Read Tzeltal 1 Crónicas 27 Bible Online

1 Crónicas 27 - Tzeltal bible

1 Crónicas 27

¹Hich ay te príncipaletic yu'un te snich'nab Israel, ha jtsobawetic yu'un jujuchahp snahic, jtsobawetic yu'un lajlajunwinic yoxbahc' (1,000) soc ho'ho'winic (100), soc te mach'atic yac ta a'tel ta stojol te ajwalil ta spasel spisil bintic ya sc'an ta stojol jujuchahp soldadohetic te ya sjel sbahic ta jujun u ta sjunal ha'bil. Te jujuchahp soldadohetic ha oxoxpic (24,000) ta tuhl.

²Te jchahp soldadohetic ta scuenta shahchel u yu'un ha'bil, ha cuentahinotic yu'un te Jasobeam snich'an Zabdiel; ta jchahp yu'un ay oxpic (24,000) ta tuhl.

³Ha sts'umbal Fares, soc ha jtsobaw yu'un spisil te capitanetic yu'un te jujuchahp soldadohetic ta shahchel u.

⁴Te jchahp soldadohetic ta scuenta schebal u, ha cuentahinotic yu'un te Dodai te ahoa-winique. Te Miclot ha jtsobaw ta jchahp yu'un, te ay oxpic (24,000) ta tuhl.

⁵Te jchahp soldadohetic ta scuenta yoxebal u, ha cuentahinotic yu'un te Benaía snich'an muc'ul sacerdote Joiada; ay oxpic (24,000) ta tuhl ta jchahp yu'un.

⁶Ha te Benaía te ay yip yo'tan ta yohlil te lajuneb scha'winic (30) ta tuhl soc ha jtsobaw yu'unic. Te Amisabad te snich'an la scuentahin te jchahp yu'une.

⁷Te schanebal jtsobaw yu'un te schanebal u, ha Asael te yihts'in Joab; ha och ta sjelol te Zebadías te snich'an; ay oxpic (24,000) ta tuhl ta jchahp yu'un.

⁸Te yo'ebal jtsobaw yu'un te yo'ebal u, ha te Samhut te sts'umbal Izra; ay oxpic (24,000) ta tuhl ta jchahp yu'un.

⁹Te swaquebal jtsobaw yu'un te swaquebal u, ha te Ira snich'an Iques, te talem ta Tecoa; ay oxpic (24,000) ta tuhl ta jchahp yu'un.

¹⁰Te shuquebal jtsobaw yu'un te shuquebal u, ha te Heles te pelon-winic, te sts'umbal Efraín; ay oxpic (24,000) ta tuhl ta jchahp yu'un.

¹¹Te swaxaquebal jtsobaw yu'un te swaxaquebal u, ha te Sibecai te talem ta Husa, te sts'umbal Zera; ay oxpic (24,000) ta tuhl ta jchahp yu'un.

¹²Te sbalunebal jtsobaw yu'un te sbalunebal u, ha te Abiezer te talem ta Anatot, te sts'umbal Benjamín; ay oxpic (24,000) ta tuhl ta jchahp yu'un.

¹³Te slajunebal jtsobaw yu'un te slajunebal u, ha te Maharai te talem ta Netofa, te sts'umbal Zera; ay oxpic (24,000) ta tuhl ta jchahp yu'un.

¹⁴Te sbuluchebal (11) jtsobaw yu'un te sbuluchebal u, ha te Benaía te talem ta Piratón, te sts'umbal Efraín; ay oxpic (24,000) ta tuhl ta jchahp yu'un.

¹⁵Te slahchayebal (12) jtsobaw yu'un te slahchayebal u, ha te Heldai te talem ta Netofa, te sts'umbal Otoniel; ay oxpic (24,000) ta tuhl ta jchahp yu'un.

¹⁶Te jtsobawetic ta jujuchahp sts'umbal Israel, hich ayic: ta sts'umbal Rubén, ha te Eliezer snich'an Zicri; ta sts'umbal Simeón, ha te Sefatías snich'an Maaca;

¹⁷ta sts'umbal Leví, ha te Hasabías snich'an Kemuel; ta sts'umbal Aarón, ha te Sadoc;

¹⁸ta sts'umbal Judá, ha te Eliú, te sbanquil David; ta sts'umbal Isacar, ha te Omri snich'an Micael;

¹⁹ta sts'umbal Zabulón, ha te Ismaías snich'an Abdías; ta sts'umbal Neftalí, ha te Jerimot snich'an Azriel;

²⁰ta sts'umbal Efraín, ha te Oseas snich'an Azazías; ta j'ohlil sts'umbal Manasés, ha te Joel snich'an Pedaías;

²¹ta j'ohlil sts'umbal Manasés te ayic ta Galaad, ha te Iddo snich'an Zacarías; ta sts'umbal Benjamín, ha te Jaasiel snich'an Abner;

²²ta sts'umbal Dan, ha te Azareel snich'an Jeroham. Ha'ic te jtsobawetic ta chahpalchahp sts'umbal Israel.

²³Te David ma ba la yahtay te mach'atic ma to stahojic jtahb (20) ya'bilal, como te Jehová yaloj te ya yac' p'ohluc te Israel hich te bin ut'il eq'uetic ta ch'ulchan.

²⁴Te Joab te yal Sarvia hahch yahtay, pero ma ba hu' ta ahtayel yu'un, como ha tal castigo ta stojol Israel yu'un, ha scuentahil te ma ba ts'ihbabil hilel ta hun yu'un te ya'tel te ajwalil David.

²⁵Te Azmavet snich'an Adiel la scuentahin te c'ulejalil yu'un te ajwalil. Te Jonatán snich'an Uzías la scuentahin te c'ulejalil yu'un te q'uinaletic, pueblohetic, tut pueblohetic, soc te ilo-q'uinaletic.

²⁶Te Ezri snich'an Quelub scuentahinej te mach'atic ya x'a'tejic ta lumq'uinal.

²⁷Te Simei te talem ta Ramat scuentahinej te ts'usubiletic; te Zabdi te talem ta Sefam scuentahinej banti ya yich' q'uejel te ya'lel ts'usub.

²⁸Te Baal-hanán te talem ta Gedera scuentahinej te olivohetic soc te higuerahetic ta tsehletic; te Joás scuentahinej te sq'uejojibal aceite.

²⁹Te Sitrai te talem ta Sarón scuentahinej te wacaxetic te ayic ta Sarón; te Safat snich'an Adlai scuentahinej te wacaxetic te ayic ta spamlejetic.

³⁰Te Obil sts'umbal Ismael scuentahinej te camellohetic. Te Jehedías te talem ta Meronot scuentahinej te burrohetic.

³¹Te Jaziz te agareno-winic scuentahinej te tuminchijetic. Spisilic ini ha scuentahinejic te bintic ay yu'un te ajwalil David.

³²Te Jonatán stajun David, ha j'ac'-o'tanil, ya sna' stsahtayel sba soc ha jts'ihbajel. Te Jehiel snich'an Hacmoni la scuentahimbe snich'nab te ajwalil.

³³Ha nix hich te Ahitofel, ha j'ac'-o'tanil yu'un te ajwalil; soc te Husai te arquita-winic, ha te mach'a jun yo'tan sba soc te ajwalil.

³⁴Te Ahitofel, ha sjelol hilel te Joiada snich'an Benaía soc te Abiatar. Te Joab, ha jtsobaw yu'un spisil te soldadohetic yu'un te ajwalil.