Read Tzeltal 2 Crónicas 23 Bible Online

2 Crónicas 23 - Tzeltal bible

2 Crónicas 23

¹Ta shuquebal ha'bil, te Joiada la yich' yip yo'tan, la schap sc'op soc te capitanetic yu'un te ho'ho'winic (100): ha te Azarías snich'an Jeroham, te Ismael snich'an Johanán, Azarías snich'an Obed, Maasías snich'an Adaía, soc te Elisafat snich'an Zicri.

²Behenic ta spahmal sq'uinal Judá, la stsobic tal spisil te levitahetic te ayic ta pueblohetic yu'un Judá soc te príncipaletic yu'un chahpalchahp na ta Israel, talic ta Jerusalén.

³Spisil te mach'atic stsoboj sbahic la schap sc'opic soc te ajwalil ta sna Dios. Te Joiada la yalbe: Ilawil, li' ay te snich'an te ajwalil te ya sc'an ya x'och ta ajwalil, hich te bin ut'il yaloj Jehová sc'oblal te sts'umbal David.

⁴Ha yu'un pasahic ini: Jchahp ta awoxchahpalic te ha'ex sacerdotehetic soc levitahetic te ya x'ochex ta a'tel ta sc'ahc'alel cux-o'tanil, ha jcanan-ti'nahiletic ya xc'ohex;

⁵te yan jchahp ya xbahtic ta sna te ajwalil; te jchahp xane ya xhilic ta yochibal te yich'o-ip, soc spisil te pueblo ya x'ayinic ta amac' yu'un te sna Jehová.

⁶Ma me ayuc mach'a ya x'och ta sna Jehová, ha nax te sacerdotehetic soc te levitahetic te ya x'a'tejic; ha'ic ya x'ochic como ch'uhltesbilic. Spisil te pueblo ya me ya'iyic canan ta stojol Jehová.

⁷Te levitahetic ya sjoytayic te ajwalil, jujutuhl ay ta sc'abic te ya'tejibic yu'un guerra. Mach'ayuc a te ya x'och bahel ta templo, ya me xlaj. Ya me ajoquinic te ajwalil ta bayuc ya xbaht, xchi.

⁸Te levitahetic soc spisil Judá la spasic spisil te bin halbotic ta mandar yu'un te sacerdote Joiada. Te jujutuhl jtsobaw la yic' bahel te mach'atic ayic ta scuenta, ha te mach'atic ya x'ochic ta a'tel ta sc'ahc'alel cux-o'tanil soc te mach'atic ya xloq'uic, como te sacerdote Joiada ma ba la yac'ticlan bahel.

⁹Soc te sacerdote Joiada la ya'be te jtsobawetic yu'un ho'ho'winic (100) te lanzahetic soc te muc' soc tut mahquilaletic te hilemic yu'un te ajwalil David, te ayic ta sna Dios;

¹⁰soc la yac' ya xchol sbahic spisil te winiquetic ta sjoyobal te ajwalil, jujutuhl stsacoj ta sc'abic te espada, hahch ta wa'el ta xuhc te templo c'alal ta q'uexam, ta ohlil yu'un te scajtajib mahtanil soc te Templo.

¹¹Hich la sloq'uesic tal te snich'an ajwalil, la ya'beyic corona soc te libro yu'un te Testigo-c'op, soc la yalic te ha ajwalil. Te Joiada soc te snich'nab la smalic ta aceite soc hahchic ta aw: ¡Viva ajwalil! xchihic.

¹²C'alal la ya'iy te Atalía te yawic te pueblo, te yaquic ta ahnimal soc ta yawtayel te ajwalil, tal ta banti ayic ta sna Jehová;

¹³la yil te ajwalil teq'uel ta sts'ehl te toyol bahlal oy ta yochibal te Templo, soc la yil te príncipaletic soc te j'oq'uesinej cornetahetic ta sts'ehl te ajwalil, soc spisil te pueblo te tse'el yo'tanic soc yacalic ta yoq'uesinel cornetahetic, soc la yil te jc'ayojetic soc a'tejibaletic yu'un música yaquic ta shachel c'ayojetic yu'un yalbeyel yutsilal. Hich te Atalía la sch'i' sc'u' yu'un, hich la yal ta aw: ¡J'ac'aw ta c'abal! ¡J'ac'aw ta c'abal! xchi ta aw.

¹⁴Pero te sacerdote Joiada la sticon bahel te jtsobawetic yu'un ho'ho'winic (100), hich la yalbe: Loq'uesahic te ants ta banti scholoj sbahic te soldadohetic, soc te mach'a ya st'un, milahic ta espada, xchi. Como te sacerdote yalojix mandar a te ma ba ya yich' milel ta sna Jehová.

¹⁵Ha yu'un la stsaquic te Atalía; c'alal c'axix bahel a ta yochibal yu'un cawuhetic ta sna ajwalil, tey la smilic a.

¹⁶Hich te Joiada la schap sc'op soc spisil te pueblo soc te ajwalil, te ha pueblo yu'un Jehová ya xc'ohtic.

¹⁷Ta patil spisil te pueblo bahtic ta templo yu'un Baal, la sjinic cohel; soc la sjinic te scajtajib ta chiq'uel mahtaniletic yu'un, la swuyic te loc'ombahetic soc la smilic ta stojol te scajtajib ta chiq'uel mahtaniletic te Matán sacerdote yu'un Baal.

¹⁸Patil te Joiada la yac' ta canantayel yu'un sacerdotehetic soc levitahetic te sna Jehová, hich te bin ut'il chapal yu'un David ta sna Jehová yu'un ya yaq'uic scohtol chic'bil mahtaniletic ta stojol Jehová, hich te bin ut'il ts'ihbabil hilel ta ley yu'un Moisés, soc ta sc'ayojtayel c'ayojetic ta scuenta yutsil yo'tanic, hich te bin ut'il schahpanej hilel te David.

¹⁹Soc la yac' jcanan-ti'nahiletic ta ochibaletic yu'un te sna Jehová scuenta yu'un ma ba ya x'och te mach'a bohloben sc'oblal.

²⁰Patil la yic' tal te jtsobawetic yu'un ho'ho'winic (100), te príncipaletic, te mach'atic scuentahinej te pueblo, soc spisil te ants-winiquetic yu'un te q'uinal, yu'un ya yiq'uic loq'uel ta sna Jehová te ajwalil. Ochic bahel ta ti'nahil ta ahc'ol ta sna ajwalil, la shuhcanic te ajwalil ta shuctajib.

²¹Mero tse'el yo'tanic spisil te pueblo; soc lamal q'uinal la ya'iy te pueblo, te bin ut'il la smiliquix ta espada te Atalía.