Read Tzeltal 2 Crónicas 18 Bible Online

2 Crónicas 18 - Tzeltal bible

2 Crónicas 18

¹Te Josafat bayel sc'ulejal soc yutsilal; soc la snihalmamalin te Acab.

²Cheb oxeb ha'bil ta patil baht ta Samaria ta yula'tayel te Acab. Te Acab la smil bayel tuminchijetic soc wacaxetic yu'un ya swe' soc te Josafat soc te mach'atic sjoquinej, soc la sjuc te ya xjoquinot yu'un ta ya'beyel guerra te Ramot yu'un Galaad.

³Te Acab ajwalil yu'un Israel la sjoc'obe te Josafat ajwalil yu'un Judá: ¿Ya bal ajoquinon bahel ta ya'beyel guerra te Ramot yu'un Galaad? xchi. La sjac' te Josafat: Hichon te bin ut'il ha'at, soc te pueblo cu'un pajal soc te pueblo awu'un; ya xbohotic ta guerra, xchi.

⁴Te Josafat la yalbe xan te ajwalil yu'un Israel: Awocoluc, joc'obeya bin ya yal te Jehová yu'un, xchi.

⁵Ha yu'un te ajwalil yu'un Israel la stsob jbahc' (400) ta tuhl jalwanejetic, hich la sjoc'obe: ¿Ya bal ca'becotic guerra te Ramot yu'un Galaad, o ma'uc? xchi. Bahan, como Dios ya ya'be ta sc'ab te ajwalil, xchihic.

⁶Pero te Josafat la sjoc'oy: ¿Ma bal ayuc jalwanej yu'un Jehová li'i te ya xhu' ya joc'oytic ta scuenta? xchi.

⁷Te ajwalil yu'un Israel la sjac'be sc'op te Josafat: Ay jtuhl xan winic te ya xhu' ya joc'obetic te Jehová ta scuenta, pero ya quihlay, como mayuc bin ora lec bin ya yalbon, ha nax te bin chopol ya xc'oht ta jcuenta. Ha te Micaías snich'an Imla, xchi. Ma me hichuc ya yal te ajwalil, xchi te Josafat.

⁸Ha yu'un te ajwalil yu'un Israel la yic' tal te mach'a ay ya'tel, hich la yalbe: Ac'a taluc ta ora te Micaías snich'an Imla, xchi.

⁹Te ajwalil yu'un Israel soc te Josafat ajwalil yu'un Judá huhcajtic ta huctajibaletic yu'unic, soc slapojic c'u'ul scuenta ajwalil, ayic ta plaza ta nopol te yochibal te Samaria, spisil te jalwanejetic yacalic ta c'op ta stojolic.

¹⁰Te Sedequías snich'an Quenaana spasoj xulubiletic ta taq'uin, hich la yal: Hich yaloj te Jehová: Ta scuenta te xulubiletic ini ya me acujticlan te siriahetic ha to c'alal yac alajin ta jc'axel, xchi.

¹¹Hich nix yac yalbelic spisil te jalwanejetic: A'beya guerra te Ramot yu'un Galaad, ya me awa'iy tsalaw, como te Jehová ya me ya'be ta sc'ab te ajwalil, xchihic.

¹²Te mach'a bahem ta yiq'uel tal te Micaías hich c'oht yalbe: Spisil te jalwanejetic junax yac yalbelic te bin lec ta stojol te ajwalil. Ya calbat wocol te pajaluc ac'op soc te yantic, te lec bin yac awal, xchi.

¹³Hich la sjac' te Micaías: Yiloj Jehová, ha nax ya cal te bin ya yalbon te Diose, xchi.

¹⁴Te c'alal c'oht ta stojol te ajwalil, hich halbot yu'un: Micaías, ¿ya bal ca'becotic guerra te Ramot yu'un Galaad, o ma'uc? xchi. Bahanic, ya me awa'iyic tsalaw, ya x'ochic ta ac'abic, xchi te Micaías.

¹⁵Pero te ajwalil la yalbe: ¿Jayeb buelta ya calbat te ya me awalbon te bin melel ta scuenta te Jehová? xchi.

¹⁶Ha yu'un te Micaías la yal: Quiloj spisil Israel puhquemic ta witsiltic hich te bin ut'il tuminchijetic te mayuc jcanan yu'unique. La yal te Jehová: Mayuc ajwalil yu'unic; jujutuhl ac'a suhtuc bahel ta snahic, xchi.

