Read Tzeltal 2 Crónicas 8 Bible Online

2 Crónicas 8 - Tzeltal bible

2 Crónicas 8

¹C'ax jtahb (20) ha'bil ta hu'el yu'un Salomón te sna Jehová soc te na yu'une,

²patil la scha'pas xan te pueblohetic te a'bot yu'un Hiram, la yac' ayinuc tey a te snich'nab Israel.

³Ta patil, te Salomón baht ta Hamat-Soba, la yu'untay.

⁴Soc la scha'pas te Tadmor ta jochol taquin q'uinal, soc spisil te pueblohetic yu'un sq'uejojibal we'eliletic te la spas ta Hamat.

⁵Ha nix hich la scha'pas xan te Bet-horón ta ahc'ol soc te Bet-horón ta ahlan, ha pueblohetic te ay ts'ahquetic, puertahetic soc sc'atal-te'eletic;

⁶la scha'pas xan te Baalat soc spisil te pueblohetic yu'un sq'uejojibal we'eliletic te ayic yu'un Salomón; soc spisil te pueblohetic yu'un carretahetic soc yu'un jmoheletic ta cawu, soc spisil bintic la sc'an la spas ta Jerusalén, ta Líbano soc ta spisil te q'uinal te scuentahinej.

⁷Spisil te mach'atic hilemic yu'un te hitita, amorreo, ferezeo soc te jebuseohetic, te ma ha'uc israeletic,

⁸ha te sts'umbalic te hilic ta q'uinal, te ma ba lajinotic yu'un te snich'nab Israel, te Salomón la yac'ticlambe tulan ya'telic c'alal ora.

⁹Yan te snich'nab Israel ma ba ac'otic ta mosohil yu'un Salomón ta spasbeyel te ya'tele, como ha winiquetic yu'un guerra, mach'atic ay ya'telic, capitanetic soc scuentahinejic carretahetic yu'un guerra soc ha jmoheletic ta cawu.

¹⁰Soc ay lajuneb yoxlajunwinic (250) gobernadoretic yu'un Salomón te scuentahinejic te j'a'teletic.

¹¹Te Salomón la yic' loq'uel te yantsil-nich'an faraón ta Pueblo yu'un David, la yac' ta na te la spasbe, yu'un la yal: Te quihnam ma ba ya xnahin ta sna David te ajwalil yu'un Israel, como ch'uhltesbilic te banti ochem te scaxahul te chapbil-c'op yu'un Jehová, xchi.

¹²Te Salomón la ya'be scohtol chic'bil mahtaniletic te Jehová ta scajtajib ta chiq'uel mahtanil yu'un Jehová te spasoj ta stojol te slehchelul templo;

¹³la yac'ticlan hich te bin ut'il ya sc'an ya yich' aq'uel jujun c'ahc'al, hich te bin ut'il ya yal te mandariletic yu'un Moisés, ha ta sc'ahc'alel cux-o'tan, ta yach'il u soc ta ch'ul q'uinetic te ya yich'ic pasel oxeb buelta ta jujun ha'bil: ha te Q'uin yu'un Pan ma ba yich'oj levadura, te Q'uin yu'un Semanahetic soc te Q'uin yu'un Yaxnahetic.

¹⁴Soc la schahpan bin ut'il ya sjel sbahic te sacerdotehetic yu'un ya spasic ya'telic, hich te bin ut'il la yal mandar te David te state, ha nix hich te levitahetic te ay ta scuentahic yalbeyel wocol te Dios soc scoltayel te sacerdotehetic te bintic ya sc'an pasel jujun c'ahc'al; soc la schahpan te jcanan-ti'nahiletic yu'un te jujun ti'nahil, como hich yaloj ta mandar te David te winic yu'un Dios.

¹⁵Ma ba la sch'aybeyic smandar te ajwalil sc'oblal te sacerdotehetic, te levitahetic soc te yawil c'ulejaliletique.

¹⁶C'oht ta pasel spisil te ya'tel te Salomón, te c'alal bin ora la yich' otsesbeyel te yich'o-ip te sna Jehová ha to c'alal hu' ta pasel. Hich ts'acal hu' te sna Jehová.

¹⁷Te Salomón baht ta Ezión-geber soc ta Elat ta ti'mar ta sq'uinal Edom.

¹⁸Como te Hiram la sticombe barcohetic ta scuenta a'batetic yu'un, soc winiquetic te ya sna'ic ta lec bin ut'il ya xbehenic ta mar. La sjoquinic bahel te a'batetic yu'un Salomón ta Ofir, tey la yich'ic tal a lajuneb yoxwinic scha'bahc' (450) talento[21] oro, la yich'ic tal ta stojol te ajwalil Salomón.