Read Tzeltal 2 Crónicas 34 Bible Online

2 Crónicas 34 - Tzeltal bible

2 Crónicas 34

¹Te Josías ay waxaqueb ya'bilal a te c'alal och ta ajwalil; bulucheb scha'winic (31) ha'bil ay ta ajwalil ta Jerusalén.

²Toj bin la spas ta stojol Jehová, ha la st'umbe sbe te David te stat, ma ba howiy bahel ta wa'el o ta q'uexam.

³Ta swaxaquebal ha'bil yochel ta ajwalil a, querem to a, hahch ta slehel te Dios yu'un te David te state. Ta slahchayebal (12) ha'bil hahch ta sloq'uesel ta Judá soc ta Jerusalén te toyol awilaletic, te loc'ombahetic yu'un Asera, te bintic yan loc'taylambil, soc te loc'ombahetic pasbilic ta uhltesbil taq'uin.

⁴La yich' jinticlanel ta stojol Josías te scajtajib ta chiq'uel mahtaniletic yu'un te baaletic; la swuyticlan te scajtajib ta chiq'uel pom te ay ta sba; soc la swuyticlan te loc'ombahetic yu'un Asera, te bintic lop'taybil soc te loc'ombahetic pasbilic ta uhltesbil taq'uin; la sjuch' soc la spucbe te stanul ta sba smuquenal te mach'atic la yaq'uic milbil mahtaniletic yu'un.

⁵Soc la schic'be sbaquelic te sacerdotehetic yu'unic ta sba te scajtajib ta chiq'uel mahtaniletic yu'unic. Hich la slecubtes te Judá soc Jerusalén.

⁶Hich nix la spas ta pueblohetic ta sq'uinal Manasés, Efraín, Simeón, c'alal ta Neftalí, soc ta banti jimbil ta sjoyobal.

⁷Ta patil yu'un te la sjinticlan te scajtajib ta chiq'uel mahtaniletic soc te loc'ombahetic Asera, soc te la swuyticlan soc la sjuch' te bintic lop'taylambil, soc te la sjinticlan spisil te scajtajib ta chiq'uel pom ta spisil sq'uinal Israel suht tal ta Jerusalén.

⁸Ta swaxaclajunebal (18) ha'bil yochel ta ajwalil a, te c'alal lecubenix yu'un a te q'uinal soc te Templo, la sticon bahel te Safán snich'an Azalía, te Amasías gobernador yu'un te pueblo, soc te Joa snich'an Joacaz, te secretario, yu'un ya schahpanic xan te sna Jehová te Dios yu'unique.

⁹C'ohtic ta stojol te muc'ul sacerdote Hilcías, la ya'beyic te taq'uin te ich'bil tal ta sna Dios, ha te taq'uin te levitahetic te ya scanantayic ti'nahiletic la yich'beyic te Manasés, Efraín soc spisil mach'atic cuxul hilemic yu'un Israel, soc spisil Judá soc Benjamín soc te mach'atic nahinemic ta Jerusalén.

¹⁰La ya'beyic te mach'atic scuentahinejic te a'tel ta sna Jehová. Ha'ic la ya'beyic te mach'atic ya x'a'tejic ta schahpanel xan te Templo.

¹¹La ya'beyic te carpinterohetic soc te jpas-nahetic scuenta yu'un ya smanic tonetic a te yich'oj wahluyel, soc te'etic scuenta ts'amte' yu'un te nahetic te jimbilic yu'un te ajwaliletic yu'un Judá.

¹²Te winiquetic ini jun yo'tanic la spasic te a'tele. Te jcuentahinwanejetic yu'unic, ha te Jahat soc Abdías, levitahetic te ha sts'umbalic Merari, soc te Zacarías soc Mesulam te ha sts'umbalic Coat, soc te levitahetic te ya sna'ic stijel a'tejibaletic yu'un música,

¹³la scuentahinic te j'a'teletic soc mach'atic ya spasic spisil ta chahp a'tel. Soc ay levitahetic te ha secretariohetic, jcuentahinwanejetic soc jcanan-ti'nahiletic.

¹⁴C'alal la sloq'uesic te taq'uin te ich'bil tal ta sna Jehová, te sacerdote Hilcías la sta te libro yu'un te ley yu'un Jehová, te ac'ot ta scuenta Moisés.

¹⁵Te Hilcías hich la yalbe te secretario Safán: La jta ta sna Jehová te libro yu'un te ley, xchi. Hich la ya'be te Safán.

¹⁶Te Safán la yich' bahel ta stojol te ajwalil, soc la yalbe ya'iy te bin c'oht ta pasel, hich la yal: Te a'batetic awu'un yaquic ta spasel spisil te bintic a'bibil spasique.

¹⁷La sloq'uesic tal te taq'uin te ay ta sna Jehová, la ya'beyiquix ta sc'ab te jcuentahinwanejetic yu'un te a'tel soc te mach'atic ya spasic te a'tele, xchi.

