Read Tzeltal 2 Crónicas 2 Bible Online

2 Crónicas 2 - Tzeltal bible

2 Crónicas 2

¹Te Salomón la snop te ya spas Na yu'un te sbihil Jehová, soc smuc'ul na ajwalil.

²La ya'be ya'telic waxacpic soc ho'lajunbahc' (70,000) ta tuhl jcuch-ihcatsiletic, lajunpic (80,000) ta tuhl jtop'-tonetic ta witsiltic, soc balunbahc' (3,600) ta tuhl jcuentahinwanejetic yu'un a'tel.

³Te Salomón la sticon ta halbeyel te Hiram ajwalil yu'un Tiro, hich la yalbe: Hich me xapasbon te bin ut'il la apasbe te jtat David, te la aticombe cedrohetic scuenta yu'un ya yich' pasel na ta banti ya xnahin.

⁴Ilawil, ya jpas Na yu'un te sbihil te Jehová te Dios cu'un, jc'axel ya cac' ta stojol, scuenta yu'un ya yich' chiq'uel bin sumet yic' ta stojol, soc te spisil ora ya yich' aq'uel ta mesa te panetic ac'bil ta stojol, soc te ya yich' chiq'uel scohtol chic'bil mahtaniletic ta sab soc ta tibiltic, ta sc'ahc'alel cux-o'tanil, yach'il u, soc ta yantic q'uinetic yu'un Jehová te Dios cu'uncotic; ha te spisil ora ya sc'an ya yich' pasel ta Israel.

⁵Ya sc'an te muc' te Na te ya jpas, como te Dios cu'uncotic c'ax muc' xan a te bin ut'il te yantic diosetique.

⁶Pero ¿mach'a ya xhu' yu'un spasbeyel sna, te bin ut'il ma x'och a tey ta ch'ulchan soc ta mero toyol ch'ulchan? ¿Mach'ahon a te ho'on ya jpasbe sna, aunque ha'uc xanix a te ya yich' chiq'uel pom ta stojol?

⁷Ha yu'un ticombon tal jtuhl winic te ya sna' a'tel ta oro, plata, bronce, hierro, soc chi'in-yax, tsaj soc yaxal estrambre soc te ya sna' sch'ahlel ton, te ya sjoquin te maestrohetic cu'un ta Judá soc ta Jerusalén, ha te mach'atic la ya'be ya'tel te jtat David.

⁸Soc ticombon tal te' ta Líbano: ha te cedro, ciprés soc sándalo, yu'un ya jna' te ya sna'ic sts'etel te' ta Líbano te a'batetic awu'une. Te a'batetic cu'un ya sjoquin sbahic soc te a'batetic awu'un,

⁹scuenta yu'un ya schahpambonic bayel te'etic, como te Na te ya jpas, mero muc' soc t'ujbil ya sc'an ya xc'oht.

¹⁰Te a'batetic awu'un, ha te jts'et-te'etic, ya ca'be j'ohlil yoxpic (20,000) coro[1] trigo, j'ohlil yoxpic (20,000) coro cebada, j'ohlil yoxpic (20,000) bato[2] vino, soc j'ohlil yoxpic (20,000) bato aceite, xchi.

¹¹Ha yu'un te Hiram ajwalil yu'un Tiro la sticon bahel suhtib ta carta ta stojol Salomón, hich la yal bahel: Ta scaj te c'ux ta yo'tan Jehová te pueblo yu'un, la yotsesat ta ajwalil yu'unic, xchi.

¹²Soc hich la yal xan: Bayel me yutsil te Jehová, te Dios yu'un Israel, te la spas te ch'ulchan soc te bahlumilal, soc te la ya'be te ajwalil David jtuhl snich'an te ay sp'ijil yo'tan, te ya sna' soc stsahtayel spisil, te ha ya spas na yu'un te Jehová soc muc'ul na yu'un ajwalil.

¹³Ya jticombat tal jtuhl winic te ya sna' ta lec te a'tel, ha te Hiram-abi

¹⁴te yal jtuhl ants te ha sts'umbal Dan, talem ta Tiro te state. Ya sna' a'tel ta oro, plata, bronce, hierro, ton, te', chi'in-yax, yax, soc tsajal pac', soc lino-pac', spisil ya sna' sch'ahlel, soc ya sna' spasel spisil bintic ya x'a'bot spas. Ha ya sjoquin te winiquetic awu'un te ya sna'ic ta lec a'tel soc te mach'atic yu'un te cajwal David te atate.

¹⁵Ha yu'un, cajwal, ticombotic tal ta stojol te a'batetic awu'un te trigo, cebada, aceite soc vino te la awale.

¹⁶Yan te ho'otcotic ya jts'etcotic ta Líbano spisil te te'etic te ya xtuhun awu'un, ya quich'cotic bahel ta pohy ta mar c'alal ta Jope; ha'at yac awac' ta ich'el bahel ta Jerusalén, xchi.

¹⁷Te Salomón la yahtay spisil te jyanlumetic te nahinemic ta sq'uinal Israel, ta patil yu'un te yich'ojic ahtayel yu'un te David te state; ay balunlajunpic soc chanbahc' (153,600) ta tuhl.

¹⁸La ya'be ya'tel waxacpic soc ho'lajunbahc' (70,000) ta tuhl scuenta jcuch-ihcatsil, lajunpic (80,000) ta tuhl jtop'-tonetic ta witsiltic, soc balunbahc' (3,600) ta tuhl te ya scuentahinic te j'a'teletique.