Read Tzeltal 1 Crónicas 29 Bible Online

1 Crónicas 29 - Tzeltal bible

1 Crónicas 29

¹Patil te ajwalil David hich la yalbe spisil te tsoblej: Ha nax te jnich'an Salomón te tsahbil yu'un te Diose; querem to, ma to ayuc lec snopojibal yu'un, yan te a'tele, mero muc', como te Na ma ha'uc yu'un winic, ha yu'un te Jehová Dios.

²Ta spisil quip la jchahpan te bintic ya xtuhun yu'un te sna te Dios cu'un: ha te oro yu'un te bin ya yich' pasel ta oro, plata yu'un te bin ya yich' pasel ta plata, bronce yu'un te bin ya yich' pasel ta bronce, hierro yu'un te bin ya yich' pasel ta hierro, soc te'etic yu'un te bin ya yich' pasel ta te', soc ónice, soc tonetic te ya yich' ch'ulel, te ay bayel sch'ahlel, bayel ta chahp t'ujbil tonetic, soc bayel mármol.

³Soc, te bin ut'il bayel sc'oblal ya ca'iy ta co'tan te sna te Dios cu'un, ay oro soc plata ta sq'uejojibal c'ulejalil cu'un te ya cac' yu'un te sna te Dios cu'une:

⁴ay j'ohlil swaxacbahc' (3,000) talento[31] oro talem ta Ofir, j'ohlil swaxaclajunbahc' (7,000) talento[32] ch'ulbil plata, scuenta yu'un ya yich' potsel a te spahc'ul te nahetic;

⁵oro yu'un te bin ya yich' pasel ta oro, soc plata yu'un te bin ya yich' pasel ta plata, soc spisil te bintic ya spasic te mach'atic ya sna'ic spasel. Ha yu'un ¿mach'a ya sc'an ya yac' mahtanil yo'tic ta sc'anojel yo'tan ta stojol Jehová? xchi.

⁶Ha yu'un te jtsobawetic yu'un te jujuchahp na, te príncipaletic yu'un te chahpalchahp sts'umbal Israel, te jtsobawetic yu'un jujumil (1,000) soc ta ho'ho'winic (100) soldadohetic, soc te mach'atic scuentahinejic te q'uinal yu'un te ajwalil, la yaq'uic mahtanil ta sc'anojel yo'tanic.

⁷La yaq'uic ta scuenta te a'tel yu'un te sna Dios j'ohlil yoxlajunbahc' (5,000) talento[33] oro soc jpic soc ho'bahc' (10,000) ta sehp oro, jpic soc ho'bahc' (10,000) talento[34] plata, cha'pic soc ho'bahc' (18,000) talento[35] bronce, soc j'ohlil yoxlajunpic (100,000) talento[36] hierro.

⁸Soc spisil te mach'atic ay t'ujbil tonetic yu'unic la yaq'uic ta sq'uejojibal c'ulejalil yu'un te sna Jehová ta sc'ab Jahiel, te sts'umbal Gersón.

⁹Tse'el yo'tanic te pueblo yu'un te la yaq'uic bayel mahtaniletic ta sc'anojel yo'tanic, como ta spisil yo'tanic la ya'beyic te Jehová; soc mero tse'el yo'tan te ajwalil David yu'un.

¹⁰Te David la yalbe yutsil sc'oblal te Jehová ta stojol spisil te pueblo, hich la yal: Bayel me awutsilal atuquel, Jehová, Diosat yu'un te jtatcotic Israel, ta shahchibal talel c'alal ta sbahtel q'uinal.

¹¹Ha'at, Jehová, t'ujbilat, ay awu'el, ay awutsilal, yac awa'iy tsalaw, ich'bilat ta muc'; como spisil bintic ay ta ch'ulchan soc ta bahlumilal, ha'at awu'un. Ha'at awu'un, Jehová, te pasaw ta mandar, soc ha'at toyolat yu'un spisil.

¹²Tey ya xtal ta atojol a te c'ulejalil soc te utsilal, ha'at yac acuentahin spisil. Ay ta ac'ab te awip soc awu'el, soc ay ta acuenta stoybeyel sc'oblal soc ya'beyel yip spisilic.

¹³Yo'tic, Dios cu'untic, ya calcotic wocol ta atojol soc ya calbecotic yutsil sc'oblal te abihil te ay yutsilal.

