Read Tzeltal 2 Crónicas 32 Bible Online

2 Crónicas 32 - Tzeltal bible

2 Crónicas 32

¹Ta patil yu'un te bin jun yo'tan la spas te Ezequías, tal te Senaquerib ajwalil yu'un Asiria; la yochintay te Judá, la sjoytay ta guerra te pueblohetic te ay sts'ahcul, yu'un yo'tanuc ya yu'untay.

²C'alal la yil te Ezequías te tal te Senaquerib soc te la sc'an ya ya'be guerra te Jerusalén,

³la snop soc te príncipaletic soc te winiquetic te ma xiwic te ya smaquic te sloq'uib-ha'etic te ayic ta fuera yu'un te pueblo, ha nix hich yo'tanic.

⁴Ha yu'un bayel la stsob sbahic, la smaquic spisil te sloq'uib-ha'etic soc te uc'um te ya xc'ax ta yohlil te q'uinal, hich la yalic: ¿Bin yu'un ya stahic bayel ha' te c'alal ya xtalic te ajwaliletic yu'un Asiria? xchihic.

⁵Soc yip yo'tan te Ezequías la scha'pas xan spisil te ts'ahquetic te jihnemic, la spas ilo-q'uinaletic ta sba, soc la spas yan ts'ahc ta fuera; soc la ya'be xan yip te Milo te ay ta Pueblo yu'un David, soc la spas bayel espadahetic soc mahquilaletic.

⁶La yac' capitanetic yu'un guerra ta stojol te pueblo, la stsob ta plaza ta yochibal te pueblo, la yac'ticlambe yip yo'tanic, hich la yal:

⁷Pasahic tulan soc ayuc me yip awo'tanic; ma me xiwex, ma me xaxi'ic te ajwalil yu'un Asiria soc bayel te mach'atic sjoquinej tal, como bayel xan sjoquinejotic te ho'otic te bin ut'il sjoquinej te asiriahetique.

⁸Ha nax joquimbilic yu'un ch'ich'-baq'uet, yan te ho'otic sjoquinejotic te Jehová te Dios cu'untic te ya scoltayotic soc te ya yac' guerra ta jcuentatic, xchi. Hich la sta smuc'ul yo'tanic te pueblo yu'un te bin la yal te Ezequías ajwalil yu'un Judá.

⁹Ta patil, te Senaquerib ajwalil yu'un Asiria, te c'alal yac ta sjoytayel a te Laquis soc spisil te soldadohetic yu'un, la sticon bahel a'batetic ta Jerusalén ta yalbeyel te Ezequías ajwalil yu'un Judá soc spisil mach'atic yu'un Judá te ayic ta Jerusalén, hich la yal:

¹⁰Hich ya yal te Senaquerib ajwalil yu'un Asiria: ¿Mach'a a te smuc'ul awo'tanic, te ya xhilex ta Jerusalén te joytaybil ta guerra?

¹¹Ma xawac' slo'loyex te Ezequías te ya yaq'uex ta lajel, ta wi'nal soc ta taquinti'il, te hich ya yal: Te Jehová te Dios cu'untic ya scoltayotic ta sc'ab te ajwalil yu'un Asiria, te xchihe.

¹²¿Ma bal ha'uc nix te Ezequías te la sloq'ueslan te toyol awilaletic soc te scajtajib ta chiq'uel mahtaniletic awu'unic, soc te hich la yalbe te Judá soc te Jerusalén: Ha nax me xach'uhuntayic ta stojol junax scajtajib ta chiq'uel mahtanil soc te tey yac achiq'uic pom a, te xchihe?

¹³¿Yu'un bal ma ba ana'ojic te bin la jpas soc te tatiletic cu'un ta stojol spisil te pueblohetic ta q'uinal? ¿Hu' bal yu'unic te diosetic yu'un te nacionetic te la scoltayic ta jc'ab te sq'uinalique?

¹⁴¿Mach'a diosil ta spisil te diosetic yu'un te nacionetic te lajinot yu'un te tatiletic cu'un te hu' yu'unic scoltayel ta jc'ab? ¿Bin ut'il c'an hu'uc yu'un scoltaybelex ta jc'ab te Dios awu'unique?

¹⁵Ma me xawac' slo'loyex te Ezequías, te hich ya showiytesex. Ma me xach'uhunic, teme mayuc junuc dios yu'un spisil te nacionetic te hu' yu'un ya scoltay ta jc'ab soc ta sc'ab te tatiletic cu'une, ¿ha'uc to balix a te Dios awu'unic te ya xhu' yu'un scoltaybelex ta jc'ab? xchi.

¹⁶Ay to yan bin la yalic te a'batetic yu'un ta scontrahinel te Jehová Dios soc ta scontrahinel te Ezequías te a'bat yu'une.

