Read Tzeltal Esdras 10 Bible Online

Esdras 10 - Tzeltal bible

Esdras 10

¹C'alal yac sc'opombel Dios a te Esdras soc ta yalel te mulil, ta oq'uel soc ta squejanel sba ta stojol te Templo yu'un Dios, bayel israeletic c'oht sjoy sbahic ta stojol, ha winiquetic, antsetic soc alaletic; yaquic ta tulan oq'uel.

²Ha yu'un te Secanías snich'an Jehiel, te ha sts'umbal Elam, hich la yalbe te Esdras: Te ho'otcotic ma junuc co'tancotic ta stojol te Dios cu'untic, la jquic' quihnamincotic jyanlum-antsetic. Aunque hich ay, ay to bin ya xhu' ta pasel ta stojol Israel.

³Yo'tic, ya jchahp jc'optic soc te Dios cu'untic, ya jticontic suhtel spisil te jyanlum-antsetic cu'uncotic soc te yalatac, ha chican bin ya yal stuquel te cajwal soc te mach'atic ya yich'ic ta muc' te smandar te Dios cu'untique. ¡Ac'a yich' pasel hich te bin ut'il ya yal te Ley!

⁴Hahchan, como ha'at ay ta acuenta spasel, te ho'otcotic ya jcoltayatcotic. ¡Ac'a fuersa, pasa te a'tele! xchi.

⁵Ha yu'un hahch te Esdras, la yalbe te ac'a yalic ta jamal ta stojol Dios te príncipaletic yu'un te sacerdotehetic soc te levitahetic soc spisil Israel te hich me ya spasic. Hich la yalic ta jamal.

⁶Te Esdras loc' bahel ta sna Dios, baht ta scuarto te Johanán snich'an Eliasib. C'alal tey ay a ma ba la swe' pan soc ma ba la yuch' ha', como la smel yo'tan yu'un te ma junuc yo'tanic ta stojol Dios te mach'atic suhtemic tal ta chuquel.

⁷La yich' halel ta spisil Judá soc Jerusalén te ya me stsob sbahic ta Jerusalén spisil te mach'atic suhtemic tal ta chuquel.

⁸Te mach'a ma ba ya xc'oht ta oxeb c'ahc'al, hich te bin ut'il schapojic te príncipaletic soc te mamaletic, ya sch'ay spisil sq'uinal soc ya yich' loq'uesel ta stojol te mach'atic suhtemic tal ta chuquel.

⁹Ha yu'un spisil te winiquetic ta Judá soc ta Benjamín la stsob sbahic ta Jerusalén ta yoxebal c'ahc'al, ta jtahb (20) c'ahc'al ta sbalunebal u. Spisilic la shuhcan sbahic ta plaza yu'un te sna Dios, yaquic ta nihquel yu'un te c'op soc yu'un te ha'ale.

¹⁰Te sacerdote Esdras la stehc'an sba, hich la yalbe: Te ha'exe atahoj amulic ta scaj te la awic' awihnaminic jyanlum-antsetic, hich la atohytesbeyic xan smul a te Israel.

¹¹Ha yu'un yo'tic halbeya amulic te Jehová te Dios yu'un te ame'atatic, soc pasahic te bin ya sc'an yo'tan. Loc'anic ta stojol te jyanlumetic soc ta stojol te jyanlum-antsetic, xchi.

¹²Ta spisil te pueblo hich la sjaq'uic ta aw: Hich ya jpascotic te bin yac awale.

¹³Pero bayel te pueblo soc yorahil ha'al, ma xhu' ya x'ayinotcotic ta calle; soc te c'opetic ini ma xchapaj ta jun cheb nax c'ahc'al; como bayelotcotic te jtahoj jmulcotic.

¹⁴Ac'a hiluc te príncipaletic cu'uncotic scuenta sjelol spisil te pueblo. Spisil mach'atic te ayic ta pueblohetic cu'uncotic te yic'oj yihnaminic jyanlum-antsetic ya me xtalic soc te mamaletic soc te juecetic yu'un te jujuntic pueblo te bin c'ahc'alil ya xhalbotic, ha to c'alal ya xlahmaj te tulan yilimba te Dios cu'untic ta scaj te c'op ini, xchihic.

