Read Tzeltal 2 Crónicas 17 Bible Online

2 Crónicas 17 - Tzeltal bible

2 Crónicas 17

¹Och ta sjelol ta ajwalil te Josafat te snich'an, te tulan la yac' sba ta scontrahinel Israel.

²La yac' soldadohetic ta spisil te pueblohetic ta Judá te joytaybilic ta ts'ahc, soc la yac' ta canantayel yu'un tsohbotsohb soldadohetic ta spisil te sq'uinal Judá soc ta pueblohetic yu'un Efraín te la yu'untay te Asa te state.

³Te Jehová la sjoquin te Josafat yu'un la st'umbe te behetic te st'unoj David te state. Ma ba la sle te baaletic,

⁴ha nax la sle te Dios yu'un te stat soc la st'umbe te mandariletic yu'un, ma ha'uc la spas te bin la spas te Israel.

⁵Ha yu'un te Jehová la ya'be yip te ya'tel ta ajwalil; soc spisil Judá la ya'beyic smahtan te Josafat, la sta bayel sc'ulejal soc yutsilal.

⁶Toyol yo'tan ta st'unel te behetic yu'un Jehová, soc la sloq'ues ta Judá te toyol awilaletic soc te loc'ombahetic yu'un Asera.

⁷Ta yoxebal ha'bil yochel ta ajwalil a, la sticon bahel te príncipaletic yu'un, ha te Ben-hail, Abdías, Zacarías, Natanael soc Micaías, scuenta yu'un ya ya'iyic p'ijubtesawanej ta pueblohetic yu'un Judá;

⁸soc la sticon bahel te levitahetic, ha te Semaías, Netanías, Zebadías, Asael, Semiramot, Jonatán, Adonías, Tobías soc Tobadonías, soc te sacerdotehetic Elisama soc Joram,

⁹te la ya'iyic p'ijubteswanej ta Judá, yich'ojic te libro yu'un te ley yu'un Jehová, la sbehentayic spisil te pueblohetic yu'un Judá ta snohptesel te ants-winiquetique.

¹⁰Te xiwel yu'un Jehová c'oht ta stojol spisil te ajwaliletic ta sjoyobal Judá, ma ba la sc'anic ya ya'beyic guerra te Josafat.

¹¹Te filisteohetic la yich'ic tal mahtaniletic soc plata ta scuenta spatan ta stojol Josafat. Te árabehetic la yic'beyic tal balunlajunbahc' soc ho'winic (7,700) tuminchijetic soc balunlajunbahc' soc ho'winic (7,700) tat tentsunetic.

¹²Hich te Josafat xquechcon ta yich'el yip; la spas tulan ahnibal ts'ahquetic ta Judá soc pueblohetic yu'un sq'uejojibal biluquetic.

¹³Bayel bintic la spas ta pueblohetic yu'un Judá, soc ay winiquetic yu'un ta Jerusalén te ma xiwic.

¹⁴Hich ay te yahtalul ta jujun sna' sme'static: Te jtsobawetic yu'un jujumil ta Judá: ha te Adnas te jtsobaw yu'un j'ohlil waxaclajuneb scha'winic ta pic (300,000) soldadohetic te ay yipic;

¹⁵patil te Johanán te jtsobaw yu'un ho'lajuneb scha'winic ta pic (280,000) ta tuhl;

¹⁶patil te Amasías snich'an Zicri, ha te mach'a ta sc'anojel yo'tan la yac' sba ta stojol Jehová soc ho'eb scha'winic ta pic (200,000) winiquetic te ma xiwique.

¹⁷Ta Benjamín, ha te Eliada te winic te ma xiw, soc ho'eb scha'winic ta pic (200,000) te chapalic soc st'ihmalte'ic soc smahquilic;

¹⁸patil te Jozabad soc j'ohlil oxeb scha'winic ta pic (180,000) winiquetic te chapalic yu'un guerra.

¹⁹Ha'ic te a'batetic yu'un te ajwalil, ma ba ahtaybilic te mach'a ac'otic yu'un te ajwalil ta pueblohetic te ay ts'ahquetic ta spisil Judá.