Read Tzeltal Esdras 5 Bible Online

Esdras 5 - Tzeltal bible

Esdras 5

¹Te jalwanejetic Hageo soc Zacarías snich'an Ido, c'opojic ta stojol te judiohetic ta sq'uinal Judá soc ta Jerusalén ta scuenta sbihil te Dios yu'un Israel te ha cuentahimbilic yu'un.

²Ha yu'un te Zorobabel snich'an Salatiel, soc Jesúa snich'an Josadac, hahchic ta scha'pasel xan te sna Dios te ay ta Jerusalén; soc joquimbilic yu'un te jalwanejetic yu'un Dios te coltayotic yu'unique.

³Ta hich ora te Tatnai gobernador yu'un te q'uinal ay ta jehch muc'ul-ha', soc te Setar-boznai soc te smohloltac hich la yalbeyic: ¿Mach'a la spasex ta mandar te yac acha'pasic xan te templo ini soc te sts'ahcule? xchihic.

⁴Soc la sjoc'obeyic: ¿Bin sbihilic te mach'atic yac scha'pasbelic te na ini? xchihic.

⁵Pero Dios yac yilbel te mamaletic yu'un Judá, hich ma ba hu' yu'unic scomel te a'tel ha to c'alal ya x'a'bot sna' te Darío soc te ya sticon tal te suhtibe.

⁶Hich ay te carta te la sticombeyic te ajwalil Darío te Tatnai gobernador yu'un te q'uinal ay ta jehch muc'ul-ha', soc te Setar-boznai soc te smohloltac ta gobernadoril te ayic ta jehch muc'ul-ha'.

⁷La sticombe carta te hich ts'ihbabil tey a: Ajwalil Darío, lamaluc me q'uinal ta atojol.

⁸Ac'a sna' te ajwalil te bohotcotic ta sq'uinal Judá, ta sna te muc'ul Dios, te ya yich' pasel ta muc'ul tonetic. Yaquix ta ochel te ste'el te spahc'ule; sujoj sbahic ta a'tel, ora nax ta hu'el te a'tele.

⁹Ha yu'un hich la joc'obecotic te mamaletic: ¿Mach'a la spasex ta mandar te yac acha'pasic xan te Templo ini soc te sts'ahcule? xchihotcotic.

¹⁰Soc la joc'obecotic sbihilic scuenta yu'un hich ya xhu' ya ca'batcotic ana' ta hun te sbihil te winiquetic te jucbilic yu'un.

¹¹Pero hich la suhtic te jc'opcotic: Ho'otcotic, a'batotcotic yu'un te Dios yu'un te ch'ulchan soc bahlumilal, soc yac jcha'pasbelcotic te Templo te ayix bayel ha'bil la yich' pasel, te hu' yu'un spasel jtuhl ajwalil yu'un Israel.

¹²Pero ta patil te jme'jtatcotic la yaq'uic ilinuc te Dios yu'un te ch'ulchan, ha la ya'be ta sc'ab Nabucodonosor ajwalil yu'un Babilonia, te caldeo-winic, te ha la sjin te Templo ini soc la yic'ticlan bahel ta chuquel te pueblo ta Babilonia.

¹³Pero ta shahchel ha'bil ya'tel ta ajwalil te Ciro ajwalil yu'un Babilonia, ha nix la yal mandar te ya yich' cha'pasel xan te sna Dios.

¹⁴Soc te biluquetic pasticlambil ta oro soc ta plata ta sna Dios, te Nabucodonosor la sloq'ues ta Templo te ay ta Jerusalén, la yich' bahel ta templo ta Babilonia. Te ajwalil Ciro la sloq'ues ta templo ta Babilonia, la ya'be ta sc'ab te Sesbasar, te mach'a otsesot ta gobernador yu'un.

¹⁵Hich la yalbe: Ich'a bahel ta Templo te ay ta Jerusalén te biluquetic ini, soc ac'a yich' cha'pasel te na yu'un Dios ta yawil, xchi.

¹⁶Ha yu'un tal te Sesbasar, la yotsesbe te yich'o-ip te sna Dios te ay ta Jerusalén. Ta hich ora soc c'alal ora ini yac ta pasel, pero ma to ba hu'em, xchihic.

¹⁷Teme lec ya ya'iy te ajwalil, leha ta snahul c'ulejalil yu'un ajwaliletic te ay ta Babilonia teme melel nix a te ajwalil Ciro la yal mandar ta cha'pasel te sna Dios te ay ta Jerusalén, soc ac'a yac' jna'cotic te bin ya sc'an te ajwalil ta scuenta te c'op ini, xchihic.