Read Tzeltal 1 Crónicas 24 Bible Online

1 Crónicas 24 - Tzeltal bible

1 Crónicas 24

¹Te sts'umbal Aarón ha nix hich la yich'ic puquel ta jujuchahp. Te snich'nab Aarón: ha te Nadab, Abiú, Eleazar soc Itamar.

²Te bin ut'il ha nahil lajic te Nadab soc Abiú, patil cham te static, mayuc hil snich'nabic; ha yu'un te Eleazar soc te Itamar, hilic ta sacerdotehil.

³Te David coltayot yu'un Sadoc sts'umbal Eleazar, soc te Ahimelec sts'umbal Itamar ta spuquel ta jujuchahp bin ut'il ya sjel sbahic ta spasel te ya'telique.

⁴Te sts'umbal Eleazar, te bin ut'il c'ax hich ay príncipaletic yu'un te bin ut'il yu'un Itamar, hich la spucticlanic: waclajuntuhl (16) jtsobawetic yu'un sna sme'static ta scuenta te sts'umbal Eleazar, soc waxactuhl jtsobawetic yu'un sna sme'static ta scuenta sts'umbal Itamar.

⁵La spucticlanic ta scuenta spasel seña ta na'el, como ta sts'umbal Eleazar soc ta sts'umbal Itamar ay príncipaletic yu'un te ch'ul awilal soc ay príncipaletic te sna Dios.

⁶Te secretario Semaías snich'an Natanael, sts'umbal Leví, la sts'ihbabe sbihilic ta stojol te ajwalil, te príncipaletic, te sacerdote Sadoc, te Ahimelec snich'an Abiatar soc te jtsobawetic yu'un te sna sme'static te sacerdotehetic soc te levitahetique. La yich' tsahel jchahp sna Eleazar soc jchahp sna Itamar.

⁷Te primero te loc' ta scuenta seña ta na'el, ha te Joiarib, schebal Jedaías,

⁸yoxebal Harim, schanebal Seorim,

⁹yo'ebal Malquías, swaquebal Mijamín,

¹⁰shuquebal Cos, swaxaquebal Abías,

¹¹sbalunebal Jesúa, slajunebal Secanías,

¹²sbuhluchebal (11) Eliasib, slahchayebal (12) Jaquim,

¹³yoxlajunebal (13) Hupa, schanlajunebal (14) Jesebeab,

¹⁴yo'lajunebal (15) Bilga, swaclajunebal (16) Imer,

¹⁵shuclajunebal (17) Hezir, swaxaclajunebal (18) Afses,

¹⁶sbalunlajunebal (19) Petaías, jtahb (20) Hezequiel,

¹⁷jun scha'winic (21) Jaquín, cheb scha'winic (22) Gamul,

¹⁸oxeb scha'winic (23) Delaía, chaneb scha'winic (24) Maazías.

¹⁹Hich la yich'ic chahpanel yu'un te ya'telic, scuenta yu'un ya x'ochic ta sna Jehová, hich te bin ut'il halbotic ta mandar yu'un Aarón te static, te hich halbot ta mandar yu'un Jehová, te Dios yu'un Israel.

²⁰Ha'ic ini te sts'umbal levitahetic te hilic: ha te Subael, sts'umbal Amram; ta snich'nab Subael: Jehedías.

²¹Ta snich'nab Rehabías: ha Isías, te jtsobaw.

²²Ta snich'nab Izhar: ha Selomot; ta snich'nab Selomot: ha Jahat.

²³Ta sts'umbal Hebrón: ha banquilal te Jeraías, schebal Amarías, yoxebal Jahaziel, soc schanebal Jecamán.

²⁴Te snich'an Uziel: ha Micaía; te snich'an Micaía: ha Samir.

²⁵Te yermano Micaía: ha Isías; te snich'an Isías: ha Zacarías.

²⁶Te snich'nab Merari: ha Mahli soc Musi; te snich'an Jaazías: ha Beno.

²⁷Te snich'nab Merari ta scuenta te Jaazías: ha Beno, Soham, Zacur soc Ibrí.

²⁸Te snich'nab ta scuenta Mahli: ha Eleazar, te mayuc snich'nab.

²⁹Te snich'an Cis: ha Jerameel.

³⁰Te snich'nab Musi: ha Mahli, Edar soc Jerimot. Ha'ic te sts'umbal levitahetic ta chahpalchahp sna sme'static.

³¹Ha nix hich la spasic seña ta na'el, hich te bin ut'il la spas te yermanotac, ha te sts'umbal Aarón, ta stojol te ajwalil David, Sadoc, Ahimelec, soc te jtsobawetic yu'un sna sme'static te sacerdotehetic soc te levitahetic. Te mach'atic yu'un te banquilal pajal ich'bilic ta cuenta soc te mach'atic yu'un te ihts'inale.