banquilal te Sebuel.

¹⁷Te snich'an Eliezer: ha banquilal te Rehabías. Mayuc yan snich'nab te Eliezer, yan te snich'nab Rehabías bayelic stuquelic.

¹⁸Te snich'an Izhar: ha banquilal te Selomit.

¹⁹Te snich'nab Hebrón: ha banquilal te Jeraías, schebal te Amarías, yoxebal te Jahaziel, soc schanebal te Jecamán.

²⁰Te snich'nab Uziel: ha banquilal te Micaías, soc schebal te Isías.

²¹Te snich'nab Merari: ha te Mahli soc Musi. Te snich'nab Mahli: ha te Eleazar soc Cis.

²²Te Eleazar mayuc squerem-nich'nab, ha nax ach'ixetic te ic'otic yu'un te snich'nab Cis te smohlol sts'ahquilic.

²³Te snich'nab Musi, oxtuhlic: ha Mahli, Edar soc Jeremot.

²⁴Ha'ic te sts'umbal Leví ta jujuchahp sna sme'static, ha te jtsobawetic yu'un jujuchahp snahic, hich te bin ut'il la yich'ic ahtayel ta sbihilic, te ayiquix jtahb (20) ya'bilalic. Ha'ic te a'tejic ta sna Jehová.

²⁵Como yalojix te David: Te Jehová, te Dios yu'un Israel, yac'oj lamal q'uinal ta stojol Israel te pueblo yu'un, soc ha ya xnahin ta Jerusalén sbahtel q'uinal,

²⁶ha yu'un te levitahetic ma ba ya yich'iquix bahel te Nahilpac' Templo soc te bintic ya xtuhun yu'un a'tel tey a, xchi sc'oblal.

²⁷Hich la yich' ahtayel te sts'umbal Leví te ayiquix ta jtahb (20) ya'bilalic, hich te bin ut'il te slajibal bin la yal te David.

²⁸Ha cuentahimbilic yu'un te sts'umbal Aarón ta a'tel ta sna Jehová, ta amaq'uetic, ta cuartohetic, ta slecubtesbeyel sc'oblal spisil te bintic ch'uhltesbilic, soc te yantic a'teliletic ya yich' pasel ta sna Dios.

²⁹Soc ay ta scuentahic te pan ya yich' aq'uel ta stojol Dios; te harina scuenta mahtanil, te jayal pan te ma ba yich'oj levadura, te bin pasbil ta sartén soc te bin woch'obtesbil, soc spisil te bintic ya yich' p'isel soc ahtayel.

³⁰Soc tey ayic ta jujun sab soc ta jujun tibiltic ta yalbeyel wocol soc ta sc'ayojtaybeyel yutsilal te Jehová;

³¹soc yaq'uel spisil te scohtol chic'bil mahtaniletic ta stojol Jehová ta sc'ahc'alel cux-o'tan, ta yach'il u, soc yantic q'uinetic te bayel sc'oblalic; ha chican jayebic soc te bintic ya spasic ta spisil ora ta stojol Jehová.

³²Soc ay ta scuentahic scanantayel te Nahilpac' Templo yu'un tahojibal soc te ch'ul awilal, ta scuenta smandar te snich'nab Aarón te yermanotac ta spasel te a'tel ta sna Jehová.