¹⁴Como ¿mach'ahon a soc mach'a a te pueblo cu'un, te ya xhu' cu'uncotic yaq'uel hich yipal mahtaniletic ta sc'anojel co'tancotic? Melel spisil ha'at awu'un, soc te bin la jquich'cotic ta ac'ab ya ca'batcotic.

¹⁵Como jyanlumotcotic soc jbehyomalotcotic ta atojol hich te bin ut'il spisil te jme'jtatcotique. Te jayeb c'ahc'al cuxulotic ta bahlumilal hich c'ohem te bin ut'il axinal te ma xhalaj.

¹⁶Jehová, Diosat cu'uncotic, spisil te hich yipal te la jchahpancotic yu'un spasel te Na ta scuenta ach'ul bihil, talem ta ac'ab soc ha'at awu'un spisil.

¹⁷Ya jna', Dios cu'un, te yac ana'ticlan o'taniletic soc te yac amulan te bin stojil. Ha scuentahil te ta scuenta stojil co'tan soc ta sc'anojel co'tan la jca'bat spisil ini, soc yo'tic tse'el co'tan la jquilix te pueblo awu'un te stsoboj sbahic ta ora ini, te la ya'bat soc yutsil yo'tanic.

¹⁸Jehová, Diosat yu'un Abraham, Isaac soc Israel te jtatcotic, ac'a te staleluc hich ay sc'anojel yo'tanic te pueblo awu'un, soc ac'a te junuc yo'tanic ta atojol.

¹⁹Soc ha nix hich te jnich'an Salomón a'beya stojil yo'tan scuenta yu'un ya sch'uhumbat te mandariletic, te testigo-c'op soc te jchahp mandariletic awu'un, te ya spas spisil soc te ya spasbat te Na te chahpambilix cu'un te bintic ya xtuhun yu'un, xchi.

²⁰Patil te David hich la yalbe spisil te pueblo: Halbeyahic yutsilal te Jehová te Dios awu'unic, xchi. Ha yu'un spisil te pueblo la yalbeyic yutsilal te Jehová te Dios yu'un te sme'static, la squejan sbahic ta stojol te Jehová soc ta stojol te ajwalil.

²¹Ta schebal c'ahc'al la ya'beyic milbil mahtaniletic soc scohtol chic'bil mahtaniletic te Jehová: ha j'ohlil yoxbahc' (1,000) ta coht torohetic, j'ohlil yoxbahc' (1,000) ta coht tat tuminchijetic, soc j'ohlil yoxbahc' (1,000) ta coht tuminchijetic, soc te malbil mahtaniletic soc bayel xan mahtaniletic yu'un spisil Israel.

²²Ta hich ora tse'el yo'tanic we' uch'ic ta stojol Jehová. Soc la scha'halic xan te ha ajwalil te Salomón snich'an David, la smalic ta aceite ta stojol Jehová scuenta ajwalil ya xc'oht, soc la smalic ta aceite te Sadoc scuenta sacerdote.

²³Hich huhcaj te Salomón ta ajwalil ta huctajibal yu'un Jehová, ta sjelol te David te state. Lec c'oht yu'un, soc ch'uhumbot smandar yu'un spisil Israel.

²⁴Spisil te príncipaletic soc te mach'atic ay yipic, soc spisil te snich'nab te ajwalil David la yich'ic ta cuenta te ajwalil Salomón.

²⁵Te Jehová la smuc'ubtesbe sc'oblal te Salomón ta stojol spisil Israel, soc c'ax hich la ya'be yutsilal a te ya'tel ta ajwalil te bin ut'il te yantic ajwaliletic ta nahil ta Israel.

²⁶Hich c'ax ta ajwalil te David snich'an Isaí ta stojol spisil Israel.

²⁷Cha'winic (40) ha'bil ay ta ajwalil ta stojol Israel; huqueb ha'bil ta Hebrón, soc oxlajuneb scha'winic (33) ha'bil ta Jerusalén.

²⁸Mero mamalix a cham, bayel sc'ulejal soc yutsilal. Ha la sjelolin ta ajwalil te Salomón te snich'ane.

²⁹Te bintic la spasticlan ta shahchibal c'alal ta slajibal te ajwalil David, ts'ihbabil hilel ta hunetic yu'un te jalwanejetic Samuel, Natán soc Gad.

³⁰Tey ay spisil sc'oblal a te ya'tel ta ajwalil, te yip ya'tel soc te bintic c'oht ta pasel ta stojol, ta stojol Israel soc ta stojol spisil te ajwaliletic ta yantic q'uinaletic tey a.