Read Tzeltal 2 Crónicas 6 Bible Online

2 Crónicas 6 - Tzeltal bible

2 Crónicas 6

¹Ha yu'un hich la yal te Salomón: Te Jehová yaloj te ya xnahin ta ihc'al tocal.

²Pero la jpasbatix ana, te banti ya xnahinat scuenta sbahtel q'uinal, xchi.

³Te ajwalil la sut sba, la ya'be bendición spisil te pueblo Israel te c'alal teq'uelic tey a,

⁴hich la yal: Bayel yutsil te Jehová te Dios yu'un Israel te la yac' c'ohtuc ta pasel te bin la yalbe ta jamal te jtat David, te hich la yal:

⁵Ha to te bin ora la jloq'ues tal ta Egipto te pueblo cu'un, mayuc yan pueblo ta yohlil spisil ta chahp yu'un Israel te banti jtsahoj yu'un ya yich' pasel Na banti ya x'ayin te jbihile, soc mayuc yan winic te jtsahoj te ha príncipal ya xc'oht yu'un Israel te pueblo cu'un;

⁶ha jtsahoj te Jerusalén scuenta yu'un tey ya x'ayin a te jbihil, soc jtsahoj te David yu'un ya scuentahin te pueblo Israel cu'un, xchi te Jehová.

⁷Te jtat David ay ta yo'tan te ya spas Na yu'un te sbihil te Jehová te Dios yu'un Israel.

⁸Pero te Jehová hich la yalbe te jtat David: Te bin ut'il ay ta awo'tan te yac apas Na yu'un te jbihile, lec te bin anopoj ta awo'tan;

⁹pero ma ha'ucat te yac apas te Nahe, ha mero anich'an ya spas te Na yu'un te jbihile, xchi.

¹⁰Te Jehová c'ohtix ta pasel yu'un te bin yaloj, ho'on ochon ta sjelol te jtat David, huhcajon ta shuctajib Israel, hich te bin ut'il yaloj te Jehová, soc jpasojix Na yu'un te sbihil Jehová te Dios yu'un Israel.

¹¹Tey la jcac' a te yawil chapbil-c'op te banti ay te chapbil-c'op yu'un Jehová te la schap soc te snich'nab Israel, xchi te Salomón.

¹²Patil te Salomón la stehc'an sba ta stojol te scajtajib ta chiq'uel mahtanil yu'un Jehová ta stojol spisil te pueblo Israel, soc la shach schebal sc'ab.

¹³Te Salomón spasojix yawil pasbil ta bronce banti ya stehc'an sba, ho'eb xuhc'ubil[19] snahtil, ho'eb xuhc'ubil sjamalil soc oxeb xuhc'ubil[20] stoyolil, soc yac'oj ta yohlil te amac'. La stehc'an sba tey a, la squejan sba ta stojol spisil te pueblo Israel, la shach mohel sc'ab ta ch'ulchan,

¹⁴hich la yal: Jehová, Dios yu'un Israel, mayuc yan Dios hich te bin ut'il ha'at ta ch'ulchan o ta bahlumilal, te yac awac' c'ohtuc ta pasel te chapbil-c'op awu'un, soc te ay sc'uxul awo'tan ta stojol te a'batetic awu'un te spisil yo'tanic ayic ta atojol.

¹⁵La awac' c'ohtuc ta pasel te bin la awalbe te awa'bat David te jtat; la awal ta awe soc la awac' c'ohtuc ta pasel ta ac'ab, hich te bin ut'il chican ta ilel ta ora ini.

¹⁶Yo'tic, Jehová, Diosat yu'un Israel, c'ohtesa ta pasel te bin la awalbe te awa'bat David te jtat, te hich la awal: Ma ba ya spas falta jtuhl winic awu'un ta jtojol te ya shuhcan sba ta huctajibal yu'un Israel, teme ya st'umbon te ley cu'un te anich'nab soc teme ya xbehenic ta jtojol hich te bin ut'il behenat ta jtojol te ha'ate, xchihat.