¹⁷Te ajwalil yu'un Israel la yalbe te Josafat: ¿Ma bal lajuc calbat te mayuc bin ora lec bin ya yalbon ta jtojol, ha nax te bin ma lecuc? xchi.

¹⁸La yal xan te Micaías: A'iya me awa'iyic te sc'op Jehová: La jquil te Jehová hucul ta smuc'ul huctajib, soc spisil te ch'ul abatetic ta ch'ulchan ayic ta swa'el soc ta sq'uexam.

¹⁹Te Jehová la sjoc'oy: ¿Mach'a a te ya stijbe yo'tan te Acab ajwalil yu'un Israel te ya ya'be guerra te Ramot yu'un Galaad yu'un ya xlaj tey a? xchi. Yan bin la yal te jtuhle, yan bin la yal te yane.

²⁰Ay jun espíritu la stehc'an sba ta stojol Jehová, hich la yal: Ho'on ya jtijbe yo'tan, xchi. ¿Bin ut'il yac apas? xchi te Jehová.

²¹La yal te espíritu: Ya xloc'on bahel, ho'on espíritu yu'un lot ya xc'ohon ta yehic te jalwanejetique, xchi. La yal te Jehová: Ha'at ya xhu' awu'un yac alo'loy. Bahan, hich me xapas, xchi.

²²Hich te Jehová ya'beyejix espíritu yu'un lot ta yehic spisil te jalwanejetic awu'une. Te Jehová yaloj te bin chopol ta atojol, xchi te Micaías.

²³Ha yu'un te Sedequías snich'an Quenaana nohpoj tal ta stojol te Micaías, la smajbe scho, hich la yal: ¿Banti behil loc' bahel ta jtojol te espíritu yu'un Jehová scuenta yu'un ya sc'oponat te ha'ate? xchi.

²⁴La sjac' te Micaías: Ha'at nix yac awil te bin ora yac anac' aba ta nahnatic, la yut.

²⁵Ha yu'un te ajwalil yu'un Israel la yal: Tsacahic te Micaías, ic'ahic bahel ta chuquel ta stojol Amón te gobernador yu'un te pueblo, soc ta stojol Joás snich'an te ajwalil,

²⁶hich yac awalbeyic: Hich ya yal te ajwalil: Otsesahic ta cárcel soc a'beyahic swocol ta jteb nax pan soc ha', ha to c'alal lamal q'uinal ya suhton tal, xchi.

²⁷La yal te Micaías: Teme lamal q'uinal ya suhtat tal, yu'un nix ma ha'uc c'opoj ta jcuenta a te Jehová, xchi. Soc la yal xan: A'iya me awa'iyic apisilic, xchi.

²⁸Ha yu'un te ajwalil yu'un Israel soc te Josafat ajwalil yu'un Judá mohic bahel ta Ramot yu'un Galaad.

²⁹Te ajwalil yu'un Israel la yalbe te Josafat: Te ho'one ya jyanijtes jba ochel ta guerra, pero te ha'ate ya me alap te c'u'ul scuenta ajwalil, xchi. Hich la syanijtes sba te ajwalil yu'un Israel, och bahel ta guerra.

³⁰Pero te ajwalil yu'un Siria spasojix ta mandar a te capitanetic yu'un carretahetic yu'un guerra te sjoquinej, hich la yal: Ma me xawa'beyic guerra te mach'a tut soc muc', ha nax te ajwalil yu'un Israel, xchi.

³¹Ha yu'un c'alal la yilic Josafat te capitanetic, hich la yalic: Ha te ajwalil yu'un Israel ini, xchihic. Hich la sjoytayic ta guerra, pero awon te Josafat, hich coltayot yu'un te Jehová. Dios la sloq'ueslan bahel ta stojol;

³²como te capitanetic, c'alal la yilic te ma ha'uc te ajwalil yu'un Israel, la yihquitayic hilel.

³³Pero ay jtuhl soldado te tojol nax la st'im bahel te ya'tejibal st'ihmalte', la yehchentes te ajwalil yu'un Israel ta banti ts'acticlambil smahquil. Ha yu'un te ajwalil la yalbe te jtij-carreta yu'une: Ac'a buelta, loq'uesawon ta banti ay te guerra, como mero muc' ehchen quich'oj, xchi.

³⁴Tulanij te guerra sjunal c'ahc'al. Te ajwalil yu'un Israel la xihc'an sba ta scarreta ta stojol te siriahetic ha to c'alal ta tibiltic; c'alal mahl te c'ahc'al, cham.