Read Tzeltal 2 Crónicas 30 Bible Online

2 Crónicas 30 - Tzeltal bible

2 Crónicas 30

¹Te Ezequías la sticon ta halel ta stojol spisil Israel soc Judá, soc la sts'ihbabe cartahetic te mach'atic ayic ta Efraín soc Manasés, te yacuc xtalic ta sna Jehová ta Jerusalén ta spasel te Q'uin Pascua yu'un Jehová te Dios yu'un Israel.

²Yu'un te ajwalil soc te príncipaletic soc spisil te pueblo ta Jerusalén snopojic te ya spasic te Q'uin Pascua ta schebal u,

³como ma ba la yich' pasel ta mero sc'ahc'alel ta scaj te mayuc tsobol te sacerdotehetic te sch'ultesej sbahic, soc ma ba stsoboj sbahic te pueblo ta Jerusalén.

⁴Lec la ya'iy te ajwalil soc spisil te pueblo te hich ya spasique.

⁵Soc la snopic te ya yich' puhquel ta halel ta spisil Israel, c'alal Beerseba ha to ta Dan, te yacuc xtalic ta Jerusalén ta spasel te Q'uin Pascua yu'un Jehová te Dios yu'un Israel; como bayelix ha'bil te ma ba la yich' pasel te q'uin hich te bin ut'il ts'ihbabil hilel.

⁶Hich loq'uic bahel jpuc-c'opetic ta spisil sq'uinal Israel soc Judá ta spuquel te cartahetic yu'un te ajwalil soc te príncipaletic yu'unic, hich te bin ut'il yaloj ta mandar te ajwalil, te hich la yal ta carta: Snich'nab Israel, suhtanic tal ta stojol Jehová, te Dios yu'un Abraham, Isaac soc Israel, hich te Jehová ya suht tal ta stojol te mach'atic colic hilel ta sc'ab te ajwaliletic yu'un Asiria.

⁷Ma me hichuquex te bin ut'il ame'atatic soc te awermanotac te la stoy sbahic ta stojol Jehová te Dios yu'un te sme'static, te hich ac'otic ta jinel yu'un, hich te bin ut'il yac awilic ta ora ini.

⁸Ma me tulanuc xawac' awo'tanic, hich te bin ut'il la spas te ame'atatique; ac'a abahic ta cuentahinel yu'un Jehová, soc la'ic ta ch'ul awilal yu'un te la sch'ultes scuenta sbahtel q'uinal. Ac'a abahic ta a'batinel yu'un te Jehová te Dios awu'unic, hich me ya xquehchaj a te yilimba ta atojolic.

⁹Yu'un teme ya suhtex tal ta stojol te Jehová, te awermanotac soc te anich'nabic ya me stahic c'uxultayel yu'un ta stojol te mach'atic chucbilic bahel yu'unic, soc ya me suhtic talel li' ta q'uinal ini; como te Jehová te Dios awu'unic lec yo'tan soc ha jc'uxultaywanej stuquel, ma yanuc banti ya yil bahel ta atojolic teme ya suhtex tal ta stojol, xchi.

¹⁰Hich te jpuc-c'opetic behenic ta jujuntic pueblo ta sq'uinal Efraín soc Manasés, ha to c'alal ta Zabulón; pero la stse'layic soc la slabanic.

¹¹Pero ay nix winiquetic ta Aser, Manasés soc Zabulón te la spehc'an sbahic, soc talic ta Jerusalén.

¹²Ha nix hich ta Judá tijbot yo'tanic yu'un Dios te jun yo'tanic ya spasic te bin la yal ta mandar te ajwalil soc te príncipaletic, hich te bin ut'il yaloj te Jehová.

¹³Bayel la stsob sbahic ta Jerusalén ta schebal u ta spasel te Q'uin yu'un Pan te ma ba yich'oj levadura; mero tsobolic.

¹⁴La sloq'uesic te scajtajib ta chiq'uel mahtaniletic te ayic ta Jerusalén, soc la sloq'uesic spisil te scajtajib ta chiq'uel pom, la sch'ojic bahel ta uc'um Cedrón.

