Read Tzeltal 2 Crónicas 5 Bible Online

2 Crónicas 5 - Tzeltal bible

2 Crónicas 5

¹C'alal hu' spisil te a'tel te la spas te Salomón yu'un te sna Jehová, la yich' tal te bintic yac'ojix ta stojol Jehová te David te stat: ha te plata, oro, soc spisil te bintic ya xtuhun tey a, la yac' ta yawil sc'ulejal te ay ta sna te Diose.

²Ha yu'un te Salomón la stsob ta Jerusalén te mamaletic yu'un Israel, spisil te príncipaletic yu'un te chahpalchahp sts'umbal Israel, soc te jtsobawetic yu'un chahpalchahp na yu'un te snich'nab Israel, scuenta yu'un ya yich'ic talel te yawil chapbil-c'op yu'un Jehová te ay ta Pueblo yu'un David, ha te Sión.

³Hich spisil te winiquetic yu'un Israel la stsob sbahic soc te ajwalil Salomón ta yorahil te q'uin ta shuquebal u yu'un te ha'bile.

⁴C'alal c'ohtic spisil te mamaletic yu'un Israel, te levitahetic la sq'uechic bahel te yawil chapbil-c'op,

⁵la sc'asesic bahel soc te Nahilpac' Templo yu'un tahojibal soc spisil te bintic ya xtuhun ta ch'ul awilal te ay ta Nahilpac' Templo. Ha la yich'ic bahel te sacerdotehetic soc te levitahetic.

⁶Te ajwalil Salomón soc spisil te pueblo Israel te stsoboj sbahic soc ta stojol te yawil chapbil-c'op la yaq'uic milbil mahtanil tuminchijetic soc torohetic, c'ax bayelic, ma ba hu' ta ahtayel.

⁷Te sacerdotehetic la yotsesic te yawil chapbil-c'op yu'un Jehová ta yawil, ha ta Mero Ch'ul Awilal, ta ye'tal te xiq'uic te querubinetique.

⁸Slich'oj xiq'uic ta sba te yawil chapbil-c'op, hich la yaxintesic te yawil chapbil-c'op soc te ste'ele.

⁹Hich snahtil te ste'el te chican ta ilel sni'ilic ta Ch'ul Awilal, pero ma ba chican ta ilel ta fuera; tey ayic a c'alal ora.

¹⁰Ta yutil te yawil chapbil-c'op mayuc bin yan tey ay a, ha nax te cha'pehch ton te la yac' tey a te Moisés ta wits Horeb, te banti Jehová la schap sc'op soc te snich'nab Israel te c'alal loq'uic tal ta Egipto.

¹¹Te c'alal loq'uic tal ta Ch'ul Awilal te sacerdotehetic, (yu'un spisil te sacerdotehetic te tey ayic a, ch'ultesbiliquix, ma ba ich'bilic ta cuenta te bin ut'il chahpalchahp ayic),

¹²spisil te levitahetic te ya xc'ayojinic, ha te Asaf, Hemán, Jedutún, soc te snich'nabic soc te yermanotac, tec'ajtic spisilic ta stojol banti ya xloc' tal c'ahc'al yu'un te scajtajib ta chiq'uel mahtanil, slapojic lino-pac' soc yich'ojic te platillo, salterio soc arpahetic, soc sjoquinejic wacwinic (120) ta tuhl sacerdotehetic te la yoq'uesinic cornetahetic.

¹³Ta spisilic junax la yac' sbahic ta yoq'uesinel te cornetahetic soc ta c'ayoj ta yalbeyel yutsil sc'oblal soc ta yalel wocol ta stojol te Jehová. Yaquic ta yoq'uesinel te cornetahetic soc ta stijel te platillohetic soc te yantic a'tejibaletic yu'un música, hich la yalbeyic ta c'ayoj te Jehová: Lec yo'tan stuquel, como sbahtel q'uinal ay te sc'uxul yo'tan, xchihic. C'alal hich yac spasbelic a, noj ta tocal te sna Jehová.

¹⁴Te sacerdotehetic ma ba hu' yu'unic ya spasic ya'telic ta scaj te tocal; como te yutsilal te Jehová noj yu'un te sna te Diose.