¹⁵Ha nax te Jonatán snich'an Asael soc te Jahazías snich'an Ticva ma lecuc la ya'iyic, soc ha coltayotic yu'un te Mesulam soc Sabetai te levitahetic.

¹⁶Te mach'atic suhtic tal ta chuquel hich la spasic. Te sacerdote Esdras la stsa jtsobawetic yu'un jujun sna sme'static. Ta spisilic jujutuhl huhcajic ta sba c'ahc'alil ta slajunebal u ta schahpanel te c'ope.

¹⁷Ta sba c'ahc'alil ta shachel u laj yo'tanic ta schahpanel spisil te mach'atic yic'oj yihnaminic jyanlum-antsetic.

¹⁸Te sacerdotehetic te yic'oj yihnaminic jyanlum-antsetic, hich ayic: Ta sts'umbal Jesúa snich'an Josadac soc te yermanotac: ha te Maasías, Eliezer, Jarib, soc Gedalías.

¹⁹Ha la yac' sc'abic ta yalel te ya me yihquitayic te antsetic yu'unique. Soc jujutuhl la yaq'uic jujucoht tat tuminchij yu'unic scuenta mahtanil yu'un te smulique.

²⁰Ta sts'umbal Imer: ha te Hanani soc Zebadías.

²¹Ta sts'umbal Harim: ha te Maasías, Elías, Semaías, Jehiel soc Uzías.

²²Ta sts'umbal Pasur: ha te Elioenai, Maasías, Ismael, Natanael, Jozabad soc Elasa.

²³Te levitahetic: ha te Jozabad, Simei, Kelaía (Kelita yan sbihil), Petaías, Judá soc Eliezer.

²⁴Te jc'ayojetic: ha te Eliasib. Te jcanan-ti'nahiletic: ha te Salum, Telem soc Uri.

²⁵Te yantic israeletic: Ta sts'umbal Paros: ha te Ramía, Jezías, Malquías, Mijamín, Eleazar, Malquías soc Benaía.

²⁶Ta sts'umbal Elam: ha te Matanías, Zacarías, Jehiel, Abdi, Jeremot soc Elías.

²⁷Ta sts'umbal Zatu: ha te Elioenai, Eliasib, Matanías, Jeremot, Zabad soc Aziza.

²⁸Ta sts'umbal Bebai: ha te Johanán, Hananías, Zabai soc Atlai.

²⁹Ta sts'umbal Bani: ha te Mesulam, Maluc, Adaía, Jasub, Seal soc Ramot.

³⁰Ta sts'umbal Pahat-moab: ha te Adna, Quelal, Benaía, Maasías, Matanías, Bezaleel, Binuy soc Manasés.

³¹Ta sts'umbal Harim: ha te Eliezer, Isías, Malquías, Semaías, Simeón,

³²Benjamín, Maluc soc Semarías.

³³Ta sts'umbal Hasum: ha te Matenai, Matata, Zabad, Elifelet, Jeramai, Manasés soc Simei.

³⁴Ta sts'umbal Bani: ha te Madai, Amram, Uel,

³⁵Benaía, Bedías, Queluhi,

³⁶Vanías, Meremot, Eliasib,

³⁷Matanías, Matenai, Jaasai,

³⁸Bani soc Binuy,[13] Simei,

³⁹Selemías, Natán, Adaía,

⁴⁰Macnadebai, Sasai, Sarai,

⁴¹Azareel, Selemías, Semarías,

⁴²Salum, Amarías soc José.

⁴³Ta sts'umbal Nebo: ha te Jeiel, Matatías, Zabad, Zebina, Jadau, Joel soc Benaía.

⁴⁴Ta spisilic ini yic'oj yihnaminic jyanlum-antsetic, pero la sticonic suhtel soc te yalataque.[14]