Read Tzeltal 2 Crónicas 22 Bible Online

2 Crónicas 22 - Tzeltal bible

2 Crónicas 22

¹Te mach'atic nahinemic ta Jerusalén la yotsesic ta sjelol ta ajwalil te Ocozías te xutul-nich'an Joram, como ay jtsohb jpoj-biluquetic chapalic soc ya'tejibic ta guerra te talemic soc te árabehetic, ochic ta campamento soc la smilic spisil te banquilaletic. Ha scuentahil te och ta ajwalil te Ocozías snich'an Joram, ajwalil yu'un Judá.

²Ay cheb scha'winic (22)[38] ya'bilal a te c'alal och ta ajwalil; jun ha'bil ay ta ajwalil ta Jerusalén. Atalía sbihil te snane, ha sts'umbal Omri.

³Ha nix hich te Ocozías la st'umbe sbe te sts'umbal Acab, como te snan la snohptes ta spasel te bin chopole.

⁴Chopol bin la spas ta stojol Jehová, hich te bin ut'il te sts'umbal Acab; como te c'alal cham te stat, ha'ic la ya'beyic snop, te hich ch'ayel baht.

⁵La sch'uhun spasel te bin halbot yu'unic, hich baht ta guerra soc Joram snich'an Acab, ajwalil yu'un Israel, ta scontrahinel Hazael ajwalil yu'un Siria ta Ramot yu'un Galaad, ta banti ehchentesot te Joram yu'un te siriahetique.

⁶Hich suht bahel ta Jezreel yu'un ya xlecub yu'un te yehchen te a'bot ta Ramot c'alal la ya'be guerra te Hazael ajwalil yu'un Siria. Te Ocozías snich'an Joram, ajwalil yu'un Judá, baht yula'tay te Joram snich'an Acab ta Jezreel, yu'un ay ta chamel tey a.

⁷Ha nix chapal yu'un Dios a ini, scuenta yu'un ya xlaj te Ocozías te c'alal baht yula'tay te Joram. Como te c'alal c'oht tey a, loc' bahel soc Joram ta scontrahinel te Jehú snich'an Nimsi, te tsahbilix yu'un Dios te ya slajin te mach'atic ay yu'un Acab.

⁸Te Jehú, c'alal yac ta ya'beyel castigo a te mach'atic ay yu'un te Acab, la sta te príncipaletic yu'un Judá soc te snich'nab te mach'atic pajal sts'umbal soc Ocozías, te ayic ta a'batinel yu'une, la smilticlan.

⁹Patil la sle te Ocozías te snac'oj sba ta Samaria. La stahic, la yiq'uic bahel ta stojol Jehú soc la smilic; pero la smuquic, yu'un la yalic: Ha sts'umbal Josafat, te mach'a spisil yo'tan la sle te Jehová, xchihic. Ha yu'un mayuc mach'a hil yu'un Ocozías te ya xhu' ya x'och ta ajwalil.

¹⁰Te Atalía snan Ocozías, c'alal la ya'iy te lajix te yale, hahch smil spisil mach'atic ay yu'un te ajwalil yu'un Judá.

¹¹Pero te Josaba, yantsil-nich'an te ajwalil Joram, muquen la yic' loq'uel te Joás snich'an Ocozías ta yohlil te yantic snich'nab te ajwalil te yaquic ta milel, la snac' soc te jcanan-alal yu'un ta jun stsalul na. Hich te Josaba, yantsil-nich'an te ajwalil Joram, yihnam te sacerdote Joiada, (yu'un ha swix te Ocozías), la snac' ta stojol Atalía, hich ma ba milot yu'un.

¹²Waqueb ha'bil te Joás nac'bil soc ta sna Dios, te c'alal ay ta ajwalil a te Atalía.