Read Tzeltal 2 Crónicas 10 Bible Online

2 Crónicas 10 - Tzeltal bible

2 Crónicas 10

¹Te Roboam baht ta Siquem, como tey stsoboj sbahic a spisil Israel yu'un ya yotsesic ta ajwalil.

²C'alal hich la ya'iy te Jeroboam snich'an Nabat, te ay ta Egipto te banti bahem ta ahnel ta scaj te ajwalil Salomón, suht tal ta Egipto,

³como te israeletic la sticonic ta iq'uel tal. Hich tal te Jeroboam soc spisil Israel, la sc'oponic te Roboam, hich la yalbeyic:

⁴Te atat la yac' jcuchcotic al ihcatsil; pehc'ana te tulan a'batinel soc te yalal te ihcatsil te la yac' jcuchcotic te atate, hich ya cac' jbahcotic ta a'batinel awu'un, xchihic.

⁵La sjac' te Roboam: Suhtanic tal ta jtojol ta oxeb c'ahc'al, xchi. Hich bahtic te ants-winiquetique.

⁶Ha yu'un te ajwalil Roboam la sjoc'obe te mamaletic te sjoquinejic Salomón te stat te c'alal cuxul to a, hich la sjoc'obe: ¿Bin yac awalic te ha'exe, bin ya sc'an ya jsutbe a te pueblo ini? xchi.

⁷La yalic: Teme lec bin yac apasbe, teme lec bin yac awalbe, stalel ya yac' sbahic ta a'batinel awu'un, xchihic.

⁸Pero ma ba la yich'be ta cuenta te bin halbot yu'un te mamaletic, baht sjoc'obe te jcolel winiquetic te pajal scolelic soc, te ayic ta a'batinel yu'un.

⁹Hich la sjoc'obe: ¿Bin yac awalbonic yu'un te ya jsuhtbeyic sc'op te pueblo ini, te hich la yalbonic: Pehc'ana yalal te ihcatsil te la ya'botcotic jcuchcotic te atate? xchi.

¹⁰Te jcolel winiquetic te pajal scolelic soc, la sjaq'uic: Te pueblo te la yalbat: Te atat la yac' jcuchcotic al ihcatsil, yan te ha'ate pehc'ana te quihcatscotic, te xchihique, hich me yac awalbe: Te xutul yal jc'ab c'ax hich smuc'ul a te bin ut'il te sch'uyomba te jtate.

¹¹Teme al te ihcatsil la ya'beyex acuchic te jtate, c'ax to xan hich yalal ya ca'beyex a te ho'one. Te jtat la smajex ta xul, pero ho'on ya jmajex ta tsequetic, xchihic.

¹²Ta yoxebal c'ahc'al cha'tal te Jeroboam soc spisil te pueblo ta stojol Roboam, hich te bin ut'il yalojix ta mandar te ajwalil: Suhtanic tal ta jtojol ta oxeb c'ahc'al, te xchihe.

¹³Pero te ajwalil tulan la sutbe te sc'opic, ma ba la yich'be ta cuenta te bin halbot yu'un te mamaletic,

¹⁴ha la yal te bin halbot yu'un te jcolel winiquetic; hich la yal: Te jtat la ya'beyex acuchic al ihcatsil, c'ax to xan hich yalal ya ca'beyex a te ho'one. Te jtat la smajex ta xul, pero ho'on ya jmajex ta tsequetic, xchi.

¹⁵Te ajwalil ma la yich'be ta cuenta te sc'op te pueblo; como hich la sc'an yo'tan te Diose, scuenta yu'un ya xc'oht ta pasel te bin yaloj te Jehová ta scuenta Ahías te talem ta Silon ta stojol Jeroboam snich'an Nabat.

¹⁶C'alal la yil spisil Israel te ma ba ich'bot ta cuenta yu'un te ajwalil te bin la yalic, hich la yalic te pueblo ta stojol te ajwalil: ¿Bin cocheltic a te David? Mayuc bin ya jtahtic ta scuenta te snich'an Isaí. ¡Israel, jujutuhl bahanic ta anahic! ¡Cuentahina ana atuquel, David! xchihic. Hich bahtic ta snahic spisil Israel.

¹⁷Pero te Roboam la scuentahin te snich'nab Israel te nahinemic ta pueblohetic yu'un Judá.

¹⁸Te ajwalil Roboam la sticon bahel te Adoram te scuentahinej te tulan-a'tel, pero spisil Israel la sch'ojic ta ton, hich laj. Ha yu'un te ajwalil Roboam ora mo ta scarreta, baht ta ahnel ta Jerusalén.

¹⁹Hich loc' te Israel ta stojol te sts'umbal David c'alal ora.