¹⁵Ta schanlajunebal (14) c'ahc'al ta schebal u la smilic te tuminchijetic yu'un Pascua. Te sacerdotehetic soc te levitahetic bayel q'uexawic, hich hahch sch'ultes sbahic, soc la yiq'uic tal ta sna Jehová te scohtol chic'bil mahtaniletique.

¹⁶Bahtic ta lugar yu'unic ta Templo, hich te bin ut'il ya yal te ley yu'un Moisés te winic yu'un Dios. Te sacerdotehetic la smalic te ch'ich' te a'botic yu'un te levitahetique.

¹⁷Ay to bayel ants-winiquetic te ma ba sch'ultesej sbahic, ha yu'un te levitahetic la smilic te jcolel tuminchijetic yu'un te Pascua ta scuenta spisil te mach'atic ma ba slecubtesej sbahic, scuenta yu'un ya yich'ic ch'ultesel te stuminchijic ta stojol Jehová.

¹⁸Como bayelic te talemic ta Efraín, Manasés, Isacar soc Zabulón, ma ba la spasic hich te bin ut'il ts'ihbabil hilel, la swe'ic te pascua aunque ma ba la sch'ultes sbahic. Pero te Ezequías la sc'opombe Dios ta stojolic, hich la yal: Te Jehová, te lec yo'tan, ac'a spasbe perdón te mach'atic schahpanej yo'tanic ta slehel te Dios,

¹⁹ha te Jehová te Dios yu'un te sme'static, aunque ma ba slecubtesej sbahic hich te bin ut'il ya yal te mandariletic yu'un te ch'ul awilal scuenta ch'ultesel, xchi.

²⁰Te Jehová la ya'iybe sc'op te Ezequías, la spasbe perdón te pueblo.

²¹Ha yu'un te snich'nab Israel te ayic ta Jerusalén, tse'el yo'tanic la spasic huqueb c'ahc'al te Q'uin yu'un Pan te ma ba yich'oj levadura. Te levitahetic soc te sacerdotehetic la sc'ayojtaybeyic yutsil sc'oblal Jehová jujun c'ahc'al soc te a'tejibaletic yu'un música yu'un Jehová te tulan ya xc'opojique.

²²Te Ezequías la ya'be xan yip yo'tanic te levitahetic te la yaq'uic ta ilel te ay sp'ijil yo'tanic ta spasel te ya'tel te Jehová. Huqueb c'ahc'al la swe'ic te milbil mahtanil ac'bil yu'un te q'uin, la yaq'uic milbil mahtaniletic scuenta lamal q'uinal soc la yalbeyic wocol te Jehová te Dios yu'un te sme'statique.

²³Spisil te pueblo la snopic te ya spasic q'uin huqueb xan c'ahc'al; hich tse'el yo'tanic la spasic q'uin huqueb xan c'ahc'al.

²⁴Como te Ezequías ajwalil yu'un Judá la ya'be te pueblo lajunwinic yoxbahc' (1,000) jcolel torohetic soc j'ohlil swaxaclajunbahc' (7,000) tuminchijetic. Soc te príncipaletic la ya'beyic te pueblo lajunwinic yoxbahc' (1,000) jcolel torohetic soc jpic soc ho'bahc' (10,000) tuminchijetic; soc bayel sacerdotehetic sch'ultesejix sbahic a.

²⁵Tse'el yo'tanic spisil te pueblo Judá, soc ha nix hich te sacerdotehetic, levitahetic soc spisil te mach'atic talemic ta Israel, soc nix te jyanlumetic te hahchemic tal ta sq'uinal Israel soc te nahinemic ta Judá.

²⁶Ay bayel yutsil yo'tanic ta Jerusalén, como ha to c'alal ta yorahil Salomón snich'an David, ajwalil yu'un Israel, mayuc hich c'ohem ta pasel ta Jerusalén.

²⁷Patil te sacerdotehetic soc te levitahetic la stehc'an sbahic, la ya'beyic bendición te pueblo; a'iybot sc'opic yu'un Dios, te bin la yalic ta sc'oponel Dios c'oht c'alal ta ch'ulchan, ta ch'ul awilal yu'un.