Read Tzeltal Esdras 1 Bible Online

Esdras 1 - Tzeltal bible

Esdras 1

¹Ta shahchibal ha'bil yochel ta ajwalil te Ciro ajwalil yu'un Persia, scuenta yu'un ya xc'oht ta pasel te sc'op Jehová te la yal ta scuenta te Jeremías, te Jehová la stijbe yo'tan te Ciro ajwalil yu'un te persiahetic, te hich la yal soc hich la sts'ihbay ta carta ta stojol spisil ban c'alal smacoj ta ajwalil:

²Hich ya yal te Ciro ajwalil yu'un Persia: Te Jehová te Dios ta ch'ulchan, ya'beyejon ta jcuenta spisil ta ban c'alal smacoj te ajwaliletic ta bahlumilal; soc ha la yalbon mandar te ya jpasbe sna ta Jerusalén te ay ta sq'uinal Judá.

³Mach'ayuc a ta awohlilic te ha pueblohex yu'un, Dios ac'a joquinotuc yu'un, mohan bahel ta Jerusalén te ay ta Judá, pasa te sna Jehová te Dios yu'un Israel, ha te Dios te ay ta Jerusalén.

⁴Soc spisil te mach'atic hilemic, bayuc lugaril te nahinemic, ac'a scoltayic ta oro, biluquetic, chambahlametic, soc mahtaniletic scuenta sc'anojel yo'tanic yu'un te sna Dios te ay ta Jerusalén, xchi.

⁵Ha yu'un hahchic te jtsobawetic yu'un jujun sna sme'stat yu'un Judá soc Benjamín, soc te sacerdotehetic soc levitahetic, spisil te mach'atic tijbot yo'tanic yu'un Dios te ya xmohic bahel ta spasel te sna Jehová te ay ta Jerusalén.

⁶Spisil te spat-xuhquic la scoltayic ta plata, oro soc spisil biluc, chambahlametic soc biluquetic te t'ujbilic te bayel stojol, soc yantic mahtaniletic te la yaq'uic scuenta sc'anojel yo'tanic.

⁷Te ajwalil Ciro la sloq'ues te biluquetic te ya xtuhun ta sna Jehová, te yich'oj ta Jerusalén te Nabucodonosor te la yac'ticlan ta sna te diosetic yu'une.

⁸Te Ciro ajwalil yu'un Persia la suhtes ta scuenta te Mitrídates te tesorero, te la yahtaylan soc la ya'be te Sesbasar te príncipal yu'un Judá.

⁹Hich ay te ahtaybil yu'unic: lajuneb scha'winic (30) muc'ul tazahetic pasticlambil ta oro, lajunwinic yoxbahc' (1,000) muc'ul tazahetic pasticlambil ta plata, baluneb scha'winic (29) cuchillohetic,

¹⁰lajuneb scha'winic (30) tazahetic pasticlambil ta oro, jbahc' soc lajuneb (410) tazahetic pasticlambil ta plata, soc lajunwinic yoxbahc' (1,000) xan yantic biluquetic.

¹¹Ta spisil te biluquetic pasticlambil ta oro soc ta plata ay lajunwinic schanlajunbahc' (5,400). Spisil ini la yich' bahel te Sesbasar te c'alal hahchic bahel ta Babilonia te jchuqueletic te bahtic ta Jerusalén.