Read Tzeltal 2 Crónicas 3 Bible Online

2 Crónicas 3 - Tzeltal bible

2 Crónicas 3

¹Te Salomón hahch ta spasel te sna Jehová ta Jerusalén, ta wits Moriah, ta banti la yac' sba ta ilel Jehová ta stojol David te stat; tey ta lugar te schahpanejix te David ta swuyojibal trigo yu'un te Ornán te jebuseo-winique.

²Hahch ta spasel ta schebal c'ahc'al ta schebal u ta schanebal ha'bil yochel ta ajwalil a.

³Hich ay te sp'isol te yich'o-ip te sna Dios te la yac' te Salomón: oxwinic (60) xuhc'ubil[3] snahtil soc jtahb (20) xuhc'ubil[4] sjamalil.

⁴Te slehchul ta yochibal te na, jtahb (20) xuhc'ubil, pajal soc te sjamalil te na, soc jtahb (20) xuhc'ubil stoyolil. Te Salomón la spots ta lequil oro te yutile.

⁵La smac ta tabla yu'un ciprés te muc'ul tsahl yu'un te Na, la spots ta lequil oro, soc la spasticlambe sch'ahlel ta sloc'omba xahnetic soc cadenahetic.

⁶Soc la sch'ahl ta t'ujbil tonetic te Nahe; te oro talem ta Parvaim.

⁷La spots ta oro te yutil te Na, ha te ts'amte'etic, marcohetic, pahq'uetic soc te puertahetique. Soc la spasticlambe ta sch'ahlel sloc'omba querubinetic ta pahc'.

⁸La spas te Mero Ch'ul Awilal, jtahb (20) xuhc'ubil snahtil, ha nix pajal soc sjamalil te Na, soc jtahb (20) xuhc'ubil te sjamalile. La spots te yutil ta j'ohlil scha'bahc' (600) talento[5] lequil oro.

⁹Te lawuxetic pasbilic ta oro, ha lajuneb yoxwinic (50) siclo yalal[6] te jujune. Ha nix la spots ta oro te tsahlaltsahl ta scha'cajal.

¹⁰Ta yutil te Mero Ch'ul Awilal la spas cheb querubinetic ta te' soc la spots ta oro.

¹¹Te snahtil te xiq'uic te querubinetic jtahb (20) xuhc'ubil ta spisil. Te jun xic' ho'eb xuhc'ubil[7] snahtil te ya sta te pahc' yu'un te Na soc te yan xic' te ha nix ho'eb xuhc'ubil ya sta sba soc te xic' te yan querubin.

¹²Ha nix hich te xic' te yan querubín ho'eb xuhc'ubil snahtil, te ya sta te pahc' yu'un te Na, soc te yan xic' pajal sp'isol te la sta te xic' te yan querubín.

¹³Te querubinetic ini, te jtahb (20) xuhc'ubil snahtil te xiq'uic, tec'ajtic soc yac yilbelic bahel ta stojol te muc'ul tsahl.

¹⁴Soc la spas te jlihc tsahlul pac' ta yax, chi'in-yax, soc tsajal estambre soc lequil lino, soc la yac' ta ch'alel ta ts'isel sloc'omba querubinetic tey a.

¹⁵Ta sts'ehl sti'il te Na la spas cheb bahlal oyetic te ho'lajuneb scha'winic (35) xuhc'ubil[8] stoyolil, soc wolajtic sni'il te ho'eb xuhc'ubil snahtil.

¹⁶La spas jalbil cadenahetic, la yac'ticlan scuenta sch'ahlel ta sjol te oyetic; soc la spas ho'winic (100) granadahetic te la sjoc'anlan ta cadenahetic.

¹⁷La stehc'an te oyetic ta sts'ehl sti'il te Templo, jun ta wa'el soc jun ta q'uexam. Te oy ta wa'el la ya'be sbihilin Jaquín, te yan ta q'uexam, Boaz.