Read Tzeltal Esdras 3 Bible Online

Esdras 3 - Tzeltal bible

Esdras 3

¹C'alal la sta te shuquebal u, ayiquix ta jujuntic pueblo yu'unic a te snich'nab Israel, junax la stsob sbahic ta Jerusalén.

²Te Jesúa snich'an Josadac soc te yermanotac sacerdotehetic, soc Zorobabel snich'an Salatiel soc te yermanotac, hahch spasic te scajtajib ta chiq'uel mahtanil yu'un te Dios yu'un Israel scuenta yu'un ya yich' aq'uel scohtol chic'bil mahtanil tey a hich te bin ut'il ts'ihbabil hilel ta ley yu'un Moisés te winic yu'un Dios.

³Aunque la xi'ic te mach'atic tey ayic a, la spasic te scajtajib ta chiq'uel mahtanil ta banti ay ta nahilal, ta jujun sab soc ta jujun tibiltic la yaq'uic scohtol chic'bil mahtaniletic tey a ta stojol Jehová.

⁴Soc la spasic te Q'uin yu'un Yaxna, hich te bin ut'il ts'ihbabil hilel, soc ta jujun c'ahc'al la yaq'uic te scohtol chic'bil mahtaniletic hich yipal te bin ut'il ya yal te mandaril scuenta jujun c'ahc'al;

⁵soc la yaq'uic te scohtol chic'bil mahtaniletic yu'un jujun c'ahc'al, yu'un yach'il u, soc yu'un spisil te ch'ul q'uinetic yu'un Jehová, soc spisil mahtaniletic te ac'bilic scuenta sc'anojel yo'tanic ta stojol Jehová.

⁶Ta sba c'ahc'alil ta shuquebal u hahch yaq'uic te scohtol chic'bil mahtaniletic ta stojol Jehová, aunque ma to ba hahchem ta cha'pasel xan a te yich'o-ip te templo yu'un Jehová.

⁷La ya'beyic taq'uin te albañiletic soc te carpinterohetic, soc la ya'beyic we'el-uch'elil soc aceite te mach'atic yu'un Sidón soc Tiro scuenta yu'un ya yich'ic tal cedrohetic ta mar c'alal Líbano c'alal ta Jope, hich te bin ut'il la yal ta mandar te Ciro ajwalil yu'un Persia.

⁸Ta schebal u ta schebal ha'bil shulelic ta Jerusalén a, te Zorobabel snich'an Salatiel, Jesúa snich'an Josadac, soc te yantic yermanotac, ha te sacerdotehetic, levitahetic soc spisil te mach'atic bahemic ta chuquel te ayiquix ta Jerusalén, hahchic ta a'tel; la ya'beyic ya'tel te levitahetic te c'axemix jtahb (20) ya'bilal te ya scuentahinic te a'tel ta sna Jehová.

⁹Te Jesúa, te snich'nab soc te yermanotac, te Cadmiel soc te snich'nab, ha te sts'umbal Judá, soc te sts'umbal Henadad soc te snich'nab soc yermanotac, te ha levitahetic, junax la yac' sbahic ta scuentahinel te mach'atic ya spasic te a'tel ta sna Dios.

¹⁰Te c'alal hahch yotsesic te yich'o-ip te templo yu'un Jehová te albañiletic, tal stehc'an sbahic te sacerdotehetic, slapojic c'u'ul scuenta sacerdotehil soc yich'ojic cornetahetic a, soc te levitahetic te sts'umbal Asaf, yich'ojic platillohetic scuenta sc'ayojtaybeyel yutsilal te Jehová, hich te bin ut'il la yal mandar te David ajwalil yu'un Israel.

¹¹C'ayojinic, la yalbeyic yutsil soc la yalbeyic wocol te Jehová, hich la yalic: Como ha lec yo'tan, sbahtel q'uinal c'ux ta yo'tan te Israel, xchihic. Spisil te pueblo awonic ta scuenta yutsil yo'tanic, la yalbeyic yutsil sc'oblal te Jehová como yac ta otsesel te yich'o-ip te sna Jehová.

¹²Tsobol te sacerdotehetic, levitahetic soc jtsobawetic yu'un jujuchahp sna sme'stat, soc te mamaletic te la yilic te Templo te ay ta nahilal, tulan oq'uic te c'alal la yilic te yac ta ochel te yich'o-ip te Templo ini; pero tsobol yantic yacalic ta aw ta scuenta yutsil yo'tanic.

¹³Ma ba a'iybaj q'uinal te pueblo yu'un tulan aw yu'un yutsil q'uinal soc te aw yu'un oq'uel, como yaquic ta aw te pueblo, namal chican ta a'iyel.