Read Tzeltal 2 Crónicas 7 Bible Online

2 Crónicas 7 - Tzeltal bible

2 Crónicas 7

¹C'alal laj yo'tan ta sc'oponel Dios te Salomón, co tal c'ahc' ta ch'ulchan, laj ta c'ahq'uel te scohtol chic'bil mahtanil soc te yantic milbil mahtaniletic. Te yutsilal Jehová noj ta yutil te Nahe.

²Te sacerdotehetic ma ba hu' ya x'ochic ta sna Jehová, como te yutsilal te Jehová noj ta yutil.

³C'alal la yilic spisil te snich'nab Israel te co tal c'ahc' soc te yutsilal te Jehová ta stojol te Na, la spahcan sbahic c'alal ta lum, la yich'ic ta muc' te Jehová soc la yalbeyic wocol, hich la yalic: Ha lec yo'tan stuquel, soc te sc'uxul yo'tan sbahtel q'uinal ay, xchihic.

⁴Ha yu'un te ajwalil soc spisil te pueblo la yaq'uic milbil mahtaniletic ta stojol Jehová.

⁵Te ajwalil Salomón la ya'be cha'pic soc ho'lajunbahc' (22,000) torohetic, soc ho'lajunpic (120,000) tuminchijetic. Hich te ajwalil soc spisil te pueblo la yaq'uic ta stojol Dios te Templo.

⁶Te sacerdotehetic baht stehc'an sbahic te banti ya x'a'tejic, soc te levitahetic la sc'ayojtaybeyic yutsilal te Jehová soc te a'tejibaletic yu'un música te la spas te ajwalil David yu'un ya sc'ayojtayic a te Jehová, te hich la yalulanic: Como sbahtel q'uinal ay te sc'uxul yo'tan, xchihic ta c'ayojetic te pasbilic yu'un David. Te sacerdotehetic la yoq'uesinic te cornetahic ta stojolic, teq'uelic a spisil Israel.

⁷Te Salomón la sch'ultes te banti yohlil te amac' te ay ta stojol te sna Jehová te bin ut'il tey la yac' a te scohtol chic'bil mahtaniletic soc te sjuhp'el te mahtaniletic scuenta lamal q'uinal; como ta banti te scajtajib ta chiq'uel mahtanil te pasbil ta bronce te spasoj Salomón ma tic'uc a yu'un spisil te scohtol chic'bil mahtaniletic, te mahtaniletic yu'un harina soc te sjuhp'ele.

⁸Hich te Salomón la spas q'uin huqueb c'ahc'al soc spisil Israel, c'ax tsobolic, talemic c'alal ta yochibal Hamat ha to ta uc'um yu'un Egipto.

⁹Ta swaxaquebal c'ahc'al la spasic ch'ul tsoblej, como huqueb c'ahc'al la spasic q'uin yu'un yaq'uel ta stojol Dios te scajtajib ta chiq'uel mahtanil, soc huqueb xan c'ahc'al la spasic te muc'ul q'uine.

¹⁰Ta oxeb scha'winic (23) c'ahc'al ta shuquebal u te Salomón la sticonlan bahel ta snahic te pueblo, tse'el yo'tanic soc bayel yutsil yo'tanic yu'un te bintic lec la spas Jehová ta stojol David, ta stojol Salomón soc ta stojol Israel te pueblo yu'une.

¹¹Hich hu' ta pasel yu'un Salomón te sna Jehová soc te sna ajwalil; soc lec c'oht spisil te bintic la snop ta yo'tan te ya spas te Salomón ta sna Jehová, soc nix ta sna.

¹²Ta ahc'abal chicnaj Jehová ta stojol Salomón, hich la yal: La jca'iybat te ac'ope, soc tsahbil cu'un te lugar ini scuenta Na yu'un milbil mahtaniletic.

¹³Teme ho'on ya jmac te ch'ulchan yu'un ma ba ya xtal ha'al, o teme ya jticon c'ulubetic te ya slajin te q'uinal, o teme ya jticon tal tulan chamel ta stojol te pueblo cu'un;

¹⁴teme ya spehc'an sbahic te pueblo cu'un te yich'beyejonic te jbihil, teme ya sc'oponon soc ya slehbon te jsit quelaw, teme ya suhtes yo'tanic yu'un te bintic chopol spasojique, hich ya ca'iybe sc'opic c'alal ta ch'ulchan, ya jpasbe perdón yu'un smulic, soc ya cac' lecubuc te sq'uinalique.

¹⁵Yo'tic jamal jsit soc jamal jchiquin ta ya'iybeyel sc'opic ta lugar ini,

¹⁶como tsahbilix soc ch'ultesbilix te Na ini scuenta yu'un tey ya x'ayin sbahtel q'uinal a te jbihile; soc te jsit soc te co'tan tey ayic ta spisil ora a.

¹⁷Teme ya xbehenat ta jtojol hich te bin ut'il behen te atat David, teme yac apas spisil te bintic calbeyejat ta mandar, soc teme yac acanantaybon te chahpambil mandariletic cu'un soc te bintic halbil ta mandar,

¹⁸hich ya ca'be yich' yip te ahuctajib ta ajwalil, hich te bin ut'il la jchahp c'op soc te atat David, te hich la jcal: Ma ba ya spas falta jtuhl ats'umbal te ya scuentahin te Israel, te xchihone.

¹⁹Yan teme ya suhtex ta apatic, teme yac awihquitayic hilel te chahpambil mandariletic soc te mandariletic cu'un te la jca'beyex ta atojolic, teme yac awac' abahic ta a'batinel yu'un yantic diosetic, soc teme yac ach'uhuntayique,

²⁰ho'on ya jbulat loq'uel ta jq'uinal te ca'beyejex soc ya jch'oj loq'uel ta jtojol te Na te ch'ultesbilix cu'un yu'un te jbihile, soc ya cac' ta labanel soc ta tse'layel yu'un spisil pueblohetic.

²¹Te Na ini te c'ax t'ujbil ta ora ini, xcham yo'tanic yu'un spisil mach'atic ya xc'axic tey a, soc hich me ya yalic: ¿Bin yu'un hich la spas Jehová ta stojol te q'uinal soc ha'i Na ini? xchihic.

²²Hich me ya sjaq'uic: Como la yihquitayic te Jehová, te Dios yu'un te sme'static te loq'uesotic tal yu'un ta sq'uinal Egipto, hahch sch'uhunic yantic diosetic, la sch'uhuntayic soc la yac' sbahic ta a'batinel yu'unic. Ha yu'un te la yac' taluc ta stojolic spisil te wocol ini, xchi te Jehová.