Read Tzeltal 2 Crónicas 1 Bible Online

2 Crónicas 1 - Tzeltal bible

2 Crónicas 1

¹Te Salomón snich'an David la sta yip te ya'tel ta ajwalil, ha joquimbil yu'un Jehová te Dios yu'un soc mero muc' sc'oblal c'oht yu'un.

²Te Salomón la stsob spisil Israel: ha te jtsobawetic yu'un jujumil (1,000) soc ta ho'ho'winic (100), te juecetic soc spisil te príncipaletic yu'un spisil Israel, soc te jtsobawetic yu'un te jujuchahp na.

³Te Salomón soc spisil te pueblo bahtic ta toyol awilal ta Gabaón, como tey ay a te Nahilpac' Templo yu'un tahojibal te spasoj Moisés te ya'bat Jehová te c'alal ay ta jochol taquin q'uinal.

⁴Pero te David yich'ojix loq'uel tal a ta Quiriat-jearim te yawil chapbil-c'op yu'un Dios, la yac' ta lugar te chahpambil yu'une, como spasojix nahilpac' a ta Jerusalén.

⁵Pero te scajtajib ta chiq'uel mahtanil te pasbil ta bronce te spasoj Bezaleel snich'an Uri, snich'an Hur, tey hilem a ta Gabaón ta stojol te nahilpac' templo yu'un Jehová. Tey bahtic a te Salomón soc te pueblo ta sjoc'obeyel te Diose.

⁶Te Salomón tey mo bahel a ta stojol Jehová, ta scajtajib ta chiq'uel mahtanil te pasbil ta bronce te ay ta Nahilpac' Templo yu'un tahojibal, la ya'be j'ohlil yoxbahc' (1,000) ta coht chic'bil mahtaniletic tey a.

⁷Ta ahc'abal chicnaj Dios ta stojol Salomón, hich halbot yu'un: C'ambon te bin ya sc'an awo'tan te ya ca'bate, xchi.

⁸Te Salomón la sjac'be sc'op te Diose: Te ha'at bayel la ac'uxultay te jtat David, soc la awac'on ta sjelol ta ajwalil.

⁹Ha yu'un, Jehová Dios, c'ohtesa ta pasel te bin la awalbe te jtat David; como ha'at awac'ojon ta ajwalil ta stojol jun pueblo te hich yipal te bin ut'il ts'u'lum ta q'uinal.

¹⁰Ha yu'un a'bon sp'ijil co'tan soc bin ay ta na'el, scuenta yu'un ya xhu' ya jcuentahin ta lec te pueblo ini; como ¿mach'a ya xhu' yu'un ya scuentahin te pueblo awu'un te c'ax muc'? xchi.

¹¹Te Dios hich la sjac'be te Salomón: Te bin ut'il hich la sc'an awo'tan, te ma ba la ac'an ac'ulejal, bayel biluquetic o awutsilal, o te yacuc xlajic te acontratac, o te nahtuc acuxlejal, pero la ac'an sp'ijil awo'tan soc bintic ay ta na'el scuenta yu'un yac acuentahin te pueblo cu'un te la jcac'at ta ajwalil yu'une,

¹²ha yu'un ya x'a'botat sp'ijil awo'tan soc bintic ay ta na'el; soc ya ca'bat ac'ulejal, abiluc soc awutsilal, te mayuc banti hich la stahic yantic ajwaliletic te nahil awu'un soc mayuc banti hich ya x'a'bot ajwaliletic ta patil bahel awu'un, xchi.

¹³Te Salomón loc' bahel ta toyol awilal ta Gabaón, ta stojol te Nahilpac' Templo yu'un tahojibal, suht bahel ta Jerusalén, la scuentahin te Israel.

¹⁴Te Salomón la stsob carretahetic soc jmoheletic ta cawu. Ay j'ohlil schanbahc' (1,400) carretahetic soc j'ohlil scha'pic (12,000) jmoheletic ta cawu. Spisil la yac'ticlan ta pueblohetic yu'un te carretahetic soc ta banti ay te ajwalil ta Jerusalén.

¹⁵Te ajwalil la stsob ta Jerusalén plata soc oro hich te bin ut'il tonetic, soc cedro hich te bin ut'il higuerahetic ta tsehletic.

¹⁶Te jmambajeletic yu'un te ajwalil la smanic cawuhetic yu'un Salomón ta sq'uinal Egipto.

¹⁷La smanic jun carreta ta Egipto ta j'ohlil scha'bahc' (600) ta sehp plata, soc lajuneb swaxacwinic (150) ta sehp plata stojol jcoht cawu. Soc te yantic ajwaliletic yu'un te heteohetic soc yu'un Siria la smambeyic.