Read Tzeltal 2 Crónicas 20 Bible Online

2 Crónicas 20 - Tzeltal bible

2 Crónicas 20

¹Ta patil, te moabetic soc te amonetic, soc joquimbilic yu'un yantic amonetic,[34] tal ya'beyic guerra te Josafat.

²Ay mach'atic tal yalbeyic te Josafat: C'ax bayelic yac ta talel ta atojol ta jehch Mar Muerto, ta Edom;[35] tey ayiquix a ta Hazezon-tamar, ha te En-gadi, xchihic.

³Te Josafat xiw yo'tan yu'un, la snop te ya sjoc'obe te Jehová; la yal mandar te ya scom swe'elic ta spisil Judá.

⁴Te mach'atic yu'un Judá la stsob sbahic ta sc'anel coltayel yu'un te Jehová; talic ta spisil pueblohetic yu'un Judá.

⁵Te Josafat la stehc'an sba ta yohlil te tsoblej yu'un Judá soc yu'un Jerusalén ta sna Jehová ta stojol te yach'il amac',

⁶hich la yal: Jehová te Diosat yu'un te jme'jtatcotic, ¿ma bal ha'ucat Diosat ta ch'ulchan, soc acuentahinej spisil te ban c'alal smacojic te nacionetique? ¿Ma bal ayuc ta ac'ab te awip soc te awu'el te mayuc mach'a ya scomat?

⁷Dios cu'untic, ¿ma bal ha'ucat la atenticlan loq'uel te mach'atic nahinemic li' ta q'uinal ta stojol te pueblo Israel soc sbahtel q'uinal la awa'be te sts'umbal Abraham te jc'uxultaywanej aba soque?

⁸Ha'ic nahinemic tey a soc la spasbat ch'ul awilal yu'un te abihil, te hich la yalic:

⁹Teme ay bin chopol ya xtal ta jtojolcotic, teme espada scuenta castigo, o tulan chamel o wi'nal, ya xtal jtehc'an jbahcotic ta stojol ha'i Na ini soc ta atojol (como li' ay ta Na ini te abihile), ya cawtayatcotic ta scuenta te jwocolcotic, soc ha'at yac awa'iybotic jc'opcotic soc yac acoltayotcotic, te xchihique.

¹⁰Ha yu'un yo'tic li' ay te amonetic, moabetic soc te mach'atic talemic ta witsiltic Seir, ha te sq'uinalic ta banti ma ba la awac' c'axuc bahel te Israel te c'alal loq'uic tal ta sq'uinal Egipto, hich yan be banti bahtic, ma ba la slajinic.

¹¹Ilawil bin ut'il ya ya'botcotic tojcotic, ha tal stenotcotic loq'uel ta q'uinal te ha'at la awa'botcotique.

¹²¡Dios cu'untic! ¿ma bal yacuc achahpan? Como mayuc quipcotic ta stojol hich yipal te ya xtal ya'botcotic guerra. Ma jna'cotic bin ya jpascotic, cac'oj jsitcotic ta atojol, xchi.

¹³Spisil te winiquetic yu'un Judá soc antsetic, al-nich'anetic soc tut alaletic yu'unic tec'ajtic a ta stojol Jehová.

¹⁴Tey ay a te Jahaziel snich'an Zacarías, snich'an Benaía, snich'an Jeiel, snich'an Matanías, jtuhl levita te ha sts'umbal Asaf, hul te Espíritu yu'un Jehová ta stojol c'alal ay ta yohlil te tsoblej,

¹⁵hich la yal: A'iya awa'iyic spisil Judá soc Jerusalén, soc ha'at, ajwalil Josafat. Hich ya yalbeyex te Jehová: Ma me xiwex soc ma me xnihc awo'tanic ta stojol te ipal soldadohetic, como ma awu'unicuc te guerra, ha yu'un Dios.

¹⁶Pajel ya me xcohex bahel ta stojolic; yac awilic te ya xmohic talel ta banti ya xhu' c'axel ta wits yu'un Sis, yac atahic ta uc'um ta nopol te jochol taquin q'uinal Jeruel.

¹⁷Ma ba yac awa'beyic guerra ha'ex. Lahmana abahic ta tec'lej, ya me awilic te colel yu'un Jehová ta atojolic. Judá soc Jerusalén, ma me xiwex soc ma me xpehc'aj awo'tanic; bahan, tahahic pajel, como te Jehová ya me sjoquinex, xchi.

¹⁸Ha yu'un te Josafat la snijan sba c'alal ta lum, ha nix hich spisil Judá soc te mach'atic nahinemic ta Jerusalén la squejan sbahic ta stojol Jehová ta sch'uhuntayel.

¹⁹Te levitahetic, ha te sts'umbal Coat soc Coré, hahchic ta tulan aw ta yalbeyel yutsil sc'oblal te Jehová te Dios yu'un Israel.

