Read Tzeltal 2 Crónicas 28 Bible Online

2 Crónicas 28 - Tzeltal bible

2 Crónicas 28

¹Te Acaz ay jtahb (20) ya'bilal a te c'alal och ta ajwalil; waclajuneb (16) ha'bil ay ta ajwalil ta Jerusalén. Pero ma ba toj bin la spas ta stojol Jehová, ma hichuc te bin ut'il te David te namey stat.

²Ha la st'umbe sbe te ajwaliletic yu'un Israel soc la spasticlan loc'ombahetic yu'un Baal ta uhltesbil taq'uin.

³La schic' pom ta sjuclej yu'un Ben-hinom soc la schic' te snich'nab, hich te bin ut'il te ihlaybil ya'telic te yantic nacionetic te tenotic loq'uel yu'un Jehová ta stojol te snich'nab Israel.

⁴Ha nix hich la yac' milbil mahtaniletic soc la schic' pom ta toyol awilaletic, ta sba tsehltsehltic soc ta ye'tal spisil te'etic te bayel ya'binal.

⁵Ha scuentahil te Jehová te Dios yu'un la ya'be ta sc'ab te ajwalil yu'un Siria. Te siriahetic la stsalic soc la schuquic bahel bayelic ta Damasco. Soc te Acaz ac'ot ta sc'ab te ajwalil yu'un Israel, bayel a'bot swocol yu'un.

⁶Te Peka snich'an Remalías la smil ta Judá ta junax c'ahc'al ho'lajunpic (120,000) ta tuhl winiquetic te ma xiwic, ta scaj te la yihquitay te Jehová te Dios yu'un te sme'statique.

⁷Ha nix hich te Zicri, te bayel yip ta winiquil ta Efraín, la smilticlan te Maasías snich'an te ajwalil, te Azricam te mayordomo yu'un, soc Elcana te nahil smohlol ta a'tel te ajwalile.

⁸Soc te snich'nab Israel la schuquic bahel ho'eb scha'winic ta pic (200,000) te yermanotac, ha te antsetic, queremetic, ach'ixetic, soc bayel biluquetic te la yich'ic bahel ta Samaria.

⁹Ay jtuhl jalwanej yu'un Jehová tey a, ha te Oded sbihil, loc' ta stahel te soldadohetic te c'alal yacalic ta ochel bahel ta Samaria a, hich la yalbe: Te Jehová te Dios yu'un te ame'atatic la ya'beyex ta ac'abic te Judá ta scaj te ilin ta stojolic. Te ha'ex la amilic ta scuenta hich smuc'ul awilimbahic te c'ohtix c'alal ta ch'ulchan.

¹⁰Yo'tic la anopic te yac awaq'uic ta mosohil te ants-winiquetic yu'un Judá soc Jerusalén. Pero ¿yu'un bal ma ba atahoj amulic ta stojol Jehová te Dios awu'unique?

¹¹A'iybon awa'iyic jc'op, suhtesahic bahel te awermanotac te la achuquic tal, como te Jehová bayel ilinem ta atojolic yu'un, xchi.

¹²Ha yu'un te Azarías snich'an Johanán, te Berequías snich'an Mesilemot, te Ezequías snich'an Salum, soc Amasa snich'an Adlai, ha te príncipaletic yu'un Efraín, hahch stsac sbahic ta c'op soc te mach'atic yacalic ta suhtel tal ta guerra,

¹³hich la yalbeyic: Ma xawiq'uic tal li'i te jchuqueletic, yu'un yac awaq'uic jmulintic ta stojol te Jehová. Yac awac' xtohy xan jmultic yu'un a, como muq'uix te jmultic soc tihlemix yilimba Jehová ta stojol Israel, xchihic.

¹⁴Ha yu'un te soldadohetic la scoltayic te jchuqueletic soc la yihquitayic hilel te biluquetic ta stojol te príncipaletic soc spisil te pueblo.

¹⁵Ha yu'un hahch te winiquetic te loc' sbihilic, la yiq'uic tal te jchuqueletic, te mach'atic watalic la yac'ticlambeyic slapic te bintic spojojic, la ya'beyic slap sc'u'ic soc stepic, la ya'beyic swe'elic soc la ya'beyic yuch'ic ha', la smalbeyic aceite ta yehchenic, soc la smohtesic ta burrohetic spisil mach'atic mayuc yipic, la yiq'uic bahel c'alal ta Jericó, te pueblo yu'un xahnetic, ta nopol te banti ay te yermanotac; hich suhtic bahel ta Samaria.

¹⁶Ta hich ora te ajwalil Acaz la sticon ta halbeyel te ajwaliletic yu'un Asiria te yacuc xtal ta coltayel yu'un.

¹⁷Como te edometic cha'talic ta ya'beyel guerra te Judá, soc ay mach'atic la yiq'uic bahel ta chuquel.

¹⁸Ha nix hich te filisteohetic la yochintayic te pueblohetic ta tsehltsehltic soc ta Neguev te ay ta scuenta Judá, soc la yu'untayic te Bet-semes, Ajalón soc Gederot, Soco, Timna, Gimzo soc te tut pueblohetic yu'unic, soc tey nahinic a.

¹⁹Como te Jehová la spehc'anix te Judá ta scaj te Acaz ajwalil yu'un Israel, como ma ba la scom ta spasel ta Judá te bin chopol, bayel stahoj smul ta stojol te Jehová.

²⁰Ha nix hich te Tiglat-pileser ajwalil yu'un Asiria tal ta stojol, ma ba la scoltay, ha la ya'be swocol.

²¹Te Acaz, aunque la sloq'ues te biluquiletic ta sna Jehová, ta sna ajwalil soc ta snahic te príncipaletic, yu'un ya ya'be te ajwalil yu'un Asiria, ma ba la sta coltayel yu'un.

²²Te bin ora ay swocol te Acaz, la to sta xan smul ta stojol Jehová;

²³yu'un la ya'be milbil mahtaniletic te diosetic yu'un Damasco te ha nix tsalot yu'unic, hich la yal: Te bin ut'il te ajwaliletic yu'un Siria coltayotic yu'un te diosetic yu'unic, ha nix hichon ya ca'be milbil mahtaniletic yu'un ya scoltayonic, xchi. Pero ha sjinojibal c'oht soc spisil Israel.

²⁴Soc te Acaz la stsob te biluquetic ta sna Dios, la swuyticlan, la smac te puertahetic yu'un te sna Jehová soc la spas scajtajib ta chiq'uel mahtaniletic ta jujun xuhc ta Jerusalén.

²⁵La spas toyol awilaletic ta spisil pueblohetic ta Judá scuenta schic'beyel pom te yantic diosetic, hich la shachbe yilimba te Jehová te Dios yu'un te sme'statique.

²⁶Te bintic xan sc'oblal te Acaz soc te bintic la spas, ta shahchibal c'alal ta slajibal, ts'ihbabil hilel ta libro yu'un te ajwaliletic yu'un Judá soc Israel.

²⁷Cham[48] te Acaz, la smuquic ta Jerusalén, pero ma ba la smuquic ta smuquenal te ajwaliletic yu'un Israel. Ha la sjelolin ta ajwalil te Ezequías te snich'ane.