Read Tzeltal 2 Crónicas 4 Bible Online

2 Crónicas 4 - Tzeltal bible

2 Crónicas 4

¹La spas scajtajib mahtanil ta bronce, jtahb (20) xuhc'ubil[9] snahtil, jtahb (20) xuhc'ubil soc lajuneb xuhc'ubil[10] stoyolil.

²La spas ta uhltesbil bronce muc'ul yawil ha'[11] te buen sepel, lajuneb xuhc'ubil sjamalil soc ho'eb xuhc'ubil[12] stoyolil; te sti'il lajuneb scha'winic (30) xuhc'ubil[13] ta sjoyobal.

³Ta ye'tal sti'il ta sjoyobal te mar ay cha'chohl sloc'omba torohetic,[14] lajuneb ta jujun xuhc'ubil,[15] soc junax pasbilic soc te mar.

⁴Te yawil ha' cajal ta lahchayeb (12) torohetic, oxeb yac yilbelic bahel ta stojol norte, oxeb ta stojol sur, oxeb ta stojol banti ya xloc' tal c'ahc'al, soc oxeb ta stojol smahlib c'ahc'al; tey cajal a te muc'ul yawil ha', soc ha ochemic bahel scubic ta ye'tal.

⁵Jtahn-c'abal[16] te spimil te yawil ha', soc te sti'il ch'albil hich te bin ut'il copa o lirio-nichim yilel. Ya x'och tey a j'ohlil swaxacbahc' (3,000) batohetic[17].

⁶Soc la spas lajuneb tut yawil ha'etic, la yac' ho'eb ta stojol sur soc ho'eb ta stojol norte yu'un te Templo. Tey ya yich' poquel a te bin ya yich' aq'uel scuenta scohtol chic'bil mahtanil; yan te muc'ul yawil ha' tey ya spoc sbahic a te sacerdotehetique.

⁷La spas lajuneb scajtajib c'ahc' ta oro, hich yilel te bin ut'il halbil mandar, la yac' ta Templo, ho'eb ta stojol sur soc ho'eb ta stojol norte.

⁸Soc la spas lajuneb mesahetic te la yac' ta Templo, ho'eb ta stojol sur soc ho'eb ta stojol norte. Soc la spas ho'winic (100) muc'ul tazahetic ta oro.

⁹Soc la spas te amac' yu'un te sacerdotehetic, te muc'ul amac' soc te puertahetic yu'un, soc la spotsticlan ta bronce.

¹⁰La yac' te muc'ul yawil ha' ta swa'el te Na, ha ta stojol sur soc ta banti ya xloc' tal c'ahc'al yu'un te Na.

¹¹Te Hiram la spasticlan oxometic, palahetic soc muc'ul tazahetic. Hich hu' yu'un te Hiram te a'tel a'bot spas yu'un Salomón yu'un te sna te Diose:

¹²ha te cheb toyol bahlal oyetic, te wolajtic ta sni'il te cheb bahlal oyetic, te cheb jalbil-taq'uin scuenta sch'ahlel te wolajtic ayic ta sni'il te cheb bahlal oyetic;

¹³jbahc' (400) sloc'omba granadahetic ta banti te cheb jalbil-taq'uinetic, cha'chohl ta jujun jalbil-taq'uin, yu'un ya sch'alic schebal te wolajtic te ayic ta sni'il te bahlal oyetic.

¹⁴Soc la spasticlambe te scajtajib yawil ha'etic, soc te yawil ha'etic ta sba;

¹⁵te muc'ul yawil ha' soc te lahchayeb (12) torohetic ta ye'tal;

¹⁶te oxometic, palahetic soc te trinchehetique. Spisil te bintic la spasbe te ajwalil Salomón te Hiram-abi yu'un te sna Jehová, la spas ta huxbil bronce.

¹⁷Te ajwalil la yac' ta pasel ta uhltesbil taq'uin ta spamlej yu'un Jordán, ta ch'uyuy lum, ta ohlil yu'un Sucot soc Seredata.[18]

¹⁸C'ax bayelic la yac' ta pasel te Salomón, ma ba hu' ta na'el te yalal te bronce.

¹⁹Hich te Salomón la spas spisil bintic ya xtuhun ta sna te Diose: ha te scajtajib ta chiq'uel pom pasbil ta oro, te mesahetic banti ya xc'oht te pan ac'bil ta stojol Dios;

²⁰te scajtajib c'ahc' te pasbil ta lequil oro soc te yawil c'ahq'uetic te ya yich' tsunel ta stojol te Mero Ch'ul Awilal, hich te bin ut'il halbil ta mandar;

²¹te sloc'omba nichimetic, te yawilic aceite yu'un c'ahc', soc tenazahetic pasbilic ta mero lequil oro;

²²te set'ojbil yac'alel mechahetic, muc'ul tazahetic, muc'ul cucharahetic soc schic'ojibal pom te pasbilic ta lequil oro. Ha nix hich pasbilic ta oro te puertahetic yu'un te Templo, ha te puertahetic yu'un te Mero Ch'ul Awilal soc te puertahetic yu'un te ch'ul awilal.