Read Tzeltal 2 Crónicas 15 Bible Online

2 Crónicas 15 - Tzeltal bible

2 Crónicas 15

¹Te Espíritu yu'un Dios hul ta stojol te Azarías snich'an Oded,

²hich loc' sta te Asa, hich la yalbe: A'iybon awa'iyic jc'op, Asa soc spisil Judá soc Benjamín: Ya me sjoquinex te Jehová teme jun awo'tan yac awac' abahic ta stojol. Teme yac alehic, ya me atahic; yan teme yac awihquitayic, ya me yihquitayex.

³Te Israel bayel c'ahc'al mayuc ta stojol te Dios te smelelil, mayuc sacerdote te ya x'a'bot snopic yu'un soc mayuc Ley;

⁴pero te c'alal ay swocolic a suhtic xan ta stojol Jehová te Dios yu'un Israel, la slehic, hich la stahic.

⁵Ta hich ora mayuc lamal q'uinal yu'un te mach'a ya xtal xbaht, ay bayel wocol ta stojol spisil mach'atic nahinemic ta q'uinal.

⁶Talel c'axel la sjin sbahic te nacionetic soc te pueblohetic, como te Dios la yuts'inlan ta bayel ta chahp wocol.

⁷Pero ha'ex ac'ahic fuersa soc ma me xpehc'aj awo'tanic, yu'un ay bin yac atahic yu'un te awa'telique, xchi.

⁸C'alal la ya'iy te Asa te sc'op te jalwanej Azarías snich'an Oded, la sta yip yo'tan yu'un. La sloq'ueslan te ihlaybil loc'ombahetic ta spisil sq'uinal Judá soc Benjamín, soc ta pueblohetic te la yu'untay te ayic ta witsiltic ta sq'uinal Efraín. La spas xan te scajtajib ta chiq'uel mahtanil yu'un Jehová te ay ta stojol te slehchul te sna Jehová.

⁹Ta patil la stsob spisil te Judá soc Benjamín soc te jbehyometic te talemic ta Efraín, Manasés soc Simeón, como bayel israeletic c'axemic tal ta stojol Asa, yu'un la yilic te joquinot yu'un Jehová te Dios yu'une.

¹⁰La stsob sbahic ta Jerusalén ta yoxebal u ta yo'lajunebal (15) ha'bil yochel ta ajwalil te Asa.

¹¹Ha nix yorahil a la ya'beyic milbil mahtanil te Jehová ta biluquetic te la spojic talel, ha ho'lajunwinic scha'bahc' (700) wacaxetic soc j'ohlil swaxaclajunbahc' (7,000) tuminchijetic.

¹²La schap sc'opic te ya me slehic te Jehová te Dios yu'un te sme'static ta spisil yo'tanic soc ta spisil sch'uhlelic.

¹³Soc mach'ayuc a te ma ba ya sle te Jehová te Dios yu'un Israel, muc' biq'uit, winic o ants, ya me xlajic.

¹⁴Jc'axel la yalic ta jamal ta aw ta stojol Jehová soc yutsil yo'tanic soc yoq'uesinel cornetahetic soc xulubiletic.

¹⁵Spisil te mach'atic yu'un Judá tse'el yo'tanic yu'un te bin jc'axel la yalic ta jamal; como spisil yo'tanic la yalic ta jamal, soc spisil sc'anojel yo'tanic la slehic te Jehová; hich la yac' sba ta tahel yu'unic soc la ya'be lamal q'uinal ta bayuc.

¹⁶Soc te ajwalil Asa la sloq'ues ta ya'tel ta snan-ajwalil te Maaca te snane,[32] como spasoj sloc'omba Asera. La sjimbe te sloc'omba, la swuyticlan soc la schic' ta be-ha' Cedrón.

¹⁷Ta spisil ini, ma ba la yich' loq'uesel te toyol awilaletic ta Israel, aunque te Asa jun yo'tan ta stojol Jehová te jayeb c'ahc'al cuxul.

¹⁸Soc la yich' tal ta sna Dios te oro, plata soc yan biluquetic te yac'oj te stat soc te ha nix yac'oj ta stojol Dios.

¹⁹Mayuc guerra ha to c'alal ta ho'lajuneb scha'winic (35) ha'bil yochel ta ajwalil a te Asa.