¹⁸Soc te Safán hich la yalbe xan te ajwalil: Te sacerdote Hilcías la ya'bon jun libro, xchi. Hich te Safán la yil te libro ta stojol te ajwalil.

¹⁹Te c'alal la ya'iy te ajwalil te bin la yal te libro yu'un te Ley, la schi' sc'u' yu'un.

²⁰La spas ta mandar te Hilcías, te Ahicam snich'an Safán, te Abdón snich'an Micaías, te Safán te secretario, soc te Asaías te a'bat yu'un te ajwalil, hich la yalbe:

²¹Bahanic, joc'obeyahic te Jehová ta jcuenta soc ta scuenta te mach'atic hilemic yu'un Israel soc yu'un Judá sc'oblal te libro te la yich' tahele. Como muc' te yilimba Jehová te talem ta jtojoltic ta scaj te ma ba la scanantaybeyic te sc'op Jehová te jme'jtatic ta spasel spisil bintic ts'ihbabil ta libro ini, xchi.

²²Ha yu'un te Hilcías soc te mach'atic ticombilic bahel yu'un te ajwalil bahtic ta stojol te jalwanej-ants Hulda te yihnam Salum snich'an Ticva, snich'an Harhas, te jcanan-c'u'ul, te nahinem ta Schebal Barrio yu'un Jerusalén; la yalbeyic ya'iy te bin c'oht ta pasel.

²³La sjac' te antse: Hich ya yal te Jehová te Dios yu'un Israel: Halbeya te winic te la sticonex tal ta jtojol

²⁴te hich ya yal te Jehová: Ya cac' taluc wocol ta stojol te lugar ini, ha spisil bintic chopol sc'oblal te ts'ihbabil hilel ta libro te la yich' ilel ta stojol te ajwalil yu'un Judá;

²⁵ta scaj te la yihquitayonic soc la schic'beyic pom te yantic diosetic, hich la shachbonic quilimba a yu'un spisil te bintic la spasique. Ha yu'un ya xtal quilimba ta stojol te lugar ini, ma ba ya xtup'.

²⁶Yan te ajwalil yu'un Judá te la sticonex tal ta sjoc'obeyel te Jehová, hich me xawalbeyic: Hich ya yal te Jehová te Dios yu'un Israel: Te bin ut'il la awa'iy te bin ya yal te libro,

²⁷te nihc awo'tan yu'un soc te la apehc'an aba ta stojol Dios te c'alal la awa'iy te bin ya yalbe sc'oblal te lugar ini soc te mach'atic nahinemic tey a, soc te la apehc'an aba ta jtojol, la ach'i' ac'u' yu'un soc oc'at ta jtojol, ha nix hichon la jca'iybat ac'op, xchi te Jehová.

²⁸Ya cac' te lamal q'uinal ya xchamat soc[51] yac awich' muquel, ma ba yac awil spisil bintic chopol ya cac' tal ta stojol te lugar ini soc ta stojol te mach'atic nahinemic tey a, xchi. Hich c'oht yalbeyic te ajwalil te suhtib te c'ope.

²⁹Ha yu'un te ajwalil la sticon ta iq'uel tal spisil te mamaletic yu'un Judá soc Jerusalén.

³⁰Te ajwalil soc spisil te winiquetic yu'un Judá, te mach'atic nahinemic ta Jerusalén, te sacerdotehetic, levitahetic, soc spisil te pueblo, muc' biq'uit, mohic bahel ta sna Jehová. Te ajwalil la yilbe ya'iy ta stojolic spisil te bin ya yal te libro yu'un te chapbil-c'op te la yich' tahel ta sna Jehová.

³¹Teq'uel te ajwalil ta yawil, la schap sc'op soc Jehová te ya me st'umbe sbe Jehová soc ya scanantay te mandariletic, te testigo-c'op soc te chahpambil mandariletic ta spisil yo'tan soc ta spisil sch'uhlel, ya sc'ohtes ta pasel te bin ya yal te chapbil-c'op te ts'ihbabil ta libro.

³²Te ajwalil la ya'be te ya yac' sbahic ta sch'uhunel te chapbil-c'op spisil mach'atic ayic ta Jerusalén soc ta Benjamín. Hich te mach'atic nahinemic ta Jerusalén la spasic te bin ya yal te chapbil-c'op yu'un Dios, te Dios yu'un te sme'statique.

³³Te Josías la sloq'ueslan spisil te bintic ilobtic sba ta spisil sq'uinal Israel, soc la yac' te spisil mach'atic ayic ta Israel ya yac' sbahic ta a'batinel ta stojol Jehová te Dios yu'unic. Te jayeb c'ahc'al cuxul te Josías ma ba la yihquitayic te Jehová te Dios yu'un te sme'static.