Read Tzeltal 1 Crónicas 5 Bible Online

1 Crónicas 5 - Tzeltal bible

1 Crónicas 5

¹Te Rubén ha sba-nich'an Israel. Pero ta scaj te la sbohlobtesbe sc'oblal swayib stat, hich ch'ay te bin scuenta ba-alalil, ha a'bot ta scuenta te snich'nab José snich'an Israel, hich ma ba ts'ihbabil hilel sbihil scuenta ba-alalil.

²Ha toyol c'oht te Judá yu'un te yermanotac, ha príncipal c'oht ta stojolic, pero te bin scuenta te ba-alalil c'oht ta scuenta te José.

³Te snich'nab Rubén te sba-nich'an Israel ha te Hanoc, Falú, Hezrón soc Carmi.

⁴Te cajalcaj sts'umbal Joel: ha te Semaías, Gog, Simei,

⁵Micaía, Reaía, Baal

⁶soc Beera, ha te príncipal yu'un te rubenetic te baht ta chuquel yu'un te Tiglat-pileser ajwalil yu'un Asiria.

⁷Te yermanotac te Beera, hich te bin ut'il ts'ihbabil hilel sbihilic te sts'umbalic: ha te Jeiel, te príncipal yu'unic, te Zacarías,

⁸soc te Bela snich'an Asaz, snich'an Sema, snich'an Joel; nahinic ta Aroer c'alal ta Nebo soc ta Baal-meón.

⁹Soc nahinic ta stojol banti ya xloc' tal c'ahc'al c'alal ta yochibal te jochol taquin q'uinal, c'alal ta muc'ul-ha' Éufrates, como bayel p'ohlem te schansbahlam ta sq'uinal Galaad.

¹⁰Ta yorahil te Saúl la ya'beyic guerra soc te agarenohetic; la stsalic soc nahinic ta snahilpaq'uic ta spisil q'uinal ta stojol banti ya xloc' tal c'ahc'al yu'un Galaad.

¹¹Te sts'umbal Gad nahinic ta stojol te rubenetic ta sq'uinal Basán c'alal ta Salca.

¹²Te Joel ha jtsobaw ta Basán; te schebal ha Safán, patil Jaanai, slajibal Safat.

¹³Te yermanotac ta jujuchahp sna sme'static ha te Micael, Mesulam, Seba, Jorai, Jacán, Zía soc Heber; huctuhlic ta spisil.

¹⁴Te cajalcaj sts'umbal Abihail: Huri, Jaroa, Galaad, Micael, Jesisai, Jahdo, Buz.

¹⁵Te Ahí snich'an Abdiel, snich'an Guni, ha príncipal yu'un te sna sme'static.

¹⁶Nahinic ta Galaad, Basán soc ta tut pueblohetic yu'unic, soc spisil te aquiltic yu'un Sarón ha to c'alal ta sti'il.

¹⁷Ta spisilic ini ts'ihbabil hilel te sbihilic te sts'umbalic ta yorahil Jotam ajwalil yu'un Judá, soc ta yorahil Jeroboam ajwalil yu'un Israel.

¹⁸Te sts'umbal Rubén, Gad soc te j'ohlil sts'umbal Manasés, ha winiquetic te ay yipic, te chapalic ta mahquilal soc espada, ya sna'ic yaq'uel t'ihmalte', soc p'ijubenic ta guerra. Ay ho'pic soc waxaclajunwinic slahchaybahc' (44,760) winiquetic te ya yaq'uic guerra.

¹⁹La ya'beyic guerra te agarenohetic, te Jetur, Nafis soc Nodab.

²⁰Coltayotic yu'un Dios ta ya'beyel guerra, hich och ta sc'abic spisil te agarenohetic soc te mach'atic sjoquinejic, como tulan la yalbeyic wocol te Dios ta yorahil te guerra, hich coltayotic yu'un, como ha smuc'ulinej yo'tanic.

²¹La yic'beyic schansbahlamic, wacpic soc ho'bahc' (50,000) camellohetic, bulucheb scha'winic ta pic soc ho'bahc' (250,000) tuminchijetic, ho'bahc' (2,000) burrohetic, soc j'ohlil yoxlajunpic (100,000) ants-winiquetic.

²²Bayel lajic, como ha yu'un Dios te guerra. Nahinic ta sq'uinalic ha to c'alal ic'otic bahel ta chuquel.

²³Te j'ohlil sts'umbal Manasés mero bayelic, nahinic ta q'uinal c'alal Basán ha to ta Baal-hermón, Senir soc ta wits Hermón.

²⁴Ha ini te jtsobawetic yu'un te jujuchahp sna sme'static: Efer, Isi, Eliel, Azriel, Jeremías, Hodavías soc Jahdiel, winiquetic te ay yipic, te muc' sc'oblalic soc jtsobawetic yu'un jujuchahp sna sme'static.

²⁵Pero la stoy sbahic ta stojol te Dios yu'un te sme'static, la yac' sbahic ta antsinel ta st'unel te diosetic yu'un te pueblohetic yu'un te q'uinal te loq'uesotic yu'un Jehová ta stojolic.

²⁶Ha scuentahil te Dios la stijbe yo'tan te Pul, ha te Tiglat-pileser ajwalil yu'un Asiria, te la yic' bahel te sts'umbal Rubén, Gad soc te j'ohlil sts'umbal Manasés, la yac'ticlan ta Halah, Habor, Hara soc ta sti'il muc'ul-ha' Gozán, tey ayic c'alal ora a.