Read Tzeltal 2 Crónicas 25 Bible Online

2 Crónicas 25 - Tzeltal bible

2 Crónicas 25

¹Te Amasías ay ho'eb scha'winic (25) ya'bilal a te och ta ajwalil; baluneb scha'winic (29) ha'bil ay ta ajwalil ta Jerusalén. Joadán sbihil te snane, talem ta Jerusalén.

²Toj bin la spas ta stojol Jehová, aunque ma ba spisil yo'tan.

³C'alal la sta yip te ya'tel ta ajwalil, la smil te a'batetic te la smilbeyic te state.

⁴Pero ma ba la smilticlambe te snich'nabic, hich te bin ut'il ts'ihbabil ta Ley ta libro yu'un Moisés, te hich yaloj mandar te Jehová: Ma me xlaj te me'iltatiletic yu'un smul te al-nich'aniletic, soc ma me xlaj te al-nich'aniletic yu'un smul te me'iltatiletic. Jujutuhl ya xlaj yu'un te smule, te xchihe.

⁵Te Amasías la stsob tal spisil Judá ta scuenta chahpalchahp sts'umbalic, la ya'be jtsobawetic yu'un jujumil (1,000) soc ho'ho'winic (100) ta stojol spisil Judá soc Benjamín. Patil la yac' ta lista spisil te mach'atic ayix jtahb (20) ya'bilal, ay j'ohlil swaxaclajuneb scha'winic ta pic (300,000) ta tuhl te tsahbilic te ya xhu' yu'unic guerra soc lanza soc mahquilal.

⁶Soc la stoj j'ohlil yoxlajuneb ta pic (100,000) soldadohetic yu'un Israel ta ho'winic (100) talento[39] plata.

⁷Pero ay jtuhl winic yu'un Dios te tal ta stojol, hich la yalbe: Ajwalil, ma me xawac' sjoquinat te soldadohetic yu'un Israel, como te Jehová ma ba sjoquinej spisil te snich'nab Efraín ini.

⁸Teme hich yac apas te ya xbahat, te yac awac' fuersa ta yaq'uel guerra, Dios me ya yac' te ya xyahlat ta stojol te acontra, como te Dios ay yu'el ta scoltayel o ta sjinel, xchi.

⁹Te Amasías la sjoc'obe te winic yu'un Dios: Pero ¿bin ya yich' pasel yu'un te ho'winic (100) talento plata te la jca'be te soldadohetic yu'un Israel? xchi. La sjac' te winic yu'un Dios: Te Jehová c'ax to xan hich ya xhu' ya ya'bat a, xchi.

¹⁰Ha yu'un te Amasías la sticon suhtel te soldadohetic te talemic ta Efraín, yu'un ya xbahtic ta snahic. Bayel ilinic ta stojol Judá, ilinem a suhtic bahel ta snahic.

¹¹Te Amasías la yich' yip yo'tan, la yic' bahel te soldadohetic yu'un ta spamlej yu'un Ats'am, la smil jpic soc ho'bahc' (10,000) winiquetic yu'un Seir.

¹²Te winiquetic yu'un Judá cuxul la yiq'uic bahel jpic soc ho'bahc' (10,000) ta tuhl, la yiq'uic bahel ta sba toyol sacal ch'en, tey la sch'ojic cohel a, tojic ha'ubel sbaq'uetalic ta lum.

¹³Yan te soldadohetic te la sticon suhtel te Amasías, yu'un te ma ba ya sjoquinic ta guerra, la yochintayic te pueblohetic yu'un Judá c'alal Samaria ha to ta Bet-horón. La smilic j'ohlil swaxacbahc' (3,000) ta tuhl soc la yich'ic bahel bayel biluquetic.

¹⁴Te c'alal suht tal te Amasías ta smilel te edometic, la yich'be tal te diosetic yu'un te sts'umbal Seir, ha diosetic yu'un c'ohtic, la sch'uhuntay soc la schic'be pom.

