Read Tzeltal 2 Crónicas 13 Bible Online

2 Crónicas 13 - Tzeltal bible

2 Crónicas 13

¹Ta swaxaclajunebal (18) ha'bil yochel ta ajwalil a te Jeroboam, hahch ta a'tel ta ajwalil yu'un Judá te Abías.

²Oxeb ha'bil ay ta ajwalil ta Jerusalén. Micaías sbihil te snane, ha yantsil-nich'an Uriel te talem ta Gabaa. La ya'be sbahic guerra te Abías soc Jeroboam.

³Te Abías hahch spas guerra soc lajuneb yoxwinic ta pic (400,000) tsahbil winiquetic te ma xiwic. Yan te Jeroboam baht ya'be guerra soc ho'winic ta pic (800,000) tsahbil winiquetic te ay yipic soc ma xiwic.

⁴Te Abías la stehc'an sba ta wits Zemaraim te ay ta witsiltic yu'un Efraín, hich la yal: ¡A'iybon awa'iyic jc'op, Jeroboam soc spisil Israel!

⁵¿Yu'un bal ma ba yac ana'ic te Jehová te Dios yu'un Israel la ya'be ya'tel ta ajwalil te David soc te sts'umbal ta stojol Israel sbahtel q'uinal ta scuenta chapbil-c'op te ma xhu' ta ch'ayel?

⁶Pero te Jeroboam snich'an Nabat, te ya'bat Salomón snich'an David, hahch scontrahin te yajwal.

⁷Joquinot yu'un chopol winiquetic te c'ax hich hu' yu'unic a te bin ut'il te Roboam snich'an Salomón, como te Roboam querem to soc mayuc lec yip yo'tan, ma ba hu' yu'un ya scoltay sba ta stojolic.

⁸Yo'tic awo'tanuc yac acontrahinic te cuentahinel yu'un Jehová te ay ta sc'ab te sts'umbal David, como bayelex soc awich'ojic te jcolel torohetic pasbilic ta oro te la yac' scuenta diosetic te Jeroboam.

⁹¿Ma bal lajuc atenic bahel te sacerdotehetic yu'un Jehová, te sts'umbalic Aarón, soc te levitahetic, la awotsesic yantic ta sacerdotehetic awu'unic hich te bin ut'il ya spasic te pueblohetic ta yantic q'uinaletic, mach'ayuc a te ya xtal yac' sbahic ta scuenta jcoht jcolel toro soc huqueb tuminchijetic, hich sacerdote ya xc'oht yu'un te bin ma dioseticuc?

¹⁰Yan te ho'otcotic, ha Dios cu'uncotic te Jehová, soc ma ba quihquitayejcotic. Te sacerdotehetic te ya x'a'tejic ta stojol Jehová, ha sts'umbalic Aarón, soc te mach'atic yac spasbelic te a'tel, ha te levitahetique.

¹¹Ha'ic ya schiq'uic te scohtol chic'bil mahtaniletic ta jujun sab soc jujun tibiltic soc ya schiq'uic te pom te sumet yic' ta stojol Jehová; ya yaq'uic te pan ta ch'ul mesa soc ya stsunic te c'ahc' ta scajtajib c'ahc' pasbil ta oro yu'un ya xtihl jujun tibiltic. Como te ho'otcotic jcanantayejcotic te mandariletic yu'un Jehová te Dios cu'uncotic, yan te ha'exe la awihquitayiquix.

¹²Ilawil, ha jolal cu'uncotic te Diose, soc te sacerdotehetic yu'un ya yoq'uesinic te xulubiletic ta acontrahic. Snich'nabex Israel, ma me xawa'be guerra te Jehová te Dios yu'un te jme'jtatic, como ma ba ya xhu' awu'unic stsalel, xchi.

¹³Te Jeroboam sticonejix bahel soldadohetic yu'un ya snac' sbahic ta spat, yu'un ya ya'be guerra te Judá ta stojol sit soc ta spat.

¹⁴Te mach'atic yu'un Judá, c'alal la yilic te hahchix guerra ta stojol sitic soc ta spatic, la yawtayic te Jehová, soc te sacerdotehetic la yoq'uesinic te xulubiletic.

¹⁵Hich te winiquetic yu'un Judá tulan awonic. Te c'alal awonic, Dios la sjin te Jeroboam soc spisil Israel ta stojol te Abías soc Judá.

¹⁶Te snich'nab Israel ahnic loq'uel ta stojol Judá, Dios a'botic ta sc'abic yu'un.

¹⁷Te Abías soc te winiquetic yu'un c'ax bayel la smilic, laj j'ohlil yoxeb scha'winic ta pic (500,000) tsahbilic winiquetic yu'un Israel.

¹⁸Ha yorahil te la yich'ic pehc'anel te snich'nab Israel, yan te snich'nab Judá la ya'iyic tsalaw como ha yich'oj yipic a ta stojol te Jehová te Dios yu'un te sme'statique.

¹⁹Te Abías la snuts bahel te Jeroboam, la yich'be pueblohetic yu'un, ha te Bet-el, Jesana soc Efraín[30] soc te tut pueblohetic yu'unique.

²⁰Te Jeroboam mayuc bin ora la sta yip ta yorahil te Abías. Te Jehová la yehchentes, hich laj.

²¹Yan te Abías la yich' xan yip. La yic' chanlajuntuhl (14) antsetic, soc ay cheb scha'winic (22) ta tuhl queremetic soc waclajuntuhl (16) yantsil-nich'nab.

²²Te bintic xan sc'oblal te Abías, ha spisil te bintic la spas soc te bin la yal, ts'ihbabil hilel ta jun yu'un te jalwanej Iddo.