¹⁷Yo'tic, Jehová, Diosat yu'un Israel, ac'a c'ohtuc ta pasel te bin la awalbe te awa'bat David te jtate.

¹⁸Pero ¿melel bal te ya xnahin soc winiquetic ta bahlumilal te Diose? Como te ch'ulchan soc te stoyolil ch'ulchan, ma ba ya x'ochat a, ¿ha'uc to balix a te Na te la jpase?

¹⁹Pero a'iybeya sc'op te a'bat awu'un te bin ya sc'ambat, Jehová, Diosat cu'un, scuenta yu'un yac awa'iybe yaw soc te bin ya yalbat yo'tic te a'bat awu'une.

²⁰Jamaluc asit ta c'ahc'alel soc ta ahc'abal ta stojol te Na ini, ta lugar te hich la awalbe sc'oblal: Tey ya x'ayin a te jbihile, xchihat, scuenta yu'un yac awa'iybe sc'op te a'bat awu'un te c'alal ya yac' sit yelaw ta stojol te lugar ini yu'un ya sc'oponat.

²¹Soc a'iybeya sc'op te a'bat awu'un soc te sc'op te pueblo Israel awu'un c'alal ya yac' sit yelaw ta stojol te lugar ini yu'un ya sc'oponat. A'iybeya sc'opic c'alal ta ch'ulchan, te banti nahinemat; a'iybeya sc'opic soc pasbeya perdón.

²²Teme ay mach'a ya sta smul ta stojol te spat-xuhc soc teme ya sujot ta yalel ta jamal, teme ya xtal yal ta jamal ta stojol te scajtajib mahtanil awu'un li' ta Na ini,

²³a'iybeya awa'iy sc'opic c'alal ta ch'ulchan, pasa te bin ya sc'an pasel; soc ya me achahpan te a'batetic awu'une. A'beya stoj smul te mach'a ay smul, ac'a c'ohtuc ta stojol te castigo yu'un te bin spasoj, soc ya me awal te mayuc smul te mach'a toj, soc ya me awa'be stojol ha chican bin yilel te ya'tele.

²⁴Te c'alal ya stsalot yu'un scontra te pueblo Israel awu'un ta scaj smul ta atojol, teme ya suht tal ta atojol soc teme ya yalic ta jamal te abihil, teme ya sc'oponat li' ta Na ini,

²⁵a'iybeya sc'opic c'alal ta ch'ulchan, pasbeya perdón yu'un smulic te pueblo Israel awu'un, soc suhtesa talel ta q'uinal te awa'beyej te sme'statique.

²⁶Te c'alal ya xmahc te ch'ulchan, te ma ba ya yac' ha'al ta scaj stahoj smulic ta atojol, teme ya yac' sit yelawic ta stojol te lugar ini yu'un ya sc'oponat soc teme ya yalic ta jamal te abihile, teme ya suhtes yo'tanic yu'un te smul te c'alal yac awa'be swocolic,

²⁷a'iybeya sc'opic c'alal ta ch'ulchan, pasbeya perdón yu'un smulic te a'batetic awu'un, ha te pueblo Israel, a'beya snopic te lequil be te ya xbehenic bahel a, soc a'beya tal ha'al li' ta aq'uinal te la awa'be te pueblo awu'une.

²⁸Teme ay wi'nal ta q'uinal, jmilawal-chamel, teme ya xtaquij te awal-ts'unubiletic yu'un sc'uxul c'ahc'al, o ay stotol, o ya xlaj ta muc'ul c'ulubetic o tut c'ulubetic; teme joytaybilix yu'un scontra ta q'uinal te banti nahinemic, o biluc wocol o chamel te ya xtale,

²⁹mach'ayuc a, o ta spisil te pueblo Israel awu'un te ya sc'oponat o te ya yalbat wocol te c'alal ya yil teme ay swocol, teme ya shach sc'abic ta stojol te Na ini,

³⁰a'iybeya sc'opic c'alal ta ch'ulchan, te banti nahinemat; pasbeya perdón, pasa te bin ya sc'an pasel, a'beya ta tuhlultuhl ha chican te bin yilel te bin spasojic, como ha'at ana'beyej yo'tan, como ha'at nax atuquel ana'beyej yo'tan spisil ants-winiquetic,

³¹scuenta yu'un ya xi'at soc ya xbehenic ta behetic awu'un te jayeb c'ahc'al cuxulic ta q'uinal te la awa'be te jme'jtatcotique.

