Read Tzeltal 2 Crónicas 31 Bible Online

2 Crónicas 31 - Tzeltal bible

2 Crónicas 31

¹C'alal laj ta pasel ini, spisil te israeletic te tey ayic a bahtic ta pueblohetic yu'un Judá, la swuyic te ch'ultesbil tonetic, la sjinticlanic te loc'ombahetic yu'un Asera, te toyol awilaletic soc te scajtahib ta chiq'uel mahtaniletic ta spisil sq'uinal Judá soc Benjamín, soc nix ta Efraín soc Manasés, ha to c'alal laj spisil. Patil suhtic bahel spisil te israeletic ta pueblohetic yu'unic, jujutuhl ta sq'uinalic.

²Te Ezequías la schahpan te sacerdotehetic soc te levitahetic bin ut'il ya sjel sbahic ta a'tel, ha chican bin ya'telic jujutuhl, ta yaq'uel scohtol chic'bil mahtaniletic soc milbil mahtanil scuenta lamal q'uinal, ta spasel ya'telic ta puertahetic yu'un te amaq'uetic yu'un Jehová, ta yalbeyel wocol soc ta sc'ayojtaybeyel yutsil sc'oblal.

³Te ajwalil la yac' te bintic ay yu'un scuenta scohtol chic'bil mahtanil ta sab soc ta tibiltic, soc yu'un te sc'ahc'alel cux-o'tan, yach'il u soc yantic q'uinetic, hich te bin ut'il ts'ihbabil hilel ta ley yu'un Jehová.

⁴Soc la spas ta mandar te mach'atic nahinemic ta Jerusalén te ya me ya'beyic te sacerdotehetic soc levitahetic te bintic ay ta scuentahic te ya x'a'botic, scuenta yu'un jun yo'tanic ya spasic bin ya yal te ley yu'un Jehová.

⁵C'alal puhc bahel te mandar ini, te snich'nab Israel la yaq'uic bayel sba sit trigo, vino, aceite, chab, soc spisil te sit awal-ts'unubiletic. Soc bayel la yich'ic tal te jun ta slajunebal ta spisil bintic ay yu'unique.

⁶Hich nix te snich'nab Israel soc Judá te nahinemic ta pueblohetic ta Judá, la yaq'uic te jun ta slajunebal te wacaxetic soc tuminchijetic yu'unic, soc te jun ta slajunebal te bintic ch'ultesbil te ac'bilic ta stojol te Dios yu'unique; spisil la sbusanlanic.

⁷Ta yoxebal u hahchic ta sbusanlanel te biluquetic, ha laj yo'tanic ta shuquebal u.

⁸Te Ezequías soc te príncipaletic c'alal tal yilic te busajtic, la yalbeyic lec sc'oblal te Jehová soc te pueblo Israel yu'une.

⁹Te Ezequías la sjoc'obe te sacerdotehetic soc te levitahetic sc'oblal te bintic busajtique.

¹⁰Te muc'ul sacerdote Azarías sts'umbal Sadoc, la sjac': Te bin ora hahch yich'ic tal te mahtaniletic yu'unic ta sna Jehová c'alal ora, we'otcotic soc noj jch'uhtcotic, soc bayel to hilem, como te Jehová ya'beyej bendición te pueblo yu'un, soc ay hilem hich yipal ini, xchi.

¹¹Ha yu'un te Ezequías la yal mandar te ac'a spasic ta sna Jehová te banti ya yich'ic q'uejel. Hich la spasic,

¹²soc jun yo'tanic la yotsesic tey a te mahtaniletic, te jun ta slajunebal soc te bintic ch'uhltesbilic. La ya'beyic scuentahin te levita Conanías soc te yermano Simei.

¹³Te Jehiel, Azazías, Nahat, Asael, Jerimot, Jozabad, Eliel, Ismaquías, Mahat soc Benaía ha mayordomohetic yu'un te Conanías soc te yermano Simei ta scuenta mandar yu'un te ajwalil Ezequías soc te Azarías te muc'ul sacerdote yu'un te sna te Diose.

¹⁴Te levita Coré snich'an Imna, te jcanan-ti'nahil ta stojol banti ya xloc' tal c'ahc'al, scuentahinej te mahtaniletic yac'ojic ta sc'anojel yo'tanic ta stojol Dios, soc scuentahinej spuquel te mahtaniletic ac'bilic ta stojol Jehová soc te bintic ch'ultesbilique.

¹⁵Coltayot yu'un te Edén, Miniamín, Jesúa, Semaías, Amarías soc Secanías ta pueblohetic yu'un te sacerdotehetic, te jun yo'tanic ya spucticlambeyic te yermanotac ta scuenta jujuchahp bintic ay ta scuentahic ya yich'ic, muc' biq'uit;

¹⁶te mach'atic ta jujuchahp sts'umbalic te ts'ihbabil sbihilic, te ayix oxeb ya'bilalic, spisil te mach'atic ya x'ochic ta sna Jehová ta spasel ya'telic, chican bin a te ya'telic soc te jchahp yu'unique.

¹⁷Soc nix te sacerdotehetic ta chahpalchahp sna sme'static te ts'ihbabil sbihilic; soc te levitahetic te ayix jtahb (20) ya'bilal bahel, ha chican bin ut'il ay te ya'telic soc te jchahp yu'unique.

¹⁸Ts'ihbabil sbihilic spisil te alaletic, yihnamic, queremetic soc ach'ixetic yu'unic, ha spisilic, como jun yo'tanic la sch'ultes sbahic.

¹⁹Ha nix hich te sacerdotehetic, te snich'nab Aarón, te nahinemic ta q'uinal ta sjoyobal te pueblohetic o ta yohlil te pueblohetic, ay winiquetic te a'bot ya'telic ta spucbeyel te bintic ay ta scuenta ya yich'ic te winiquetic te ayic ta sacerdotehil, soc spisil te levitahetic te ts'ihbabil hilel sbihilic.

²⁰Hich la spas te Ezequías ta spisil Judá. La spas te bin lec, te bin toj, soc te bin smelelil ta stojol Jehová te Dios yu'une.

²¹Ta spisil bintic la spas ta scuenta a'tel ta sna Dios soc ta spasel te bin ya yal te Ley soc te mandariletic, la sle te Dios yu'un soc la spas ta spisil yo'tan; hich lec c'oht yu'un.