²⁰C'alal hahchic ta sab, bahtic ta jochol taquin q'uinal Tecoa. Te c'alal yaquic ta bahel a, te Josafat la stehc'an sba, hich la yal: A'iybon awa'iyic jc'op, Judá soc mach'atic nahinemic ta Jerusalén. Ayuc me sch'uhunel awo'tanic ta stojol Jehová te Dios awu'unic, hich mayuc bin ya xc'oht ta acuentahic a; ch'uhunahic te bin ya yal te jalwanejetic yu'un, hich lec ya xc'ohex yu'un, xchi.

²¹Te c'alal laj sjoc'obel a te pueblo, la yac' mach'atic slapojic ch'ul c'u'uletic a ya sc'ayojtaybeyic yutsilal te Jehová c'alal yaquic ta bahel a te mach'atic chapajtic yu'un ya'tejib yu'un guerra, hich yac yalbelic: Halbeyahic wocol te Jehová, como sbahtel q'uinal te sc'uxul yo'tan, xchihic.

²²Te c'alal hahchic ta sc'ayojtaybeyel yutsilal a, te Jehová la yac' te ay mach'atic la snac' sbahic ta ya'beyel guerra te amonetic, moabetic soc te mach'atic talic ta wits Seir te talic ta ya'beyel guerra te Judá; hich tsalotic hilel.

²³Como te amonetic soc te moabetic hahch ya'beyic guerra te mach'atic talemic ta wits Seir yu'un ya smilic soc ya slajinic. Te c'alal laj smilbelic a te mach'atic talemic ta wits Seir, talel c'axel hahch smil sbahic.

²⁴Te c'alal c'ohtic te winiquetic yu'un Judá ta toyol ilo-q'uinal ta jochol taquin q'uinal, la yilic bahel ta stojol banti ay te ipal soldadohetic, la yilic chamen baq'uetetic te lamalic ta lum, mayuc mach'a loq'uem ta ahnel.

²⁵Ha yu'un te Josafat soc te winiquetic yu'un baht spojbeyic sbiluquic, la stahic bayel c'ulejalil ta yohlil te chamen baq'uetetic, ha c'u'uletic soc bintic t'ujbil pasticlambil, la yich'ic hich yipal te ma ba hu' ta cuchel bahel. Oxeb c'ahc'al la stsobic te biluquetic, como c'ax bayel.

²⁶Ta schanebal c'ahc'al la stsob sbahic ta spamlej yu'un Beraca, tey la yalbeyic yutsil sc'oblal a te Jehová. Ha scuentahil te la ya'beyic sbihilin te lugar, spamlej yu'un Beraca,[36] hich ay sbihil c'alal ora.

²⁷Patil spisil te winiquetic yu'un Judá soc Jerusalén tse'el yo'tanic a suhtic bahel ta Jerusalén, ha nahil yu'unic te Josafat, como te Jehová ya'beyejix yutsil yo'tanic yu'un te la yac'ticlan ta libre yu'un te scontrahique.

²⁸Ochic bahel soc salterio, arpa soc cornetahetic ta Jerusalén soc ta templo yu'un Jehová.

²⁹Te xiwel yu'un Dios c'oht ta stojol spisil te nacionetic te c'alal la ya'iyic te Jehová la ya'be guerra te scontratac te Israel.

³⁰Ay lamal q'uinal ban c'alal smacoj ta ajwalil te Josafat, como te Dios yu'un la ya'be lahmajuc q'uinal ta bayuc.

³¹Hich te Josafat ay ta ajwalil ta stojol Judá; ay ho'lajuneb scha'winic (35) ya'bilal a te c'alal och ta ajwalil, ho'eb scha'winic (25) ha'bil ay ta ajwalil ta Jerusalén. Azuba sbihil te snane, ha yantsil-nich'an Silhi.

³²La st'umbe sbe te Asa te state, ma ba la yihquitay sba ta stojol, toj bin la spas ta stojol Jehová.

³³Pero te toyol awilaletic ma ba la yich'ic loq'uesel, como te pueblo ma to junuc yo'tanic ta stojol te Dios yu'un te sme'statique.

³⁴Te yantic xan ya'tel Josafat, ta shahchibal c'alal ta slajibal, ts'ihbabil hilel ta sc'op Jehú snich'an Hanani, te ha ochem ta libro yu'un te ajwaliletic yu'un Israel.

³⁵Ta patil ini, te Josafat ajwalil yu'un Judá jun yo'tan la schap sc'op soc Ocozías te ajwalil yu'un Israel, te chopol ya'tele.

³⁶La schap soc te ya yich' pasel barcohetic te ya xbahtic ta Tarsis. Hich la spasic te barcohetic ta Ezión-geber.

³⁷Ha yu'un te Eliezer snich'an Dodava, te talem ta Maresa, hich la yalbe sc'oblal te Josafat: Te bin ut'il la achap ac'op soc Ocozías, te Jehová ya slajimbat te bintic la apas, xchi. Hich wuy te barcohetic, hich ma hu' bahtic ta Tarsis.