Read Tzeltal 2 Crónicas 29 Bible Online

2 Crónicas 29 - Tzeltal bible

2 Crónicas 29

¹Ay ho'eb scha'winic (25) ya'bilal a te Ezequías c'alal och ta ajwalil; baluneb scha'winic (29) ha'bil ay ta ajwalil ta Jerusalén. Abi sbihil te snane, ha yantsil-nich'an Zacarías.

²Toj bin la spas ta stojol Jehová, hich te bin ut'il la spas te David te namey state.

³Ta shahchibal u ta shahchibal ha'bil yochel ta ajwalil a la sjamticlan te puertahetic yu'un te sna Jehová soc la scha'pas xan.

⁴La yic' tal te sacerdotehetic soc levitahetic, la stsobticlan ta plaza ta stojol banti ya xloc' tal c'ahc'al,

⁵hich la yalbe: ¡Levitahetic, a'iybon awa'iyic jc'op! Ch'ultesa abahic yo'tic soc ch'ultesahic te sna Jehová te Dios yu'un ame'atatic, soc loq'uesahic ta ch'ul awilal te bin bohloben sc'oblal.

⁶Como te jme'jtatic ma junuc yo'tanic, chopol bin la spasic ta stojol Jehová te Dios cu'untic, la yihquitayic te Diose soc yan banti la yac' sitic ta stojol te nahilpac' templo yu'un Jehová, la swalac'patiyic.

⁷La smaquic te puertahetic yu'un te slehchul-na, la stup'ic te tsumbil c'ahc', ma ba la schiq'uic pom soc ma ba la yaq'uic scohtol chic'bil mahtaniletic ta stojol te Dios yu'un Israel.

⁸Ha yu'un tal yilimba Jehová ta stojol Judá soc Jerusalén, la yac' te ya xhahch xiwel ta stojolic soc bintic xiweltic sba soc labanel, hich te bin ut'il awilojic ta asitic te ha'exe.

⁹Ilawilic, lajic ta espada te jme'jtatic, soc ic'otic bahel ta chuquel te queremetic, ach'ixetic soc te antsetic cu'untique.

¹⁰Ha yu'un yo'tic ho'on jnopoj te ya jchap jc'op soc Jehová te Dios yu'un Israel scuenta yu'un hich ya xloc' bahel a te yilimba ta jtojoltic.

¹¹Cal-jnich'nab, ma me xch'ajubex, como tsahbilex yu'un Jehová yu'un ayex ta stojol soc yac awac' abahic ta a'batinel yu'un, te yac apasbe ya'tel soc te yac achic'beyic pom, xchi.

¹²Hich hahchic ta a'tel te levitahetic: ta sts'umbal Coat: ha te Mahat snich'an Amasai, soc Joel snich'an Azarías; ta sts'umbal te Merari: ha te Cis snich'an Abdi, soc Azarías snich'an Jehaleel; ta sts'umbal Gersón: ha te Joa snich'an Zima, soc Edén snich'an Joa;

¹³ta sts'umbal Elizafán: ha te Simri soc Jehiel; ta sts'umbal Asaf: ha te Zacarías soc Matanías;

¹⁴ta sts'umbal Hemán: ha te Jehiel soc Simei; ta sts'umbal Jedutún: ha te Semaías soc Uziel.

¹⁵Ha'ic la stsobic te yermanotac, la sch'ultes sbahic soc ochic bahel ta sch'ultesel te templo, hich te bin ut'il yaloj ta mandar te ajwalil soc te sc'op te Jehová.

¹⁶Te c'alal ochic bahel te sacerdotehetic ta yutil te sna Jehová ta slecubtesel, la sloq'uesic ta yamaq'uil te sna Jehová spisil bintic bohloben sc'oblal ta templo yu'un Jehová. Te levitahetic la yich'ic bahel ta uc'um Cedrón.

¹⁷Hahchic ta ch'ultesel ta sba c'ahc'alil ta shahchibal u; ta swaxaquebal c'ahc'al ta u nix c'ohtic ta slehchul-na yu'un Jehová. Waxaqueb c'ahc'al la sch'ultesic te sna Jehová. Ta swaclajunebal (16) c'ahc'al ta shahchibal u hu' yu'unic.

¹⁸Hich talic ta stojol te ajwalil Ezequías, hich la yalbeyic: La jlecubtescotic spisil te sna Jehová: ha te scajtajib scohtol schic'bil mahtanil soc spisil te a'tejibaletic, soc te mesa yu'un te pan ac'bil ta stojol Dios soc te bintic ya xtuhun tey a.

¹⁹Soc la jchahpancotic soc la jlecubtescotic spisil te bintic ya xtuhun ta templo te la sloq'ues te ajwalil Acaz ta scaj te ma ba jun yo'tan ta stojol Dios; yo'tic ayic ta stojol te scajtajib ta chiq'uel mahtanil yu'un Jehová, xchihic.

²⁰Te ajwalil Ezequías hahch ta buen sab, la stsob te príncipaletic yu'un te pueblo, mo bahel ta sna Jehová.

