Read Tzeltal 2 Crónicas 26 Bible Online

2 Crónicas 26 - Tzeltal bible

2 Crónicas 26

¹Ha yu'un spisil te pueblo yu'un Judá la yiq'uic te Uzías,[42] ay waclajuneb (16) ya'bilal a, la yotsesic ta ajwalil scuenta sjelol te Amasías te state.

²Te Uzías la scha'pas xan te Elat soc la ya'be yich' yan buelta te Judá te c'alal chamix a te Amasías te state.

³Te Uzías ay waclajuneb (16) ya'bilal a te c'alal och ta ajwalil; lahchayeb yoxwinic (52) ha'bil ay ta ajwalil ta Jerusalén. Jecolías sbihil te snan, talem ta Jerusalén.

⁴Toj bin la spas ta stojol Jehová, hich te bin ut'il la spas te Amasías te state.

⁵Jun yo'tan ta stojol Dios te c'alal cuxul to a te Zacarías, te ha la snohptes ta yich'el ta muc' te Diose. Te c'alal jun yo'tan ta stojol Jehová lec c'oht yu'un te bin la spase.

⁶Te Uzías loc' bahel ta ya'beyel guerra te filisteohetic, la sjimbe sts'ahcul te Gat, Jabnia soc Asdod. La spas pueblohetic ta sq'uinal Asdod soc ta bayuc ta sq'uinal te filisteohetique.

⁷Dios coltayot yu'un ta scontrahinel te filisteohetic, árabehetic te nahinemic ta Gur-baal, soc te amonetic.[43]

⁸Te amonetic la stoj spatanic ta stojol Uzías, puhc bahel sc'oblal c'alal ta smojon Egipto, como bayel yip c'oht.

⁹Soc la spas ilo-q'uinaletic ta Jerusalén, ta nopol yochibal te xuhc, ta nopol yochibal te spamlej soc ta xuhc ts'ahc; soc la yac'ticlambe xan yip.

¹⁰Ha nix hich la spas ilo-q'uinaletic ta jochol taquin q'uinal, soc la sjoc' bayel pozohetic, como bayel schansbahlam ta tsehltsehltic soc ta spamlejetic. Soc ay winiquetic yu'un te a'tejic ta sq'uinal soc ta ts'usubiltic te ayic ta witsiltic soc ta spamlejetic te yaxal q'uinal, como bayel la smulan a'tel ta q'uinal.

¹¹Te Uzías ay soldadohetic yu'un te p'ijubenic ta guerra, chahpalchahp ya xloq'uic bahel ta guerra, hich te bin ut'il ta lista yu'un te Jehiel te secretario soc te Maasías te la sjoquin ta a'tel, te cuentahimbilic yu'un Hananías, jtuhl jtsobaw yu'un te ajwalil.

¹²Ay j'ohlil shucbahc' (2,600) ta tuhl jtsobawetic yu'un te chahpalchahp sna sme'stat, te ma xiwic soc ay yip yo'tanic.

¹³Ay ta scuentahic waxaclajuneb scha'winic ta pic soc waxacbahc' soc ho'lajunwinic (307,500) soldadohetic te tulanic soc ay yipic, te ya scoltayic te ajwalil ta ya'beyel guerra te scontrataque.

¹⁴Te Uzías la schahpambe smahquilic spisil te soldadohetic, soc slanzahic, smahquil sjolic, smahquil stahnic, st'ihmalte'ic, soc tonetic yu'un sjihmoch'ic.

¹⁵Soc la spas ta Jerusalén maquinahetic yu'un guerra te nopbil ta pasel yu'un winiquetic te ay sp'ijilic, te ya x'ayinic ta ilo-q'uinaletic soc ta jujun xuhc, yu'un st'imel bahel ya'tejibal t'ihmalte' soc sch'ojel bahel muc'ul tonetic a. Puhc bahel ta namal sc'oblal te Uzías, como bayel coltayot ha to c'alal la sta bayel yip.

¹⁶Pero te c'alal la sta yip, la stoy sba, hich la sta jinel yu'un. Ma junuc yo'tan ta stojol Jehová te Dios yu'un, ha och bahel ta templo yu'un Jehová ta schiq'uel pom ta scajtajib ta chiq'uel pom.

¹⁷Patil ochic bahel te sacerdote Azarías soc chanwinic (80) ta tuhl sacerdotehetic yu'un Jehová te ma xiwic,

¹⁸la stsac sbahic ta c'op, hich la yalic: Ajwalil Uzías, ma ha'ucat ay ta acuenta schiq'uel pom ta stojol Jehová, ha ay ta scuentahic te sacerdotehetic te ha sts'umbal Aarón, te ch'uhltesbilic yu'un schiq'uel te pom. Loc'an bahel ta ch'ul awilal, como la ata amul, ma ba ya yac'at ta ich'el ta muc' yu'un te Jehová, xchihic.

¹⁹Te Uzías, ay ta sc'ab a te schic'ojibal pom yu'un ya schic' pom, bayel ilin ta stojol te sacerdotehetic. Ta hich ora loc' tal c'a'el-chamel ta sti'ba, ta stojol te sacerdotehetic ta sna Jehová, ta sts'ehl te scajtajib ta chiq'uel pom.

²⁰C'alal la yil te muc'ul sacerdote Azarías soc spisil te yantic sacerdotehetic te ayix c'a'el-chamel ta sti'ba, ora la sloq'uesic bahel; soc hich nix loc' bahel ta ora, como ehchentesot yu'un Jehová.

²¹Te ajwalil Uzías ay sc'a'el-chamel ha to c'alal cham, ha yu'un yan na banti nahin, soc ma ba ac'ot ochel ta sna Jehová. Te Jotam te snich'an la scuentahin te sna ajwalil soc la scuentahin te ants-winiquetic yu'un te q'uinale.

²²Te bintic xan la spas te Uzías, ta shahchibal c'alal ta slajibal, la sts'ihbay te jalwanej Isaías snich'an Amoz.

²³Cham[44] te Uzías, la smuquic soc sme'stat ta muquenal ta sq'uinal ajwaliletic, como la yalic: Ay sc'a'el-chamel, xchihic. Ha och ta sjelol ta ajwalil te Jotam te snich'ane.