³²Ha nix hich te jyanlum, te ma ha'uc te pueblo Israel awu'un, te ya xtal ta namal q'uinal ta scaj te muc' sc'oblal abihil soc te yip ac'ab, soc te ac'ab te ahachoj, teme ya xtal soc ya yac' te sit yelaw ta stojol te Na ini yu'un ya sc'oponat,

³³a'iybeya sc'op c'alal ta ch'ulchan, ta lugar te banti nahinemat, a'beya spisil bintic ya sc'ambat te jyanlum, scuenta yu'un spisil te pueblohetic ta bahlumilal ya sna'bat abihil soc hich ya yich'at ta muc' te bin ut'il te pueblo Israel awu'un, soc ya sna'ic a te ay ta halel abihil ta stojol te Na ini te la jpase.

³⁴Te c'alal ya xloc' bahel ta ya'beyel guerra te scontra te pueblo awu'un, ta bayuc behil te yac aticon bahel, teme ya yac' sit yelawic ta stojol te pueblo ini te tsahbil awu'un, ta stojol te Na te la jpas yu'un te abihile,

³⁵a'iybeya c'alal ta ch'ulchan te sc'opic soc te bin ya yalic wocol ta atojol, soc pasbeya te bin stojil ya sc'an pasele.

³⁶Te c'alal ya sta smulic ta atojol, (como mayuc mach'a a te ma sta smul), teme ilinat ta stojolic, teme la awac' ta sc'ab te scontra yu'un ya x'ic'ot bahel ta chuquel ta sq'uinal yu'un te scontra, chican teme namal o nopol,

³⁷teme tey ta q'uinal ta banti ayic ta chuquel a ya suhtes yo'tanic, soc ya suhtic tal ta atojol soc ya sc'oponat tey ta sq'uinal te mach'atic ic'otic bahel ta chuquel yu'une, teme ya yalic: La jta jmulcotic, la jpascotic te bin chopol, ma lecuc te bin la jpascotic, teme xchihique,

³⁸teme ya suhtes yo'tanic ta atojol ta spisil yo'tanic soc ta spisil sch'uhlelic tey ta sq'uinal te scontrahic te ic'otic bahel ta chuquel yu'un, teme ya yac' tal sit yelawic ta stojol te q'uinal te la awa'be te sme'static yu'un ya sc'oponat, ta stojol te pueblo te tsahbil awu'un soc te Na la jpasbat yu'un te abihile,

³⁹a'iybeya c'alal ta ch'ulchan ta banti nahinemat te sc'opic soc te bin ya yalbat wocol yu'un, pasbeya te bin stojil ya sc'an pasel soc pasbeya perdón te pueblo awu'un te la sta smul ta atojol.

⁴⁰Yo'tic, Dios cu'un, jamaluc me asit soc jamaluc me achiquin ta ya'iybeyel te bin ya yich' halel ta sc'oponel Dios ta lugar ini.

⁴¹Hahchan yo'tic, Jehová Dios, yu'un ya xnahinat banti cux-o'tanil awu'un, ha'at soc te yawil chapbil-c'op yu'un te awu'ele. Jehová Dios, ha'uc me sc'u'inejic colel te sacerdotehetic awu'un, soc te mach'atic jun yo'tanic ta atojol tse'eluc me yo'tanic yu'un te slequil awo'tan.

⁴²Jehová Dios, ma me xap'aj te mach'a tsahbil awu'un; na'a me te sc'uxul awo'tan ta stojol David te a'bat awu'un, xchi ta sc'oponel Dios te Salomón.