Read Tzeltal 2 Crónicas 36 Bible Online

2 Crónicas 36 - Tzeltal bible

2 Crónicas 36

¹Te pueblo la yotsesic ta ajwalil te Joacaz snich'an Josías, ha la ya'beyic sjelolin ta ajwalil te stat ta Jerusalén.

²Te Joacaz ay oxeb scha'winic (23) ya'bilal a te c'alal och ta ajwalil; oxeb u ay ta ajwalil ta Jerusalén.

³Te ajwalil yu'un Egipto la sloq'ues ta ajwalil ta Jerusalén, soc la ya'be stoj spatan te Judá ho'winic (100) talento[52] plata soc jun talento[53] oro.

⁴Te ajwalil yu'un Egipto la yotses ta ajwalil yu'un Judá soc Jerusalén te Eliaquim te yermano Joacaz, soc la sjelbe sbihil, Joacim c'oht yu'un. Te Joacaz te yermano ic'ot bahel yu'un Necao ta Egipto.

⁵Te Joacim ay ho'eb scha'winic (25) ya'bilal a te c'alal och ta ajwalil; buhlucheb (11) ha'bil ay ta ajwalil ta Jerusalén. Chopol bin la spas ta stojol Jehová te Dios yu'une.

⁶Tal ta a'beyel guerra yu'un te Nabucodonosor ajwalil yu'un Babilonia, la yic' bahel ta Babilonia chucul ta cadenahetic pasbilic ta bronce.

⁷Soc te Nabucodonosor la yich' bahel ta Babilonia biluquetic te ayic ta sna Jehová, la yac' ta templo yu'un ta Babilonia.

⁸Te bintic xan la spas te Joacim, te bintic ilobtic sba te la spas soc te bintic c'oht ta pasel ta stojol, ts'ihbabil hilel ta libro yu'un te ajwaliletic yu'un Israel soc yu'un Judá. Ha la sjelolin ta ajwalil te Joaquín te snich'ane.

⁹Te Joaquín ay waxaqueb[54] ya'bilal a te c'alal och ta ajwalil; oxeb u soc lajuneb c'ahc'al ay ta ajwalil ta Jerusalén. Chopol bin la spas ta stojol Jehová.

¹⁰Ta shahchel te ha'bil te Nabucodonosor la sticon ta iq'uel bahel ta Babilonia te Joaquín soc te biluquetic te bayel sc'oblalic ta sna Jehová, soc la yotses ta ajwalil yu'un Judá soc Jerusalén te Sedequías te stajun te Joaquín.

¹¹Te Sedequías ay jun scha'winic (21) ya'bilal a te c'alal och ta ajwalil; bulucheb (11) ha'bil ay ta ajwalil ta Jerusalén.

¹²Chopol bin la spas ta stojol Jehová te Dios yu'une. Ma ba la spehc'an sba ta stojol te jalwanej Jeremías, te c'oponot yu'un ta scuenta Jehová.

¹³Ha nix hich la stoy sba ta scontrahinel Nabucodonosor, te la yal ta jamal ta stojol Dios te junuc me yo'tan ta stojol. Tulanij yo'tan, ma ba la sc'an la suhtes yo'tan ta stojol Jehová te Dios yu'un Israel.

¹⁴Hich nix spisil te jtsobawetic yu'un te sacerdotehetic soc te pueblo, la sp'oltesic te mulil, la st'unic te bintic ilobtic sba te ya spasic te nacionetic, la sbohlobtesbeyic sc'oblal te sna Jehová te ch'ultesbil yu'un ta Jerusalén.

¹⁵Te Jehová te Dios yu'un te sme'stat spisil ora la sc'oponlan ta scuenta te jal-c'opetic yu'un, como ay sc'uxul yo'tan ta stojol te pueblo yu'un soc te Templo yu'une.

¹⁶Pero la slabanic te jal-c'opetic yu'un Dios soc ma ba la yich'beyic ta cuenta te sc'ope, la stse'layic te jalwanejetic ha to c'alal tohy yilimba Jehová ta scontra te pueblo yu'une, ma ba weht bin ya yich' pasbeyel.

¹⁷Ha yu'un te Jehová la yac' taluc te ajwalil yu'un te caldeohetic[55] te la smilticlambe ta espada te yal-snich'nabic ta sna ta ch'ul awilal, ma ba la sna'be yo'bolil sbahic te queremetic, ach'ixetic, mamaletic o te mach'atic mayuc yipic; spisilic ac'ticlambotic ta sc'ab yu'un te Diose.

¹⁸Soc spisil te biluquiletic ta sna Dios, muq'uic soc tutic, te c'ulejaliletic yu'un te sna Jehová, te c'ulejaliletic yu'un te sna ajwalil soc yu'un te príncipaletic, spisil la yich' bahel ta Babilonia.

¹⁹La schiq'uic te sna Dios, la sjinic te sts'ahcul te Jerusalén, la schiq'uic spisil te muc'ul t'ujbil nahetic tey a soc la sjinticlanic spisil te bintic bayel sc'oblale.

²⁰Te mach'atic colic ta espada ic'otic bahel ta chuquel ta Babilonia, ochic ta mosohil yu'un soc yu'un te yal-snich'nab, ha to c'alal tal te ajwalil yu'un te persiahetique;

²¹scuenta yu'un ya xc'oht ta pasel te bin yaloj te Jehová ta scuenta Jeremías, ha to c'alal ts'acay te yorahil te ya scux yo'tan te q'uinale. Te q'uinal la scux yo'tan te jayeb ora jihnem, ha to c'alal c'ax te lajuneb schanwinic (70) ha'bil.

²²Ta shahchibal ha'bil yochel ta ajwalil te Ciro ajwalil yu'un Persia, scuenta yu'un ya xc'oht ta pasel te sc'op Jehová te la yal ta scuenta te Jeremías, te Jehová la stijbe yo'tan te Ciro ajwalil yu'un te persiahetic te hich ya yal soc hich ya sts'ihbay ta carta ta stojol spisil ban c'alal smacoj ta ajwalil:

²³Hich ya yal te Ciro ajwalil yu'un Persia: Te Jehová te Dios ta ch'ulchan, ya'beyejon ta jcuenta spisil ta ban c'alal smacoj te ajwaliletic ta bahlumilal; soc ha la yalbon mandar te ya jpasbe sna ta Jerusalén te ay ta sq'uinal Judá. Mach'ayuc a ta awohlilic te ha pueblohex yu'un, bahanic tey a, te Jehová Dios ac'a coltayucot yu'un, xchi.