²¹La yiq'uic tal huqueb jcolel torohetic, huqueb tat tuminchijetic, huqueb tuminchijetic soc huqueb tentsunetic scuenta stojel mulil yu'un te ban c'alal smacoj ta ajwalil, yu'un te templo, soc yu'un Judá. Te ajwalil la yalbe te sacerdotehetic te sts'umbal Aarón te ya me yaq'uic ta scajtajib mahtanil yu'un Jehová.

²²Hich te sacerdotehetic la smilic te colel torohetic, la sch'ambeyic te sch'ich'el, la smalic ta sjoyobal te scajtajib ta chiq'uel mahtanil. Ha nix hich la smilic te tat tuminchijetic, te sacerdotehetic la yich'ic te sch'ich'el, la smalic ta sjoyobal te scajtajib ta chiq'uel mahtanil.

²³Ta patil la yiq'uic tal te tat tentsunetic ta stojol te ajwalil soc ta stojol te pueblo scuenta stojel mulil; la scajan sc'abic ta sjolic.

²⁴Te sacerdotehetic la smilic soc la smalbeyic sch'ich'el ta sjoyobal te scajtajib ta chiq'uel mahtanil scuenta stojel mulil yu'un spisil Israel, como la yalix mandar te ajwalil te ya yich' pasel te scohtol chic'bil mahtanil soc te stojel mulil yu'un spisil Israel.

²⁵Te ajwalil Ezequías la yac' levitahetic ta sna Jehová soc platillo, lira soc arpahetic, hich te bin ut'il yaloj mandar te David, te Gad te jalwanej yu'un te ajwalil, soc te jalwanej Natán, como te mandar ini ha nix Jehová la yal ta scuenta te jalwanejetic yu'une.

²⁶Te levitahetic yich'ojic te a'tejibaletic yu'un música yu'un David, soc te sacerdotehetic yich'ojic cornetahetic.

²⁷Ha yu'un te Ezequías la yal mandar te ya yich' aq'uel te scohtol chic'bil mahtanil ta scajtajib. Te c'alal hahch ta aq'uel te scohtol chic'bil mahtanil, ha nix hich hahch te c'ayoj yu'un Jehová soc cornetahetic soc te a'tejibaletic yu'un música yu'un David te ajwalil yu'un Israel.

²⁸Spisil te pueblo la sch'uhuntayic, c'ayojinic te jc'ayojetic, te j'oq'uesinej cornetahetic la yoq'uesinic te cornetahetique. Halaj spisil ini ha to c'alal laj ta chiq'uel te scohtol chic'bil mahtanil.

²⁹Te c'alal laj ta aq'uel, te ajwalil soc te mach'atic sjoquinej la squejan sbahic, la sch'uhuntayic te Diose.

³⁰Te ajwalil Ezequías soc te príncipaletic la yalbeyic te levitahetic te yacuc yalbeyic yutsil sc'oblal Jehová ta c'opetic yu'un David soc te jalwanej Asaf. Bayel yutsil yo'tanic c'ayojinic, la snijan sbahic ta sch'uhuntayel.

³¹Patil hich la yal te ajwalil Ezequías: Yo'tic, ha'ex ach'ultesejix abahic ta stojol te Jehová; nohpojanic tal hiche, ac'ahic milbil mahtaniletic soc mahtaniletic scuenta yalel wocol, xchi. Hich te pueblo la yaq'uic milbil mahtaniletic soc mahtaniletic scuenta yalel wocol; soc spisil te mach'atic ay sc'anojel yo'tanic la yiq'uic tal scohtol chic'bil mahtaniletic.

³²Te jayeb scohtol chic'bil mahtaniletic la yiq'uic tal te pueblo, ha lajuneb schanwinic (70) torohetic, ho'winic (100) tat tuminchijetic, soc lajunwinic (200) tuminchijetic, scuenta scohtol chic'bil mahtanil yu'un Jehová.

³³Te chambahlametic scuenta mahtaniletic, ha lajunwinic scha'bahc' (600) torohetic soc j'ohlil swaxacbahc' (3,000) tuminchijetic.

³⁴Pero mayuc tsobol sacerdotehetic, ma ba hu' yu'unic xcho'el te scohtol chic'bil mahtaniletic. Ha yu'un coltayotic yu'un te yermanotac levitahetic ha to c'alal laj te a'tel, soc ha to c'alal la sch'ultes sbahic te yantic sacerdotehetic, como te levitahetic c'axem to xan hich yo'tanic te ya sch'ultes sbahic te bin ut'il te sacerdotehetique.

³⁵Hich ay bayel scohtol chic'bil mahtaniletic la yich'ticlan aq'uel soc te sjuhp'el te milbil mahtaniletic scuenta lamal q'uinal, soc malbil mahtaniletic te ya yich' malel soc jujun scohtol chic'bil mahtaniletic. Hich cha'hahch te a'tel ta sna Jehová.

³⁶Tse'el yo'tanic te Ezequías soc spisil te pueblo yu'un te bin la spas Dios ta stojol te pueblo, como ora nax la yich' pasel.