Read Tzeltal 1 Crónicas 28 Bible Online

1 Crónicas 28 - Tzeltal bible

1 Crónicas 28

¹Te David la stsob ta Jerusalén spisil te príncipaletic yu'un Israel: ha te jtsobawetic yu'un jujuchahp sts'umbalic, te jtsobawetic yu'un chahpalchahp soldadohetic te ayic ta a'batinel yu'un te ajwalil, te jtsobawetic yu'un jujumil (1,000) soc ho'ho'winic (100), te jcuentahinwanejetic yu'un spisil sq'uinal soc te bintic ay yu'un te ajwalil soc te snich'nab, te mach'atic ay ya'telic, te mach'atic ay yipic soc te ay yip yo'tanic.

²La stehc'an sba te David, hich la yal: A'iybon awa'iyic jc'op, quermanotac soc te pueblohex cu'un. Ho'on jnopoj te ya jpas Na banti ya x'ayin te scaxahul te chapbil-c'op yu'un Jehová, scuenta scajtajib yoc te Dios cu'untique. Chapalix cu'un spisil yu'un ya yich' pasel.

³Pero hich la yalbon te Diose: Ma ha'ucat yac apas Na ta scuenta jbihil, como ha'at winicat yu'un guerra soc amaloj bayel ch'ich', xchi.

⁴Pero te Jehová te Dios yu'un Israel la stsahon ta yohlil te mach'atic ay yu'un te jtat scuenta yu'un ya yac'on ta ajwalil ta stojol Israel sbahtel q'uinal. Ha la stsa te sts'umbal Judá te ha jtsobaw ya xc'oht; ta sts'umbal Judá la stsa te mach'atic ay yu'un te jtat, soc ta yohlil te jbanquiltac la stsahon yu'un ya yac'on ta ajwalil ta stojol spisil Israel.

⁵Ta yohlil spisil te jnich'nab (como ya'beyejon bayel jnich'nab te Jehová), ha la stsa te jnich'an Salomón yu'un ya xhuhcaj ta huctajibal te banti ya scuentahin Israel te Jehová.

⁶Hich la yalbon: Te anich'an Salomón ha ya spasbon te Na soc te amaq'uetic cu'un, como tsahbilix cu'un te ha jnich'an ya xc'oht soc ho'on staton ya xc'ohon.

⁷Soc ho'on ya ca'be yich' yip te ya'tel ta ajwalil sbahtel q'uinal teme ya yac' fuersa te ya sc'ohtes ta pasel te mandariletic cu'un, hich te bin ut'il ta ora ini, xchi te Diose.

⁸Ha yu'un ta ora ini, ta stojol spisil Israel te pueblo yu'un Jehová, soc ta stojol Dios te yac ya'iybelotic, ch'uhunahic ta lec spisil te mandariletic yu'un Jehová te Dios cu'untic, scuenta yu'un yac awu'untayic te lequil q'uinal soc yac awa'beyic yich'ic ta patil te awal-anich'nabic ta sbahtel q'uinal.

⁹Soc ha'at, jnich'anat Salomón, na'a me te Dios yu'un te atate, ac'a aba ta a'batinel ta stojol ta spisil awo'tan soc ta sc'anojel awo'tan; como te Jehová ya yilbe yo'tanic spisilic soc ya sna' spisil te bintic ya snopic ta yo'tanic. Teme yac ale, yac ata ta lehel; yan teme yac awihquitay, ha ya sch'ayat hilel sbahtel q'uinal.

¹⁰Ilawil, stsahojat te Jehová yu'un yac apas Na scuenta ch'ul awilal yu'un. ¡Ayuc me yip awo'tan, pasa te a'tele! xchi.

¹¹Te David la ya'be Salomón te snich'an te plano yu'un slehchelul te Templo, te nahetic yu'un, sq'uejojibal biluquetic, cha'cajal nahetic, te tsahlaltsahl ta yutil, soc te jtsahl yu'un te yawil stahojibal perdón.

¹²Soc la ya'be te plano yu'un spisil te bintic snopoj yu'un te amaq'uetic yu'un te sna Jehová, spisil te tsahlaltsahl ta sjoyobal, te sq'uejojibal biluquetic yu'un te sna Dios soc te sq'uejojibal te bintic ac'bilic.

¹³Soc te bin snopoj yu'un te chahpalchahp sacerdotehetic soc te levitahetic yu'un spisil te a'tel ta sna Jehová soc spisil bintic ya xtuhun yu'un te a'tel ta sna Jehová.

¹⁴Soc la ya'be oro soc plata te hich yalal ya sc'an yu'un spisil bintic ya xtuhun yu'un te jujuchahp a'tel ta sna Dios:

¹⁵ha chican jayeb yalal oro soc plata te ya xtuhun yu'un te jujun scajtajib soc te yawil aceite yu'un c'ahc';

¹⁶chican te jayeb yalal oro ya xtuhun yu'un te jujun mesa banti ya xc'oht te pan ya yich' aq'uel ta stojol Dios, soc plata yu'un te mesahetic pasbilic ta plata;

¹⁷soc lequil oro yu'un te trinchehetic, muc'ul tazahetic soc te oxometic, chican jayeb yalal ya xtuhun yu'un te jujune; soc plata yu'un vasohetic, chican jayeb yalal ya xtuhun yu'un te jujune;

¹⁸soc te jayeb yalal lequil oro ya xtuhun yu'un te scajtajib ta chiq'uel pom soc yu'un te carreta yu'un te querubinetic pasbilic ta oro te slich'oj xiq'uic te ya smaquic a te scaxahul te chapbil-c'op yu'un Jehová.

¹⁹La yal te David: Spisil ini ts'ihbabil te bin la ya'bon jna' te Jehová, la ya'bon jna' spisil te a'tel te ay ta plano, xchi.

²⁰Te David la yalbe xan te Salomón te snich'ane: Ac'a fuersa soc ayuc me yip awo'tan, pasa te a'tele. Ma me xiwat, ma me xpehc'aj awo'tan, como te Jehová te Dios cu'un ya me sjoquinat. Ma ba ya yihquitayat soc ma ba ya spihtesat ha to c'alal ya xhu' ta pasel spisil te a'teletic te ya xtuhun ta sna Jehová.

²¹Hich ay te jujuchahp te sacerdotehetic soc levitahetic te ya spasic spisil te a'tel ta sna Dios; ya me sjoquinat ta spasel spisil te a'tele. Soc spisil te mach'atic hich yo'tanic soc te ay snopojibal yu'unic ta spasel spisil ta chahp a'tel, soc te príncipaletic soc spisil te pueblo ya me spasic spisil bintic yac awal ta mandar, xchi.