Read Tzeltal Esdras 7 Bible Online

Esdras 7 - Tzeltal bible

Esdras 7

¹Ta patil a ini, te c'alal ay ta ajwalil a te Artajerjes ajwalil yu'un Persia, te Esdras te patil al-nich'an yu'un ta cajalcaj sts'umbal te Seraías, Azarías, Hilcías,

²Salum, Sadoc, Ahitob,

³Amarías, Azarías, Meraiot,

⁴Zeraías, Uzi, Buqui,

⁵Abisúa, Finees, Eleazar soc Aarón te primero sacerdote,

⁶hahch loq'uel ta Babilonia. Te Esdras p'ijuben ta lec yu'un te ley yu'un Moisés te a'bot yu'un Jehová te Dios yu'un Israel; soc ha a'bot yu'un te ajwalil spisil te bintic la sc'an, como te sc'ab te Jehová te Dios yu'un ay ta stojol te Esdras.

⁷Ay snich'nab Israel soc sacerdotehetic, levitahetic, jc'ayojetic, jcanan-ti'nahiletic soc j'a'teletic ta Templo te la sjoquinic bahel ta Jerusalén ta shuquebal ha'bil yochel ta ajwalil a te Artajerjes.

⁸Te Esdras c'oht ta Jerusalén ta yo'ebal u ta shuquebal ha'bil yochel ta ajwalil a.

⁹Ta sba c'ahc'alil yu'un te shahchibal u hahch loq'uel ta Babilonia, c'oht ta Jerusalén ta sba c'ahc'alil ta yo'ebal u, como ay ta stojol te sc'ab te Diose.

¹⁰Como te Esdras yac'oj yo'tan ta snopel te mandariletic yu'un Jehová soc ta spasel, soc ta yaq'uel ta nopel ta Israel te chahpambil mandariletic soc te bintic yaloj ta mandar te Diose.

¹¹Ha te copia yu'un te carta ini te a'bot yu'un te ajwalil Artajerjes te sacerdote Esdras, te mach'a p'ijuben yu'un te mandariletic yu'un Jehová soc te chahpambil mandariletic a'bot te Israel:

¹²Te Artajerjes, ajwalil yu'un ajwaliletic, ya spatbe yo'tan te Esdras, sacerdote soc maestro yu'un te ley yu'un te Dios ta ch'ulchan.

¹³Hich la jcalix ta mandar: Spisil te mach'atic ayic ta cuentahinel cu'un te ha yu'un te pueblo Israel, soc te sacerdotehetic soc levitahetic yu'unic, te ya sc'anic ya sjoquinat bahel ta Jerusalén, ac'a bahtuc.

¹⁴Como te ajwalil soc te huctuhl j'ac'-o'tanil yu'un ya sticonat bahel ta Judá soc ta Jerusalén ta stsahtayel bin yilel, ha chican bin ya yal te ley yu'un te Dios awu'un te ay ta ac'ab;

¹⁵soc te yac awich' bahel te plata soc oro te la yaq'uic te ajwalil soc te j'ac'-o'taniletic ta sc'anojel yo'tanic ta stojol te Dios yu'un Israel te nahinem ta Jerusalén;

¹⁶soc yu'un yac awich' bahel spisil te plata soc oro te ya xhu' yac atsob ta spisil te sq'uinal Babilonia, soc te mahtaniletic te ta sc'anojel yo'tanic ya yaq'uic te pueblo soc te sacerdotehetic yu'un te sna te Dios awu'un te ay ta Jerusalén.

¹⁷Ha taq'uin ini ya me aman jcolel torohetic, tat tuminchijetic, jcolel tuminchijetic, soc te mahtaniletic yu'un harina soc malbil mahtaniletic yu'unic, ya me awa'beyic ta scajtajib ta chiq'uel mahtanil ta sna te Dios awu'unic te ay ta Jerusalén.

¹⁸Ha'at soc te awermanotac pasahic te bin lec yac awa'iyic soc te oro soc plata te ay to ya xhile, ha chican bin ya sc'an te Dios awu'unique.

¹⁹Te bintic ya xtuhun yu'un te a'tel ta sna te Dios awu'unic, te awich'ojix, ya me awich' suhtel ta stojol Dios ta Jerusalén.

²⁰Soc te bintic xan ya sc'an yu'un te sna te Dios awu'un, ya me yich' loq'uesel ta yawil sc'ulejal te ajwalil.

²¹Ho'on, Artajerjeson ajwalilon, ya calbe mandar spisil te tesorerohetic te ay ta jehch muc'ul-ha' Éufrates, spisil te bintic ya sc'an te sacerdote Esdras te maestro te p'ijuben ta ley yu'un te Dios ta ch'ulchan, ora me yac awa'beyic,

²²ha to c'alal ho'winic (100) talento[6] plata, ho'winic (100) coro[7] trigo, ho'winic (100) bato[8] vino, ho'winic (100) bato[9] aceite, soc ats'am te ma ba p'isbil.

²³Spisil bintic ya sc'an te Dios ta ch'ulchan, ora me ya yich' aq'uel yu'un te sna te Dios ta ch'ulchan. ¿Bin yu'un ya xtal yilimba ta stojol ban c'alal scuentahinej te ajwalil soc ta stojol te snich'nabe?

²⁴Soc ya ca'beyex ana'ic te ma me xawa'be stoj chahpalchahp spataniletic te sacerdotehetic, levitahetic, jc'ayojetic, jcanan-ti'nahiletic, j'a'teletic ta templo soc te mach'atic ya x'a'tejic ta sna te Diose.

²⁵Soc ha'at, Esdras, hich te bin ut'il te ay sp'ijil awo'tan te ya'beyejat te Dios awu'une, otsesa juecetic soc gobernadoretic te ya scuentahinic spisil te pueblo te ay ta jehch muc'ul-ha' Éufrates, ha spisilic te sna'ojic te leyetic yu'un te Dios awu'une. Te mach'atic ma sna'ic, a'beya snopic.

²⁶Mach'ayuc a te ma ba ya sc'ohtes ta pasel te ley yu'un te Dios awu'un, soc te ley yu'un te ajwalil, ya me yich' tulan chahpanel, chican teme lajel, teme ya yich' loq'uesel, teme ya stoj multa, o ya x'och ta chuquel, xchi te scarta.

²⁷Bayel yutsil Jehová te Dios yu'un te jme'jtatic te la ya'be ta yo'tan te ajwalil te ya yich' ta muc' te sna Jehová te ay ta Jerusalén,

²⁸soc te la sc'uxultayon ta stojol te ajwalil, te j'ac'-o'taniletic yu'un soc spisil te príncipaletic te muc' ya'telic ta stojol te ajwalil. Hich la jta yip co'tan ta scuenta te la scanantayon te Dios cu'un, ha yu'un la jtsob te príncipaletic yu'un Israel scuenta yu'un ya sjoquinonic bahel ta Jerusalén.