Read Tzeltal 2 Crónicas 21 Bible Online

2 Crónicas 21 - Tzeltal bible

2 Crónicas 21

¹Cham[37] te Josafat, la smuquic ta Pueblo yu'un David. Ha och ta sjelol ta ajwalil te Joram te snich'an,

²te ha yihts'inab te Azarías, Jehiel, Zacarías, Micael soc Sefatías, te snich'nab Josafat. Ta spisil ini ha snich'nab te Josafat ajwalil yu'un Judá.

³A'botic yu'un static bayel mahtaniletic oro, plata soc te bintic t'ujbilic, soc la yac'ticlambe pueblohetic ta Judá te joybilic ta ts'ahc. Pero la yotses ta ajwalil te Joram ta scaj te ha sba-nich'an.

⁴C'alal yich'ojix yip a ta shuctajib ta ajwalil yu'un te stat, la smilticlan ta espada spisil te yihts'inab soc cha'oxtuhl príncipaletic yu'un Israel.

⁵Ay lahchayeb scha'winic (32) ya'bilal a c'alal och ta ajwalil, waxaqueb ha'bil ay ta ajwalil ta Jerusalén.

⁶Pero la st'umbe sbe te ajwaliletic yu'un Israel, hich te bin ut'il la spas te sts'umbal Acab, como yic'oj yihnamin te yantsil nich'an Acab; la spas te bin chopol ta stojol Jehová.

⁷Pero te Jehová ma ba la sc'an la sjimbe te sts'umbal David ta scaj te sc'op schapoj soc te David, soc yalbeyej ta jamal te ya ya'be hilel tsumbil c'ahc' yu'un soc te snich'nab sbahtel q'uinal.

⁸Ta yorahil te Joram, la stoy sba te Edom ta scontrahinel te cuentahinel yu'un Judá; la yotsesic ajwalil yu'unic.

⁹Ha yu'un te Joram baht tey a soc te capitanetic yu'un soc spisil te carretahetic yu'un guerra. Te Joram hahch ta ahc'abal, la ya'be guerra te edometic te joytaybilic yu'un.

¹⁰Pero te Edom col ta libre yu'un te cuentahinel yu'un Judá c'alal ora. Ha nix yorahil a te Libna col ta libre, como te Joram yihquitayej hilel te Jehová, te Dios yu'un te sme'state.

¹¹Soc la spas toyol awilaletic ta tsehletic yu'un Judá, hich la yac' te ya yac' sbahic ta antsinel c'ohem ta stojol te lugaretic te mach'atic nahinemic ta Jerusalén, soc la yac' te ya xhowij te Judá.

¹²C'oht ta stojol jun carta yu'un te jalwanej Elías te hich la yal: Te Jehová te Dios yu'un te atat David, hich ya yalbat: Te bin ut'il ma ba la at'umbe sbe te atat Josafat soc te behetic yu'un Asa ajwalil yu'un Judá,

¹³pero ha la at'umbe te be yu'un te ajwaliletic yu'un Israel, soc la awac' te ya yac' sbahic ta antsinel c'ohem te Judá soc te mach'atic nahinemic ta Jerusalén, hich te bin ut'il la spas te mach'atic ay yu'un te Acab; soc la amil te awihts'nab, ha te mach'atic ay yu'un atat, te ha c'ax hich lequic a te bin ut'il ha'at;

¹⁴ha yu'un te Jehová ya me ya'be tulan wocol te pueblo awu'un, te anich'nab, te antsetic awu'un soc spisil bintic ay awu'un;

¹⁵soc ha'at ya me xtal bayel chameletic ta atojol, ha tulan chamel ta abiquil te ha ya xloc' ta scaj te ya xhalaj te chamele, xchi te Elías ta carta.

¹⁶Ha yu'un te Jehová la shach ta stojol Joram te yilimba te filisteohetic soc te árabehetic te nopol yiloj sbahic soc te etiopiahetic.

¹⁷Mohic tal ta scontrahinel te Judá, la yochintayic te q'uinal, la yich'ic bahel spisil bintic la stahic ta sna te ajwalil, soc la yiq'uic bahel te snich'nab soc te antsetic yu'une. Mayuc mach'a hil, ha xanix te Joacaz te xute.

¹⁸Ta patil spisil ini, te Jehová la ya'be chamel te Joram ta sbiquil te ma xhu' ta poxtayel.

¹⁹C'alal c'ax bayel c'ahc'al, c'alal loq'uix cheb ha'bil a, hahch ta loq'uel sbiquil yu'un te chamele, bayel sc'uxul a cham. Ma ba la stsunic c'ahc' yu'un sna'ojibal, hich te bin ut'il pasbotic te tatiletic yu'une.

²⁰Ay lahchayeb scha'winic (32) ya'bilal a te och ta ajwalil te Joram, waxaqueb ha'bil ay ta ajwalil ta Jerusalén. C'alal cham mayuc mach'a la smel yo'tan yu'un. La smuquic ta Pueblo yu'un David, pero ma ha'uc ta muquenaletic yu'un te ajwaliletique.