Read Tzeltal 2 Crónicas 9 Bible Online

2 Crónicas 9 - Tzeltal bible

2 Crónicas 9

¹Te ajwalil-ants yu'un Sabá, c'alal la ya'iybe yutsil sc'oblal ta halel te Salomón, tal ta Jerusalén soc tsobol mach'atic joquimbilic yu'un, soc camellohetic te scuchojic tal bintic sumet yic', bayel oro soc t'ujbil tonetic, yu'un ya stsaj ta sjoc'obeyel chuhcul c'opetic te Salomón. C'alal c'oht ta stojol Salomón la sjoc'obe spisil bintic ay ta yo'tan.

²Te Salomón la suhtbe spisil te bintic joc'obot yu'un, mayuc bin ma ba hu' yu'un sutbeyel.

³Te ajwalil-ants yu'un Sabá, c'alal la yil te sp'ijil yo'tan te Salomón, te na te spasoj,

⁴te we'elil ay ta mesa yu'un, te bin ut'il ya shuhcan sbahic te a'batetic yu'un, te bin yilel te a'batetic yu'un soc te sc'u' spaq'uic, te jc'asesej-copahetic soc te sc'u' spaq'uic, soc te cajalcaj mohibal te ya xmo a[22] ta sna Jehová, xcham yo'tan yu'un.

⁵Hich la yalbe te ajwalil: Smelelil te bin la jca'iy ta jlumal te bintic ay awu'un soc te ap'ijile.

⁶Pero ma ba la jch'uhumbe sc'opic ha to c'alal talon soc la jquil ta jsit. Ma ba stahoj j'ohlil te smuc'ul ap'ijil te halboton, c'axem to xan a te ac'oblal te bin ut'il ca'iyej.

⁷Bayel me yutsilic te winiquetic awu'un, soc bayel yutsilic te a'batetic awu'un te spisil ora ayic ta atojol ta ya'iyel te ap'ijile.

⁸Bayel me yutsil te Jehová te Dios awu'un, te ha lecat ta yo'tan, te la yac'at ta shuctajib scuenta ajwalil yu'un Jehová te Dios awu'une. Te bin ut'il te Dios awu'un c'ux la ya'iy ta yo'tan te Israel soc yu'un ya ya'be yich' yipic sbahtel q'uinal, hich la yotsesat ta ajwalil ta stojolic scuenta yu'un toj yac awa'iy chahpanwanej soc stojil bin yac apas, xchi.

⁹Hich te ants la ya'be te ajwalil wacwinic (120) talento[23] oro, bayel bintic sumet yic' soc t'ujbil tonetic. Mayuc yan hich yipal bintic sumet yic' te bin ut'il la yac' te ajwalil-ants yu'un Sabá ta stojol te ajwalil Salomón.

¹⁰Te a'batetic yu'un Hiram soc te a'batetic yu'un Salomón te la yich'ic tal oro ta Ofir, ha nix la yich'ic tal sándalo-te' soc t'ujbil tonetic.

¹¹Te ajwalil la spas ta sándalo-te' te cajalcaj mohel ta sna Jehová soc ta sna ajwalil, soc arpahetic soc salteriohetic yu'un te jc'ayojetique. Mayuc banti hich yilel te'etic ta sq'uinal Judá.

¹²Te ajwalil Salomón la ya'be te ajwalil-ants yu'un Sabá spisil te bin la sc'an yo'tan soc te c'ambot yu'une, c'ax hich a te bin ut'il ich'bot tal yu'un te antse. Patil suht bahel ta sq'uinal soc te a'batetic yu'une.

¹³Te oro la yich' jujun ha'bil te Salomón, ha waqueb schanlajunwinic scha'bahc' (666) talento,[24]

¹⁴ma ba ahtaybil te spatanic te jchombajeletic soc te jmambajeletic. Ha nix hich spisil te ajwaliletic ta Arabia soc te gobernadoretic yu'un te q'uinal, la yich'beyic tal oro soc plata te Salomón.

¹⁵Te ajwalil Salomón la spas lajunwinic (200) muc'ul mahquilaletic yu'un guerra ta tembil oro. Te jujune yich'oj lajunwinic scha'bahc' (600) siclo[25] tembil oro.

¹⁶Soc la spas ho'lajunwinic (300) mahquilaletic ta tembil oro, ho'lajunwinic (300) siclo[26] oro te jujun; la yac'ticlan ta na Tohyemte'etic yu'un Líbano.

¹⁷Soc te ajwalil la spas muc'ul huctajibal ta marfil soc la spots ta lequil oro.

¹⁸Te huctajibal ay wac-caj te smohibal soc scajtajib yoc pasbil ta oro te jun ay soc te huctajibal, ay scajtajib sc'ab ta jujujehch, soc cha'coht chojetic ta jujujehch.

¹⁹Soc ay lahchaycoht (12) chojetic ta cajalcaj mohel, jujucoht ta jujujehch. Mayuc yan huctajibal te hich yich'oj pasel ta yantic nacionetic.

²⁰Spisil te vasohetic yu'un te ajwalil Salomón pasbilic ta oro, soc spisil te vasohetic ta na Tohyemte'etic yu'un Líbano pasbilic ta lequil oro. Ta yorahil Salomón mayuc sc'oblal ta o'tanil te plata.

²¹Como te barcohetic yu'un te ajwalil ya xbahtic ta Tarsis soc te a'batetic yu'un Hiram, soc ta oxoxeb ha'bil ya suhtic tal, ya yich'ic talel oro, plata, marfil, maxetic soc pavo real.

²²Te ajwalil Salomón c'ax hich sc'ulejal soc sp'ijil a te bin ut'il yantic ajwaliletic ta bahlumilal.

²³Spisil te ajwaliletic ta bahlumilal yo'tanuc ya yilbeyic sit te Salomón yu'un ya ya'iybeyic te sp'ijil a'bot yu'un te Diose.

²⁴Ta jujun ha'bil ta jujutuhl ya yich'beyic tal smahtan: ha te bintic pasbil ta plata, ta oro, o c'u'uletic, a'tejibaletic yu'un guerra, bintic sumet yic', cawuhetic soc mulahetic.

²⁵Te Salomón ay lajunbahc' (4,000) yawil cawuhetic soc carretahetic, soc j'ohlil scha'pic (12,000) jmoheletic ta cawu te la yac'ticlan ta pueblohetic yu'un te carretahetic, soc ta banti ay te ajwalil ta Jerusalén.

²⁶Soc scuentahinej spisil te ajwaliletic c'alal ta muc'ul-ha' Éufrates, c'alal ta sq'uinal te filisteohetic, ha to ta mojon yu'un Egipto.

²⁷Te ajwalil la stsob bayel plata ta Jerusalén hich te bin ut'il tonetic, soc bayel cedrohetic hich te bin ut'il ha'mal higuerahetic ta tsehltsehltic.

²⁸Te cawuhetic yu'un Salomón ic'ticlambil tal ta Egipto soc ta spisil yantic nacionetic.

²⁹Te bintic xan la spas te Salomón ta shahchibal c'alal ta slajibal, ts'ihbabil hilel ta hunetic yu'un te jalwanej Natán, ta sc'op jalwanej yu'un Ahías te talem ta Silo, soc ta sc'op jalwanej yu'un te jalwanej Iddo sc'oblal te Jeroboam snich'an Nabat.

³⁰Cha'winic (40) ha'bil ay ta ajwalil te Salomón ta Jerusalén ta stojol spisil Israel.

³¹Cham[27] te Salomón, la smuquic ta Pueblo yu'un David te state. Ha och ta sjelol ta ajwalil te Roboam te snich'ane.