Read Tzeltal 2 Crónicas 19 Bible Online

2 Crónicas 19 - Tzeltal bible

2 Crónicas 19

¹Te Josafat ajwalil yu'un Judá lec suht tal ta sna ta Jerusalén.

²Te jalwanej Jehú snich'an Hanani loc' ta stahel, hich la sjoc'obe te ajwalil Josafat: ¿Ya bal acoltay te mach'a chopol, c'ux bal yac awa'iy ta awo'tan te mach'atic scontrahinejic te Jehová? Ha scuentahil te ilinem ta atojol te Jehová.

³Pero ay bintic lec te apasoj, yu'un la aloq'ues ta q'uinal te loc'ombahetic yu'un Asera soc awac'ojix awo'tan ta slehel te Diose, xchi.

⁴Te Josafat nahinem ta Jerusalén; pero loc' bahel yan buelta ta yula'tayel te pueblo, c'alal Beerseba c'alal ta witsiltic yu'un Efraín, yu'un ya yic' suhtel tal ta stojol Jehová, te Dios yu'un te sme'statique.

⁵La yotseslan juecetic yu'un spisil te pueblohetic te joybilic ta ts'ahc ta sq'uinal Judá.

⁶Hich la yalbe te juecetic: Tsahtaya awilic te bin yac apasic, como ma ha'uc yac awa'iyic chahpanwanej ta scuenta winic, ha ta scuenta Jehová, te mach'a ya sjoquinex te c'alal yac awa'iyic chahpanwanej.

⁷Ha yu'un, ich'ahic ta muc' te Jehová, tsahtayahic te bin yac apasic, como te Jehová te Dios cu'untic ma ha'uc te ma tojuc ya xchahpanwan, ma tsahbiluc nax mach'a ya sc'uxultay soc mayuc chahpanel yu'un ta scuenta taq'uin, xchi.

⁸Soc te Josafat la yac' ta Jerusalén levitahetic, sacerdotehetic soc tatiletic yu'un chahpalchahp Israel yu'un ya yaq'uic c'ohtuc ta pasel te mandariletic yu'un Jehová soc ta schahpanel c'op. Ha'ic nahinic ta Jerusalén.

⁹Hich la spasticlan ta mandar: Ich'ahic ta muc' te Jehová ta scuenta awa'telic, junuc me awo'tanic, soc tojuc me awo'tanic.

¹⁰Biluc c'opil te ya xtal ta atojol te ya xhahch ta yohlil te awermanotac te nahinemic ta pueblohetic, teme milaw o te bin scuenta te Ley, o spisil ta chahp mandariletic, ya me atsitsic te manchuc ya sle smulic ta stojol Jehová, scuenta yu'un ma ba ya xtal ilimba ta atojolic soc ta stojol te awermanotac. Teme hich yac apas, ma ba yac atahic amulic.

¹¹Te muc'ul sacerdote Amarías ha ya sjuquex ta spisil te bin ut'il ay ta ch'uhunel te Jehová; soc te Zebadías snich'an Ismael, te príncipal yu'un te sts'umbal Judá, ha ay ta scuenta bintic sc'oblal te ya'tel te ajwalil; soc te levitahetic ya ya'telic ta atojolic. Pasahic me tulan hiche. Te Jehová ya me sjoquin te mach'a lec bin ya spas, xchi.