¹⁷Soc te ajwalil la sts'ihbay cartahetic scuenta sbohlc'optayel te Jehová te Dios yu'un Israel, hich la yal ta scontrahinel: Hich te bin ut'il te diosetic yu'un te yantic nacionetic ma ba hu' scoltaybel te pueblo yu'unic ta jc'ab, ha nix hich te Dios yu'un Ezequías ma ba ya xhu' ya scoltay ta jc'ab te pueblo yu'une, xchi.

¹⁸Te jal-c'opetic la yawtayic ta hebreo-c'op te mach'atic ayic ta Jerusalén te mohemic ta sba te ts'ahc, yu'un ya ya'beyic xiwel, yu'un hich ya xhu' ya yu'untayic a te pueblo.

¹⁹La yalbeyic sc'oblal te Dios yu'un Jerusalén hich te bin ut'il la yalbeyic sc'oblal te diosetic yu'un te yantic nacionetic, te pasbilic ta sc'ab winiquetic.

²⁰Te ajwalil Ezequías soc te jalwanej Isaías snich'an Amoz la sc'oponic Dios yu'un, awonic c'alal ta ch'ulchan.

²¹Hich te Jehová la sticon tal ch'ul a'bat te la smil spisil te mach'atic ma xiwic soc te jtsobawetic soc capitanetic ta campamento yu'un te ajwalil yu'un Asiria. Hich q'uexaw suhtel ta sq'uinal. Te c'alal och bahel ta templo yu'un te dios yu'une, tey milot yu'un a te mero snich'nabe.

²²Hich la yich'ic coltayel yu'un Jehová te Ezequías soc te mach'atic nahinemic ta Jerusalén ta sc'ab Senaquerib ajwalil yu'un Asiria, soc ta sc'ab spisil te scontrahic. La yac' lahmajuc q'uinal ta jujujehch.

²³Bayelic la yich'ic tal ta Jerusalén mahtanil yu'un Jehová, soc lequil mahtaniletic ta stojol Ezequías ajwalil yu'un Judá. Ta patil ini, muc' sc'oblal c'oht ta stojol spisil nacionetic.

²⁴Ha yorahil a te tsahc ta chamel scuenta lajel te Ezequías. La sc'opon te Jehová, jac'bot sc'op yu'un, soc a'bot yil seña.

²⁵Pero te Ezequías ma ha'uc la sna' te bin lec pasbot, la stoy sba, hich tal ilimba ta stojol soc ta stojol Judá soc Jerusalén.

²⁶Pero te Ezequías soc te mach'atic nahinemic ta Jerusalén la spehc'an sbahic yu'un te stoybahilic, hich ma ba tal te yilimba Jehová c'alal cuxul te Ezequías.

²⁷Te Ezequías c'ax bayel sc'ulejal soc bayel ay ta ich'el ta muc'. La stsob sc'ulejal, ha te plata, oro, t'ujbil tonetic, bintic sumet yic', mahquilaletic soc spisil ta chahp te bintic bayel stojol.

²⁸Soc la spasbe snahul trigo soc cebada, vino soc aceite, soc nahetic yu'un spisil ta chahp chambahlametic soc corraletic yu'un te tuminchijetic soc tentsunetic.

²⁹Soc la spas pueblohetic, soc la sta bayel tuminchijetic, tentsunetic soc wacaxetic, como Dios la ya'be bayel sc'ulejal.

³⁰Ha nix te Ezequías te la smac te ha' ta ahc'ol yu'un te sloq'uib-ha' ta Gihón, la spasbe sbe-ha' te ya xbaht ta stojol banti ya xmahl c'ahc'al yu'un te Pueblo yu'un David. Lec loc' spisil bintic la spas te Ezequías.

³¹Pero te c'alal la sticon tal a'batetic te príncipaletic yu'un Babilonia ta sjoc'obeyel sc'oblal te bin chahp c'ohem ta pasel ta sq'uinal, te Ezequías ihquitayot yu'un Dios scuenta prueba, yu'un hich ya xna'bot a spisil bintic ay ta yo'tan.

³²Te bintic xan ya'tel te Ezequías soc te t'ujbil a'teliletic la spas ta stojol Dios, spisil ts'ihbabil hilel ta hun yu'un te jalwanej Isaías snich'an Amoz, soc ta libro yu'un te ajwaliletic yu'un Judá soc Israel.

³³Cham[49] te Ezequías, la smuquic ta banti bayel sc'oblal ta muquenaletic yu'un te sts'umbal David. C'alal cham, spisil Judá soc spisil Jerusalén la yich'ic ta muc'. Ha la sjelolin ta ajwalil te Manasés te snich'ane.