Read Tzeltal 2 Crónicas 33 Bible Online

2 Crónicas 33 - Tzeltal bible

2 Crónicas 33

¹Te Manasés ay lahchayeb (12) ya'bilal a te c'alal och ta ajwalil, ho'lajuneb yoxwinic (55) ha'bil ay ta ajwalil ta Jerusalén.

²Pero chopol bin la spas ta stojol Jehová, hich te bin ut'il te bintic ilobtic sba la spasic te nacionetic loq'uesotic yu'un Jehová ta stojol te snich'nab Israel.

³Ha la scha'pas xan te toyol awilaletic te la sjin te Ezequías te state; la spasbe scajtajib ta chiq'uel mahtaniletic te baaletic, soc la spasbe loc'ombahetic yu'un Asera, la sch'uhuntay spisil bintic ayic ta ch'ulchan.

⁴Soc la spas scajtajib ta chiq'uel mahtaniletic yu'un loc'ombahetic ta sna Jehová, te hich halbot sc'oblal yu'un Jehová: Stalel me ya x'ayin te jbihil ta Jerusalén, te xchihe.

⁵Soc la spasticlan scajtajib ta chiq'uel mahtaniletic yu'un spisil bintic ayic ta ch'ulchan ta schebal te yamaq'uil sna Jehová.

⁶La yac' c'axuc ta c'ahc' te snich'nab ta sjuclej Ben-hinom, la spasbe ya'tel j'ilojel, jna'ojel soc jpas señahiletic, soc la sjoc'obe te mach'a ya sc'opon ch'uhlelaletic soc bohl espirituhetic. C'ax bayel chopol bintic la spas ta stojol Jehová, ha to c'alal la shachbe yilimba.

⁷Soc la yac' ta sna Dios te loc'omba te ha nix spasoj, te hich halbot sc'oblal yu'un Dios te David soc Salomón te snich'an: Ta Na ini soc ta Jerusalén, te tsahbil cu'un ta yohlil spisil ta chahp sts'umbal Israel, tey ya cac' ayinuc a te jbihil sbahtel q'uinal.

⁸Ma ba ya jloq'ues xan te Israel ta q'uinal te la jca'be te sme'static, teme ya scanantayic soc ya spasic spisil te Ley, spisil te mandariletic te la jcac' ta scuenta Moisés, te xchihe.

⁹Te Manasés la yac' howiyuc te Judá soc te mach'atic nahinemic ta Jerusalén ta spasel bintic chopol c'ax hich a te bin ut'il te yantic nacionetic te jinotic yu'un Jehová ta stojol te snich'nab Israel.

¹⁰Te Jehová la sc'opon te Manasés soc te pueblo yu'un, pero ma la yich'beyic ta cuenta.

¹¹Ha scuentahil te Jehová la yic' tal te jtsobawetic yu'un te soldadohetic yu'un te ajwalil ta Asiria. La schuquic bahel te Manasés ta gancho ta sni' soc ta cadenahetic pasbilic ta bronce, la yiq'uic bahel ta Babilonia.

¹²Pero te c'alal ay ta wocol, la sc'opon te Jehová te Dios yu'un, mero peq'uel la yac' sba ta stojol te Dios yu'un te sme'state.

¹³Te c'alal la sc'opon te Diose, na'bot yo'bolil sba yu'un Dios soc a'iybot sc'op, hich la scha'otses ta ajwalil ta Jerusalén. Ha yu'un c'oht ta yo'tan Manasés te ha Dios stuquel te Jehová.

¹⁴Patil la spas ts'ahc ta fuera yu'un te Pueblo yu'un David, ta stojol smahlib c'ahc'al yu'un Gihón, ta spamlej, c'oht ta Spuertahul Chay soc la sjoytay te Ofel, buen toyol la spas te ts'ahc. Soc la yac'ticlambe capitanetic yu'un soldadohetic ta spisil te pueblohetic ta Judá te ay sts'ahcul.

¹⁵Soc la sloq'ueslan te diosetic yu'un jyanlumetic soc te loc'omba ay ta sna Jehová, soc spisil te scajtajib ta chiq'uel mahtaniletic te spasoj ta wits yu'un te sna Jehová soc ta Jerusalén; la sch'ojticlan loq'uel ta spat te pueblo.

¹⁶Patil la scha'pas xan te scajtajib ta chiq'uel mahtanil yu'un Jehová, soc tey la yac' a te milbil mahtaniletic scuenta lamal q'uinal soc scuenta yalbeyel wocol. La spas ta mandar te Judá te ac'a yac' sbahic ta a'batinel ta stojol Jehová te Dios yu'un Israel.

¹⁷Pero te pueblo la to yac' milbil mahtaniletic ta toyol awilaletic, aunque ha la ya'beyic te Jehová te Dios yu'unique.

¹⁸Te bintic yan la spas te Manasés, bin ut'il la sc'opon te Diose, soc te bintic halbotic yu'un te jalwanejetic ta scuenta sbihil te Jehová te Dios yu'un Israel, spisil ts'ihbabil hilel ta libro yu'un te ajwaliletic yu'un Israel.

¹⁹Te bin la yal ta sc'oponel Dios soc te bin ut'il a'iybot sc'op yu'un, spisil te smul soc te ma junuc yo'tan, soc te bantic la spasticlan te toyol awilaletic soc te la stehc'an loc'ombahetic yu'un Asera soc yantic loc'ombahetic, te c'alal ma to ba spehc'anej sba a, ha ts'ihbabil hilel ta hun yu'un te jalwanejetique.

²⁰Cham[50] te Manasés, la smuquic ta sna. Ha la sjelolin ta ajwalil te Amón te snich'ane.

²¹Te Amón ay cheb scha'winic (22) ya'bilal a te c'alal och ta ajwalil; cheb ha'bil ay ta ajwalil ta Jerusalén.

²²Chopol bin la spas ta stojol Jehová, hich te bin ut'il la spas te Manasés te state. La ya'be milbil mahtaniletic soc la sch'uhuntay spisil te loc'ombahetic te la spas te Manasés te state.

²³Pero mayuc bin ora la spehc'an sba ta stojol Jehová, hich te bin ut'il la spehc'an sba te Manasés te state; bayel xan mulil la spas.

²⁴Chapbot sc'oblal ta milel yu'un te a'batetic yu'une, la smilic ta sna.

²⁵Pero te pueblo la smilic te mach'atic la schapbeyic sc'oblal ta milel te ajwalil Amón, la ya'beyic sjelolin ta ajwalil te Josías te snich'ane.