¹⁵Ha yu'un tihl yilimba te Jehová ta stojol Amasías, la sticombe jalwanej te hich halbot yu'un: ¿Bin yu'un la ale te diosetic yu'un yan nación te ma ba hu' yu'unic scoltaybel te pueblo yu'un ta ac'ab? xchi sc'oblal.

¹⁶C'alal hich yac ta yalel a te jalwanej, la sjac' te ajwalil: ¿Yu'un bal awich'oj awa'tel ta j'ac'-o'tanil ta stojol te ajwalil? Coma aba. ¿Yu'un bal yac ac'an te ya jmilat? xchi. Scuenta slajibal hich la yal te jalwanej: Jna'oj te Dios snopoj ta yo'tan te ya slajinat yu'un te hich apasoj soc ma ba la ach'uhun te bin la jcalbat, xchi.

¹⁷Te Amasías ajwalil yu'un Judá, te c'alal laj ya'iybel sc'opic te j'ac'-o'taniletic yu'un, la sticon ta halbeyel te Joás snich'an Joacaz, snich'an Jehú, ajwalil yu'un Israel: La', ya quilbe jba jsitic, xchi.

¹⁸Ha yu'un te Joás ajwalil yu'un Israel hich la sticon ta halbeyel te Amasías, ajwalil yu'un Judá: Te ch'ix te ay ta Líbano la sticon ta halbeyel te cedro te ay ta Líbano: A'beya yic' te awantsil-nich'an te jquereme, xchi. Pero jun ha'mal chambahlam ta Líbano tal sts'o'ticlan hilel ta teq'uel te ch'ixe.

¹⁹Hich yac awal: Ilawil, la jtsalix te Edom, xchihat. Ha scuentahil yac atoy aba soc yac ale bin ut'il ya x'ich'otat xan ta muc'. Hilan ta ana. ¿Bin yu'un yac ale awocol te ya yac'at ta ch'ayel soc te Judá? xchi.

²⁰Pero te Amasías ma ba la yich' ta cuenta, como Dios la sc'an te ya ya'be ta sc'ab te scontra, ta scaj te la sle te diosetic yu'un Edom.

²¹Ha yu'un tal te Joás ajwalil yu'un Israel, la yilbe sba sit soc te Amasías ajwalil yu'un Judá ta guerra ta Bet-semes ta sq'uinal Judá.

²²Te Judá tsalot yu'un Israel, jujutuhl ahnic bahel ta snahic.

²³Te Joás ajwalil yu'un Israel la stsac ta Bet-semes te Amasías ajwalil yu'un Judá, snich'an Joás, snich'an Joacaz, la yic' bahel ta Jerusalén. La sjimbe sts'ahcul te Jerusalén c'alal ta yochibal Efraín ha to ta yochibal Xuhc, ha jbahc' (400) xuhc'ubil.[40]

²⁴Soc la yich'ticlan spisil te oro soc te plata, soc spisil bintic ay ta sna Dios te cuentahimbil yu'un te Obed-edom, te c'ulejalil ta sna te ajwalil soc te mach'atic tsahbilic, hich suht bahel ta Samaria.

²⁵Te Amasías snich'an Joás, ajwalil yu'un Judá, cuxaj ho'lajuneb (15) xan ha'bil a te c'alal cham te Joás snich'an Joacaz, ajwalil yu'un Israel.

²⁶Te bintic xan ya'tel te Amasías, ta shahchibal c'alal ta slajibal, ¿ma bal ts'ihbabil ta libro yu'un te ajwaliletic yu'un Judá soc yu'un Israel?

²⁷Te c'alal la yihquitay Jehová te Amasías, tey hahch ta schapbeyel sc'oblal ta milel ta Jerusalén. Te Amasías ahn bahel ta Laquis. Ay mach'atic ticombil bahel ta spat, tey c'oht smilic a.

²⁸La yiq'uic tal ta cawu, la smuquic soc sme'stat ta pueblo yu'un Judá.[41]