Read Tzeltal 2 Crónicas 14 Bible Online

2 Crónicas 14 - Tzeltal bible

2 Crónicas 14

¹Cham[31] te Abiam, la yich' muquel ta Pueblo yu'un David. Ha och ta sjelol ta ajwalil te Asa te snich'ane; ha yorahil te lamal q'uinal lajuneb ha'bil.

²Te Asa lec soc toj bin la spas ta stojol Jehová te Dios yu'une.

³La sloq'ueslan te scajtajib ta chiq'uel mahtaniletic yu'un yantic diosetic soc te toyol awilaletic; la swuyticlan te ch'ul tonetic soc la slajin te loc'ombahetic yu'un Asera;

⁴soc la spas ta mandar te Judá te ac'a slehic te Jehová te Dios yu'un te sme'static soc te ac'a sc'ohtesic ta spasel te mandariletic yu'une.

⁵Soc la sloq'ueslan ta spisil te pueblohetic yu'un Judá te toyol awilaletic soc te scajtajib ta chiq'uel pom. Lamal q'uinal ban c'alal scuentahinej te jayeb c'ahc'al ay ta ajwalil.

⁶La spas pueblohetic te ay ts'ahquetic yu'unic, como lamal te q'uinale. Ma ba a'bot guerra ta hich ora como te Jehová la yac' lahmajuc q'uinal ta stojol.

⁷Te Asa hich la yalbe te Judá: Ya jpastic te pueblohetic ini, ya joyticlantic ta ts'ahc soc toyol ilo-q'uinaletic, puertahetic soc sc'atal-te'eletic, te bin ut'il cu'untic te q'uinal, como jlehojtic te Jehová te Dios cu'untique; la jlehtic soc ha la ya'botic lamal q'uinal ta bayuc, xchi. Hich la spasic, soc lec c'oht yu'unic.

⁸Te Asa ay j'ohlil swaxaclajuneb scha'winic ta pic (300,000) soldadohetic yu'un Judá soc smahquilic soc slanzahic, soc ho'lajuneb scha'winic ta pic (280,000) soldadohetic yu'un Benjamín te ay smahquilic soc st'ihmalte'ic. Spisilic ma xiwic.

⁹Te Zera te talem ta Etiopía tal ya'be guerra soc ho'eb shucwinic ta pic (1,000,000) winiquetic soc ho'lajunwinic (300) carretahetic yu'un guerra, c'oht c'alal ta Maresa.

¹⁰Ha yu'un te Asa loc' ta stahel, la schol sbahic ta yaq'uel guerra ta spamlej yu'un Sefata ta nopol Maresa.

¹¹Te Asa la yawtay te Dios, hich la yal: Jehová, pajal yac awa'iy teme yac acoltay te mach'a ay yip o te mach'a mayuc yip. Coltayawotcotic, Jehová, Diosat cu'uncotic, como quich'oj quipcotic ta atojol, soc ta scuenta abihil ya ca'becotic guerra te soldadohetic ini. Jehová, ha'at Diosat cu'uncotic; ma me xawac' stsalat te winique, xchi ta sc'oponel Dios.

¹²Te Jehová la sjinticlan te etiopiahetic ta stojol Asa soc Judá, hich loq'uic ta ahnel te etiopiahetic.

¹³Te Asa soc te winiquetic sjoquinejic la snutsic bahel c'alal ta Gerar; jc'axel lajic te etiopiahetic, mayuc jtuhluc cuxul hil, como lajinotic ta stojol Jehová soc te soldadohetic yu'une. La spojbeyic bayel biluquetic yu'unic.

¹⁴Soc la ya'beyic guerra spisil te pueblohetic ta sjoyobal Gerar, yu'un c'oht ta stojolic te xiwel yu'un Jehová. La spojbeyic sbiluc spisil te pueblohetic, yu'un ay bayel biluquetic tey a.

¹⁵Soc la ya'beyic guerra te banti stsoboj sbahic te mach'atic ay schansbahlamic, la yiq'uic bahel bayel tuminchijetic soc camellohetic, hich suhtic bahel ta Jerusalén.