Read Tzeltal 2 Crónicas 16 Bible Online

2 Crónicas 16 - Tzeltal bible

2 Crónicas 16

¹Ta swaclajuneb scha'winic (36) ha'bil yochel ta ajwalil a te Asa, te Baasa ajwalil yu'un Israel mo bahel ta ya'beyel guerra te Judá, soc la schahpan ta lec te Ramá scuenta yu'un mayuc mach'a ya xhu' ya xloc' o ya x'och ta stojol Asa te ajwalil yu'un Judá.

²Ha yu'un te Asa la yich' spisil te plata soc te oro te ay ta yawil c'ulejalil ta sna Jehová soc ta sna ajwalil, la sticon bahel jal-c'opetic ta stojol Ben-adad ajwalil yu'un Siria te ay ta Damasco, hich la sticon ta halbeyel:

³Ya jchap jc'optic, hich te bin ut'il la spasic te jtatique. La jticombat amahtan plata soc oro scuenta yu'un ya xtal ajin te achapbil-c'op soc Baasa ajwalil yu'un Israel, scuenta yu'un ya yihquitayon, xchi.

⁴Te Ben-adad lec la ya'iy te bin la yal te ajwalil Asa, ha yu'un la sticonlan bahel jtsobaw yu'un soldadohetic ta ya'beyel guerra te pueblohetic yu'un Israel. Hich la stsalticlan Ijón, Dan, Abel-maim soc te pueblohetic yu'un sq'uejojibal we'elil yu'un Neftalí.

⁵C'alal hich la ya'iy te Baasa, la yihquitay hilel schahpanel te Ramá soc la yihquitay te ya'tele.

⁶Hich te ajwalil Asa la yic' tal spisil Judá, la yich'ic bahel te tonetic soc te'etic te la stuhun te Baasa ta schahpanel Ramá; la schahpan a te Geba soc Mizpa.

⁷Ta hich ora tal te jalwanej Hanani ta stojol te Asa ajwalil yu'un Judá, hich la yalbe: Te bin ut'il la awich' awip ta scuenta te ajwalil yu'un Siria, te ma ba la awich' awip ta scuenta te Jehová te Dios awu'un, hich colix ta ac'ab te soldadohetic yu'un te ajwalil yu'un Siria.

⁸Te etiopiahetic soc te libiahetic ¿ma bal c'ax bayelicuc, soc carretahetic soc bayel jmoheletic ta cawu? Te bin ut'il la awich' awip ta scuenta Jehová, ha la ya'bat ta ac'ab.

⁹Como te sit Jehová ya yil spisil te q'uinal, yu'un ya ya'be yip te mach'atic jun yo'tanic ta stojol. Sjel ta shoquem ajol te bin la apasix; ha yu'un yo'tic soc li' bahel ay me guerra ta atojol, xchi.

¹⁰Te Asa ilin yu'un ta stojol te jalwanej, la yotses ta cárcel, como c'ax bayel ilin yu'un. Soc ta hich ora te Asa ay mach'atic yu'un te pueblo te la yuts'inlan.

¹¹Te bintic la spas te Asa, ta shahchibal c'alal ta slajibal, ts'ihbabil hilel ta hun yu'un te ajwaliletic yu'un Judá soc Israel.

¹²Ta balunlajuneb scha'winic (39) ha'bil yochel ta ajwalil a te Asa, tsacot ta tulan chamel yoc. Te c'alal ay ta chamel ma ba la sle te Jehová, ha baht ta stojol te jpoxtawanejetic.

¹³Jun yoxwinic (41) ha'bil yochel ta ajwalil a, cham[33] te Asa.

¹⁴La smuquic ta smuquenal te pasbil yu'un ta Pueblo yu'un David. La yaq'uic ta schahchamte'el, la ya'beyic perfumehetic soc bayel ta chahp te bin sumet yic', te chahpambil yu'un te mach'atic ya sna'ic spasel. La spasic muc'ul c'ahc' scuenta yich'el ta muc'.